ដោយ ៖ គឹម សុខជា
ខេត្តបាត់ដំបង ៖ មន្ត្រីបំរើការងារមន្ទីរសាធារណការ និងដឹកជញ្ជូនខេត្តបាត់ដំបង តាំងពីថ្ងៃរំដោះ៧ មករា ឆ្នាំ១៩៧៩ ចំនួន៨០នាក់ដែលចូលនិវត្តន៍ត្រូវបានលោកប្រធានមន្ទីរសាធារណការ និងដឹកជញ្ជូនរៀបចំពិធីជួបជុំសំណេះសំណាលដកស្រង់យកបទពិសោធន៍នឹងដឹងគុណព្រមទាំងមានចែកអំណោយអនុស្សាវរីយ៍ និងពិសារបាយសាមគ្គី ក្នុងឱកាសបុណ្យភ្ជុំបិណ្ឌ។
ពិធីនេះ បានធ្វើឡើងកាលពីរសៀលថ្ងៃទី១១ ខែតុលា ឆ្នាំ២០១២ នៅសាលប្រជុំមន្ទីរសាធារណការ និងដឹកជញ្ជូន ខេត្តបាត់ដំបង ក្រោមអធិបតីភាពលោក ខាន់ ម៉ាណេ ទីប្រឹក្សាផ្ទាល់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃនិងជាប្រធានមន្ទីរសាធារណការ និងដឹកជញ្ជូនខេត្តបាត់ដំបង ព្រមទាំងមន្ត្រីកំពុងបម្រើការងារជាច្រើនរយនាក់ផងដែរ។
លោកខាន់ម៉ាណេប្រធានមន្ទីរសាធារណការនិងដឹកជញ្ជូនខេត្តមានប្រសាសន៍ថានាមជាមន្ត្រីរាជការទាំងអស់គ្នា ជាពិសេសអ្នកស្រករក្រោយបានស្គាល់បងៗ ពូមីង ដែលបានគ្រប់អាយុចូលនិវត្តន៍ និងជាឱកាសមួយ ឲ្យយើងបានជួបមុខគ្នា និងរម្លឹកពីវីរភាព ព្រមទាំងបទពិសោធខ្លះ ដែលមានកន្លងមក ក្នុងឱកាសភ្ជុំបិណ្ឌនេះ ឬពេលមានបុណ្យជាតិជារៀងរាល់ឆ្នាំ ១ដង ឬ ២ដង។
លោក ខាន់ ម៉ាណេ បានបន្តថា ក្នុងឱកាសបុណ្យភ្ជុំបិណ្ឌនេះ ថ្នាក់ដឹកនាំមន្ទីរ អនុប្រធានមន្ទីរ និងសហការី បានប្រារព្ធការដឹងគុណចំពោះព្រឹទ្ធាចារ្យចាស់ៗ គឺជាកុសលផលបុណ្យរបស់យើងទាំងអស់គ្នា។ក្នុងរយៈពេលដែលពូមីងបងៗបម្រើការងារក្នុងកាលៈទេសៈដែលប្រទេសជាតិ មានការលំបាក ហើយអ្នកខ្លះគ្មានទាំងកង់ម៉ូតូជិះផង។ បើប្រៀបធៀបជាមួយពួកយើង ដែលកំពុងបម្រើការងាររាល់ថ្ងៃខុសគ្នាខ្លាំងណាស់តែបើគ្មានកាតព្វកិច្ចលះបង់ខ្ពស់ពីបងៗចាស់ព្រឹទ្ធាចារ្យនិងថ្នាក់ដឹកនាំរបស់រាជរដ្ឋាភិបាលទេប្រទេសជាតិក៏គ្មានថ្ងៃរីកចំរើនដែរ ។
លោកប្រធានមន្ទីរបានបន្តថាចាប់តាំងពីថ្ងៃរំដោះ ៧ មករា ឆ្នាំ១៩៧៩មកក្នុងរយៈពេលនោះ ប្រទេសមានសង្គ្រាមរាំរ៉ៃមានយុទ្ធនាការក៥ដើម្បីរៀបចំកសាងស្តាហេដ្ឋារចនាសម្ព័ន្ធឡើងវិញ ប៉ុន្តែមន្ត្រីរាជការមួយចំនួនមានជំងឺហើយបានស្លាប់ និងរបួសពិការបញ្ជាក់ពីវីរភាពដែលយើង
ខ្ញុំទាំងអស់គ្នាត្រូវចងចាំចំពោះការលះបង់នេះជានិច្ច ។
ខ្ញុំទាំងអស់គ្នាត្រូវចងចាំចំពោះការលះបង់នេះជានិច្ច ។
ក្នុងឱកាសនោះដែរ លោកប្រធានមន្ទីរ បានសំណូមពរដល់មន្ត្រីទាំងអស់ ឲ្យចូលរួមណែនាំដល់បងប្អូនកូនចៅទាំងអស់ ត្រូវយកស្មារតីប្រុងប្រយ័ត្នក្នុងការធ្វើដំណើរទៅចូលរួមពិធីបុណ្យភ្ជុំបិណ្ឌនៅតាមស្រុកកំណើតត្រូវគោរពច្បាប់ចរាចរណ៍ដោយបើកបររថយន្តត្រូវពាក់ខ្សែក្រវាត់ និងពាក់មួកសុវត្ថិភាព ក្នុងពេលបើកបរម៉ូតូ ហើយពិសេសមន្ត្រីប្រចាំការ ត្រូវត្រៀមកម្លាំងការពារ ក្នុងពេលបុណ្យភ្ជុំ និងក្រោយបុណ្យដែលកើតមានជាយថាហេតុ។
ពេលជិតបញ្ចប់ពិធី លោក ខាន់ ម៉ាណេ ប្រធានមន្ទីរសាធារណការ មានការចែកអំណោយដល់មន្ត្រីនិវត្តន៍ជនទាំង៨០នាក់ ក្នុងម្នាក់ៗទទួលបានប័ណ្ណសរសើរ និងសារ៉ុង១ ក្រមា១ កន្សែងពោះគោ១ សាប៊ូ ថ្នាំដុសធ្មេញច្រាសដុសធ្មេញនិងថវិកា១០ម៉ឺនរៀលទុកជាការដឹងគុណ ចំពោះពួកគាត់ ៕