កំពង់ឆ្នាំង: មន្ដ្រីរាជការ កងកម្លាំងប្រដាប់អាវុធ និងប្រជាពលរដ្ឋនៅក្នុងខេត្ដកំពង់ឆ្នាំង បានតាមដានទស្សនា និងស្ដាប់ការផ្សាយផ្ទាល់ នៃការប្រជុំរដ្ឋសភា នៅព្រឹកថ្ងៃទី៩ ខែសីហា ឆ្នាំ២០១២ ដែលសម្ដេចនាយករដ្ឋមន្ត្រី ហ៊ុន សែន បានចូលបកស្រាយដោយផ្ទាល់ ជុំវិញបញ្ហាដោះស្រាយ និងបោះបង្គោលព្រំដែន រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។
ដោយឡែក មន្ដ្រីនគរបាលចំណុះឲ្យស្នងការដ្ឋាននគរបាលខេត្ដកំពង់ឆ្នាំង បានធ្វើការប្រមូលផ្ដុំ នៅសាលប្រជុំក្នុងស្នងការដ្ឋាន និងនៅតាមអធិការដ្ឋានក្រុង-ស្រុក ដើម្បីត្រងត្រាប់ស្ដាប់ការផ្សាយផ្ទាល់ពីរដ្ឋសភាជាតិ នូវប្រសាសន៍របស់សម្ដេចតេជោ។
លោកឧត្ដមសេនីយ៍ត្រី អាត់ ខែម ស្នងការនគរបាលខេត្ដកំពង់ឆ្នាំង បានមានប្រសាសន៍ថា មានមន្ដ្រីនគរបាលចំនួន ៨៨៧ នាក់ បានប្រមូលផ្ដុំគ្នា នៅតាមអង្គភាពរបស់ខ្លួន តាមដានទស្សនា និងស្ដាប់ដោយយកចិត្ដទុកដាក់ នូវប្រសាសន៍របស់សម្ដេចតេជោនាយករដ្ឋមន្ដ្រី បកស្រាយពីបញ្ហាព្រំដែនរវាងកម្ពុជា និងវៀតណាម នៅព្រឹកថ្ងៃទី៩ ខែសីហានេះ៕