លោក ស្រី បេន អភិបាលខេត្តតាកែវ និងជាគណៈបញ្ជាការឯកភាពខេត្តតាកែវ បានផ្សព្វផ្សាយជាបន្ទាន់ដល់មន្ត្រីរាជការមន្ទីរជុំវិញខេត្ត អង្គភាពប៉ូលិស ប៉េអឹម ទាហាន អាជ្ញាធរក្រុង-ស្រុក ព្រមទាំងប្រជាពលរដ្ឋនៅតាមឃុំ-សង្កាត់ ភូមិ វត្តអារាម និងទីប្រជុំជន ជាពិសេសយុវជនស្ម័គ្រចិត្តសម្តេចតេជោ ដើម្បីបានតាមដានស្តាប់វិទ្យុ និងមើលទូរទស្សន៍ ពីការបកស្រាយរបស់សម្តេច ហ៊ុន សែន ស្តីពីការងារបោះបង្គោលខណ្ឌសីមាព្រំដែនគោក និងការកំណត់ព្រំដែនសមុទ្រ រវាងកម្ពុជា និងវៀតណាម។
លោកឧត្តមសេនីយ៍ត្រី អ៊ុក សំណាង ស្នងការនគរបាលខេត្ត បានឲ្យដឹងថា លោកបានចាត់តាំងរៀបចំកងកម្លាំងនគរបាលក្រោមឱវាទ នៅតាមអង្គភាពបញ្ជាការដ្ឋាន វរ អធិការដ្ឋាន គ្រប់ស្រុក-ក្រុង ប៉ុស្តិ៍នគរបាលការពារព្រំដែន ប៉ុស្តិ៍នគរបាលរដ្ឋបាលឃុំ-សង្កាត់ ឱ្យស្លៀកពាក់ឯកសណ្ឋាននគរបាលជាតិឲ្យបានត្រឹមត្រូវ នៅតាមកន្លែងធ្វើការរៀងៗខ្លួន ដើម្បីតាមដានស្តាប់ការផ្សាយផ្ទាល់តាមវិទ្យុ និងតាមទូរទស្សន៍ នូវការបកស្រាយបំភ្លឺរបស់សម្តេចតេជោ។
លោកឧត្តមសេនីយ៍ត្រី សាយ សារុន មេបញ្ជាការតំបន់ប្រតិបត្តិការសឹករងតាកែវ ក៏បានចាត់តាំងកម្លាំង ដើម្បីតាមដានស្តាប់ការផ្សាយផ្ទាល់តាមវិទ្យុ និងទូរទស្សន៍ នូវការបកស្រាយរបស់សម្តេច ហ៊ុន សែន ដែរ។
លោក អ៊ូច ភា អភិបាលក្រុងដូនកែវ ក៏បានធ្វើការផ្សព្វផ្សាយ និងចាត់តាំងមន្ត្រីសាលាក្រុង តាមសង្កាត់ ភូមិ វត្តអារាម និងទីប្រជុំជន ឲ្យតាមដានការបកស្រាយរបស់សម្តេចតេជោ ស្តីពីការបោះបង្គោលខណ្ឌសីមាព្រំដែនគោក និងការកំណត់ព្រំដែនសមុទ្រ រវាងកម្ពុជា និងវៀតណាមផងដែរ៕