ដោយ ៖ មរតក
ភ្នំពេញ ៖ ប្រមុខរាជរដ្ឋាភិបាលកម្ពុជាសម្ដេចអគ្គមហាសេនាបតីតេជោ ហ៊ុន សែន នឹងដឹកនាំគណៈប្រតិភូជាន់ខ្ពស់អញ្ជើញចូលរួមកិច្ចប្រជុំកំពូល កម្ពុជា ឡាវ និងវៀតណាម (CLV) លើកទី៧ ស្ដីពីការអភិវឌ្ឍតំបន់ត្រីកោណ នេះបើយោងតាមសេចក្ដីជូនព័ត៌មានរបស់ ក្រសួងការបរទេសនិងសហប្រតិបត្ដការអន្ដរជាតិ ចេញផ្សាយនៅថ្ងៃទី១២ ខែ តុលា ឆ្នាំ២០១២ ។
សេចក្ដីជូនព័ត៌មានបានឱ្យដឹងថា តបតាមការអញ្ជើញរបស់លោក ង្វៀង តាន់យុង នាយករដ្ឋមន្ដ្រីនៃសាធារណរដ្ឋ សង្គមនិយមវៀតណាម សម្ដេចអគ្គ មហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់ទៅចូលរួម ប្រជុំកំពូល កម្ពុជា ឡាវ វៀតណាម (CLV) លើកទី៧ ស្ដីពីការអភិវឌ្ឍតំបន់ ត្រីកោណ ដែលនឹងប្រព្រឹត្ដទៅពីថ្ងៃទី១៩ ដល់ថ្ងៃទី២០ ខែតុលា ឆ្នាំ២០១២ នៅ ទីក្រុងហូជីមិញសាធារណរដ្ឋសង្គមនិយម វៀតណាម ។
សេចក្ដីជូនព័ត៌មានដដែលឱ្យដឹងទៀតថា គណៈប្រតិភូអមដំណើរសម្ដេចតេជោ រួមមានលោកទេសរដ្ឋមន្ដ្រី ចម ប្រសិទ្ធ រដ្ឋមន្ដ្រីក្រសួងពាណិជ្ជកម្ម និង សមាជិកនៃរាជរដ្ឋាភិបាលដទៃទៀត ។
សេចក្ដីជូនព័ត៌មានបញ្ជាក់ថា នៅចុងបញ្ចប់នៃកិច្ចប្រជុំកំពូលនេះ នាយក រដ្ឋមន្ដ្រីនៃប្រទេសទាំង៣ កម្ពុជា ឡាវ និងវៀតណាម នឹងចុះហត្ថលេខាលើ សេចក្ដីថ្លែងការណ៍រួមមួយ៕