ភ្នំពេញ: សម្ដេច ហ៊ុន សែន នាយករដ្ឋមន្ត្រី បានមានប្រសាសន៍ផ្ដាំផ្ញើថា មិនចាំបាច់ឲ្យលោក សម រង្ស៊ី មេបក្សប្រឆាំងសមរង្ស៊ី សរសេរសំបុត្រមកជូនសម្ដេចទេ ក្នុងការដែលសម្ដេចចូលឆ្លើយបំភ្លឺរឿងព្រំដែនកម្ពុជា-វៀតណាម នៅរដ្ឋសភា។
សម្ដេចនាយករដ្ឋមន្ត្រី បានគូសបញ្ជាក់ថា “សូមប្រាប់ទៅមេបក្សលោកទៅ មិនចាំបាច់សរសេរសំបុត្រមកខ្ញុំទេ។ ខែ១២ ឆ្នាំ២០១១ សរសេរសំបុត្រសរសើខ្ញុំ។ ខែមករា ជេរខ្ញុំអាក្បត់ជាតិ”។
សម្ដេចនាយករដ្ឋមន្ត្រី ហ៊ុន សែន បានមានប្រសាសន៍ទៅកាន់ក្រុមអ្នកតំណាងរាស្ដ្របក្សប្រឆាំងទៀតថា “ពេលដែលប្រធានលោក និយាយជាមួយឯកឧត្តម អេង ឆៃអ៊ាង គឺកំណត់ឲ្យតាមដាន កំពុងតាមដានហើយ ប្រហែលជាត្រៀមលិខិតខ្លះហើយផង ដើម្បីអបអរសាទរខ្ញុំឡើងឆ្លើយនៅរដ្ឋសភាជាលើកដំបូង”។ សម្ដេចបានគូសបញ្ជាក់ថា “មិនបាច់ផ្ញើមកទេ ព្រោះខ្ញុំគ្មានពេលឆ្លើយជាមួយពួកទណ្ឌិតទេ”៕