ភ្នំពេញ: មន្ត្រីក្រសួងអប់រំយុវជន និងកីឡា បានថ្លែងថា សម្រាប់ការប្រព្រឹត្តប្រឡងមធ្យមសិក្សាទុតិយភូមិនេះ ក្រសួងបានខិតខំដុតដៃដុតជើង ខំធ្វើការងារប៉ុន្មានថ្ងៃនេះ ដើម្បីឲ្យការប្រឡងមានភាពយុត្តិធម៌ និងសុក្រឹត្យ។
លោក សម សេរីរ័ត្ន អគ្គនាយកអគ្គនាយកដ្ឋានអប់រំ នៃក្រសួងអប់រំ យុវជន និងកីឡា បានមានប្រសាសន៍នៅថ្ងៃទី៨ ខែសីហា ឆ្នាំ២០១២ នេះថា ក្រសួងអប់រំបានខិតខំរៀបចំការប្រឡងសញ្ញាមធ្យមសិក្សាទុតិយភូមឲ្យបានល្អ ដោយមានកិច្ចសហការជាមួយក្រសួងមហាផ្ទៃ និងសមត្ថកិច្ចមូលដ្ឋាន ដើម្បីទប់ស្កាត់ការបង្កភាពរញ៉េរញ៉ៃនៅជុំវិញមណ្ឌលប្រឡង និងការពារមណ្ឌលប្រឡងកុំឲ្យមានបញ្ហាកើតឡើង។
លោក សម សេរីរ័ត្ន ក៏បានប្រតិកម្មផងដែរ ទៅនឹងការចោទប្រកាន់នានា ពីសំណាក់លោក រ៉ុង ឈុន នៅក្នុងពេលប្រឡងសញ្ញាបត្រមធ្យមសិក្សាទុតិយភូមិនេះថា “លោក រ៉ុង ឈុន គាត់មិនមែនអ្នកធ្វើ គាត់អ្នកនិយាយ គាត់ចេះតែនិយាយទៅ។ បើយើងអ្នកធ្វើនេះ យើងដុតដៃដុតជើងចង់ងាប់ហើយ។ រាល់ឆ្នាំ រ៉ុង ឈុន និយាយគ្រប់តែរឿងហ្នឹង។ រ៉ុង ឈុន គាត់មិនដឹងថា យើងធ្វើការយ៉ាងម៉េចផង គាត់ដឹងតែថា មិនល្អ មិនល្អ តែគ្រូបង្រៀនយើងទូទាំងប្រទេសគាត់ខំសស្រាក់សស្រាំធ្វើការងាររបស់យើង ប៉ុន្មានថ្ងៃមកនេះ តែត្រូវថា យ៉ាងម៉េចទៀត”។
សូមជម្រាបថា បន្ទាប់ពីបញ្ចប់ការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃនេះ លោក រ៉ុង ឈុន បានចេញនូវសេចក្ដីថ្លែងការណ៍ដោយលើកឡើងថា ការប្រឡងបាក់ឌុប ត្រូវបានបញ្ចប់នៅថ្ងៃនេះ ដោយស្ថានភាពស្រអាប់ ការដែលក្រសួងអប់រំគ្រប់គ្រងដំណើរការប្រឡងមិនបានល្អ គឺជាការបរាជ័យ។
ការប្រព្រឹត្តទៅនៃដំណើរការប្រឡងសញ្ញាបត្រមធ្យមសិក្សាទុតិយភូមិ ក្នុងសម័យប្រឡងរយៈពេលពីរថ្ងៃកន្លះ បានចាប់ផ្តើមពីថ្ងៃទី៦ ខែសីហា ឆ្នាំ២០១២ ដែលមានបេក្ខជនចំនួន ១១៤.៤១៤ នាក់ មណ្ឌលប្រឡងចំនួន ២៥៤មណ្ឌល និង ៤.៦៦៣ បន្ទប់៕