ភ្នំពេញ: ចៅក្រមស៊ើបសួរសាលាដំបូងរាជធានីភ្នំពេញ លោកស្រី សែម ស័ក្តិកូឡា បានចេញដីកា កាលពីថ្ងៃទី៧ ខែសីហា ឆ្នាំ២០១២ ដោយសម្រេចបដិសេធពាក្យស្នើសុំរបស់មេធាវីឲ្យ លោក ម៉ម សូណង់ដូ នៅក្រៅឃុំបណ្តោះអាសន្ន។
លោក សុខ សំអឿន មេធាវីការពាក្តីឲ្យលោក ម៉ម សូណង់ដូ បានមានប្រសាសន៍នៅព្រឹកថ្ងៃទី៨ ខែសីហា ឆ្នាំ២០១២ ថា លោកស្រី សែម ស័ក្តិកូឡា ចៅក្រមស៊ើបសួរ នៃសាលាដំបូងបានសម្រេចចេញដីកាបដិសេធ កាលពីថ្ងៃទី៧ ខែសីហា ឆ្នាំ២០១២ ឆ្លើយតបនឹងសំណើរបស់លោកមេធាវី ដែលសុំធានាកូនក្តី គឺលោក ម៉ម សូណង់ដូ បានស្ថិតនៅក្រៅឃុំបណ្តោះអាសន្ននោះ។
លោកមេធាវី សុខ សំអឿន បានមានប្រសាសន៍បញ្ជាក់យ៉ាងនេះថា “ចៅក្រមស៊ើបសួរ គេបដិសេធដោយមានមូលហេតុពីរ ទី១-ចៅក្រមស៊ើបអង្កេតកំពុងស៊ើបសួរ និងទី២-ព្រះរាជអាជ្ញា អត់ព្រម”។
លោកមេធាវី បានមានប្រសាសន៍បន្តថា ចំពោះការសម្រេចប្តឹងទាស់នឹងការបដិសេធ មិនឲ្យកូនក្តីរបស់លោក គឺលោកម៉មសូណង់ដូ មិនអាចស្ថិតនៅក្រៅឃុំបាននោះ គឺការប្តឹងទៅឧទ្ធរណ៍ លោកមេធាវីត្រូវការពិគ្រោះយោបល់ជាមួយកូនក្តីសិន ដែលជំនួបពិភាក្សានោះ នឹងធ្វើឡើងនៅល្ងាចថ្ងៃទី៨ ខែសីហា ឬថ្ងៃស្អែកទី៩ សីហា ឆ្នាំ២០១២។
លោកមេធាវី សុខ សំអឿន បានបញ្ជាក់ថា លោកមានសំអាងរឹងមាំមួយចំនួន សម្រាប់ការពារកូនក្តីរបស់លោក នៅក្នុងតុលាការ និងមានសំអាងរឹងមាំ សម្រាប់ប្តឹងស្នើសុំឲ្យ លោកម៉មសូណង់ដូ នៅក្រៅឃុំ។ នោះគឺលោកម៉មសូណង់ដូ មិនបានជាប់ពាក់ព័ន្ធដូចការចោទប្រកាន់ ហើយលោកនឹងមិនរត់គេច ទៅណាទេ។
សូមបញ្ជាក់ថា លោក ម៉ម សូណង់ដូ ត្រូវបានចៅក្រមស៊ើបសួរនៃលាសាដំបូងរាជធានីភ្នំពេញ សម្រេចឃុំខ្លួន នៅពន្ធនាគារព្រៃស ក្រោមការចោទប្រកាន់ពីបទ ផ្តួចផ្តើមគំនិតប្រឆាំងអ្នករាជការសាធារណៈ ធ្វើកុបកម្ម ជ្រៀតជ្រែកខុសច្បាប់ នៅក្នុងការបំពេញមុខងារសាធារណៈ ញុះញង់ឲ្យប្រជាពលរដ្ឋកាន់កាប់អាវុធខុសច្បាប់ និងប្រឆាំងនឹងអាជ្ញាធរស្របច្បាប់។
ការចោទប្រកាន់ទាំងនោះ អាជ្ញាធរបានភ្ជាប់ទៅនឹងករណីជម្លោះដីធ្លី នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។ ជម្លោះដីធ្លីនោះ មានប្រជាពលរដ្ឋមួយក្រុម ដែលដឹកនាំដោយឈ្មោះ ប៊ុត រដ្ឋា ជាសាខាសមាគមអ្នកប្រជាធិបតេយ្យ របស់លោក ម៉មសូណង់ដូ ត្រូវបានរដ្ឋាភិបាល ចោទប្រកាន់ថា បានចាប់ដីខុសច្បាប់ និងបង្កើតតំបន់អបគមន៍ លើដីជម្លោះ រហូតដល់កងកម្លាំងរដ្ឋាភិបាល ចុះបង្ក្រាប និងបណ្ថេញចេញដោយអាវុធ កាលពីថ្ងៃទី១៦ ខែឧសភា ឆ្នាំ២០១២ បណ្តាលឲ្យក្មេងស្រីម្នាក់ ស្លាប់ និងមនុស្សជាច្រើននាក់ទៀត រត់គេចខ្លួន។
មានអាយុ ៧២ ឆ្នាំ លោក ម៉ម សូណង់ដូ ប្រធានសមាគមអ្នកប្រជាធិបតេយ្យ ត្រូវបានសមត្ថកិច្ចបានចាប់ខ្លួន កាលពីថ្ងៃទី១៥ ខែកក្កដា ឆ្នាំ២០១២ គឺបន្ទាប់ពីលោក បានវិលត្រឡប់ពីប្រទេសអាមេរិក កាលពីថ្ងៃទី១២ ខែកក្កដា ឆ្នាំ២០១២៕
