ភ្នំពេញ: សហព័ន្ធសិទ្ធិមនុស្ស និងអភិវឌ្ឍន៍កម្ពុជា និងសភាសម្ព័ន្ធសហជីពជាតិកម្ពុជា បានថ្លែងការគាំទ្រថា ការប្រជុំវិសាមញ្ញ នីតិកាលទី៤ នៃរដ្ឋសភា ក្នុងការបោះឆ្នោតជ្រើសតាំងប្រធាន អនុប្រធាន និងសមាជិករបស់គណៈកម្មាធិការជាតិរៀបចំការបោះឆ្នោត ចំនួន ៩ រូប កាលពីព្រឹកថ្ងៃទី១១ ខែតុលា ឆ្នាំ២០១២ រាជរដ្ឋាភិបាលកម្ពុជា បានអនុវត្តន៍យ៉ាងត្រឹមត្រូវតាមច្បាប់ ដើម្បីធានានូវការបោះឆ្នោតប្រកបដោយតម្លាភាព សេរី ត្រឹមត្រូវ និងយុត្តិធម៌។
សេចក្តីថ្លែងការណ៍រួមសហព័ន្ធសិទ្ធិមនុស្ស និងអភិវឌ្ឍន៍កម្ពុជា និងសភាសម្ព័ន្ធសហជីពជាតិកម្ពុជា កាលពីថ្ងៃទី១១ ខែតុលា ឆ្នាំ២០១២ ដែលចុះហត្ថលេខាដោយលោក ថៅ វាសនា និងលោក សោម អូន បានលើកឡើងថា សហព័ន្ធសិទ្ធិមនុស្ស និងអភិវឌ្ឍន៍កម្ពុជា និងសភាសម្ព័ន្ធសហជីពជាតិកម្ពុជា បានតាមដានយ៉ាងយកចិត្តទុកដាក់ចំពោះការប្រជុំវិសាមញ្ញ នីតិកាលទី៤ នៃរដ្ឋសភា ក្នុងការបោះឆ្នោតជ្រើសតាំងប្រធាន អនុប្រធាន និងសមាជិករបស់គណៈកម្មាធិការជាតិរៀបចំការបោះឆ្នោត ចំនួន ៩ រូប កាលពីព្រឹកថ្ងៃទី១១ ខែតុលា ឆ្នាំ២០១២។
សេចក្តីថ្លែងការណ៍រួម បានថ្លែងបន្តថា សមាជិករដ្ឋសភា ដែលមានកូរ៉ុមចំនួន ៨៧ លើ ៨៧ បានបោះឆ្នោតជាកញ្ចប់ផ្តល់សេចក្តីទុកចិត្តអនុម័តគាំទ្រសមាសភាព គ.ជ.ប. អាណត្តិថ្មី ដើម្បីលើកកម្ពស់លទ្ធិប្រជាធិបតេយ្យសេរីពហុបក្ស និងការបោះឆ្នោតដោយសេរីនៅកម្ពុជា។
សេចក្តីថ្លែងការណ៍ដដែល បានលើកឡើងថា លទ្ធផលខាងលើនេះ បានបង្ហាញពីការខិតខំប្រឹងប្រែងរបស់រាជរដ្ឋាភិបាលកម្ពុជា ដោយអនុលោមតាមមាត្រា១៣ថ្មី(ពីរ) នៃច្បាប់ ស្តីពីការបោះឆ្នោតជ្រើសរើសតំណាងរាស្ត្រ និងច្បាប់ស្តីពី វិសោធនកម្ម ច្បាប់ស្តីពីការបោះឆ្នោតជ្រើសតាំងតំណាងរាស្ត្រ។ រដ្ឋសភាជាតិបានបំពេញតួនាទី និងភារកិច្ចយ៉ាងត្រឹមត្រូវតាមមាត្រា៨៨ថ្មី(ពីរ) នៃច្បាប់រដ្ឋធម្មនុញ្ញនិងមាត្រា៤៧ថ្មី(បី) នៃបទបញ្ជាផ្ទៃក្នុងរដ្ឋសភា ដែលបានចែងថា ការប្រជុំរបស់រដ្ឋសភា ដែលអាចយកជាការបាន លុះត្រាតែកូរ៉ុមលើសពីពីរភាគបីនៃចំនួនសមាជិករដ្ឋសភាទាំងមូល សម្រាប់ការអនុម័តទាំងឡាយ ដែលតម្រូវឲ្យយកមតិភាគច្រើន ពីរភាគបី នៃចំនួនសមាជិករដ្ឋសភាទាំងមូល។
សេចក្តីថ្លែងការណ៍រួម បានបន្ថែមទៀតថា ដូច្នេះ សហព័ន្ធសិទ្ធិមនុស្ស និងអភិវឌ្ឍន៍កម្ពុជា និងសភាសម្ព័ន្ធសហជីពជាតិកម្ពុជា សូមបង្ហាញនូវជំហរស្វាគមន៍ និងគាំទ្រ៖
១/រាជរដ្ឋាភិបាលកម្ពុជា បានអនុវត្តន៍យ៉ាងត្រឹមត្រូវតាមច្បាប់ ក្នុងការស្នើសមាសភាពគណៈកម្មាធិការជាតិរៀបចំការបោះឆ្នោត ជូនរដ្ឋសភាប្រជុំអនុម័ត ដើម្បីធានានូវការបោះឆ្នោតប្រកបដោយតម្លាភាព សេរី ត្រឹមត្រូវ និងយុត្តិធម៌។
២/រដ្ឋសភាបានដំណើរការប្រជុំតាមនីតិវិធី គោរពតាមគោលការណ៍លទ្ធិប្រជាធិបតេយ្យ ច្បាប់ធម្មនុញ្ញនិងបទបញ្ជាផ្ទៃក្នុងរបស់ខ្លួន។
សេចក្តីថ្លែងការណ៍រួម ក៏បានបញ្ជាក់ថា ដូច្នេះការសម្រេចជាឯកច្ឆន្ទរបស់រដ្ឋសភា ដែលមានសំឡេង ៨៧ លើ ៨៧ គឺមានសារសំខាន់ណាស់ ដើម្បីបន្តនូវការអនុវត្តលទ្ធិប្រជាធិបតេយ្យនៅកម្ពុជា ដូចបានកំណត់ក្នុងច្បាប់រដ្ឋធម្មនុញ្ញ អំពី ការបោះឆ្នោតសកលរៀងរាល់ ៥ ឆ្នាំម្តង៕