ខេត្តកំពង់ឆ្នាំង ៖ ជនសង្ស័យចំនួន៤នាក់ ត្រូវបានប៉ូលិសការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្ត សហការជាមួយប៉ូលិសខេត្តបាត់ដំបង ចាប់ឃាត់ខ្លួនបានជាបន្តបន្ទាប់នៅកន្លែងផ្សេងគ្នា ដោយចោទប្រកាន់ ពីបទជួញដូរមនុស្សឆ្លងដែនខុសច្បាប់ ដែលប្រព្រឹត្តឡើងកាលពីដើមខែឧសភា ២០១២ កន្លងទៅ នៅស្រុកកំពង់លែង ខេត្តកំពង់ឆ្នាំង និងនៅស្រុកសំពៅលូន ខេត្តបាត់ដំបង ក្នុងនោះ៣នាក់ ចាប់បាន កាលពីល្ងាចថ្ងៃទី៧ សីហា នៅខេត្តបាត់ដំបង និងម្នាក់ទៀតចាប់នៅព្រឹកថ្ងៃទី៨ សីហា នៅខេត្តកំពង់ឆ្នាំង ។
លោកស្រីវរសេនីយ៍ឯកប្រាក់ សៅនី ស្នងការរងខេត្តបាននិយាយថា ដើម្បីឱ្យងាយយល់ លោកស្រីសូមចែកករណីជួញដូរមនុស្សឆ្លងដែនខុសច្បាប់នេះជាពីរក្រុម ដោយមួយក្រុមជាអ្នកនាំមនុស្សចេញពីខេត្តកំពង់ឆ្នាំង ទៅខេត្តបាត់ដំបង និងមួយក្រុមទៀតនាំចេញពីខេត្តបាត់ដំបង ឆ្លងចូលទៅប្រទេសថៃ ។ លោកស្រីបានបញ្ជាក់ថា ចំពោះក្រុមទី១ គឺ១-ឈ្មោះជឿន ចាន់ ភេទប្រុស អាយុ៣២ឆ្នាំ ២-ឈ្មោះសូ ផ្លុយ ភេទប្រុស អាយុ២៩ឆ្នាំ និង៣-ឈ្មោះឡោ អូប ភេទស្រី អាយុ២៤ឆ្នាំ ទាំង៣នាក់ មានទីលំនៅភូមិធ្លក ឃុំច្រណូក ស្រុកកំពង់លែង ហើយអ្នកទាំង៣នាក់ នេះ បានចាប់ដាក់ពន្ធនាគាររួចហើយ ក្រោមបទចោទប្រកាន់ខាងលើ ។
លោកស្រីបានបន្តថា ក្នុងអំឡុងដើមខែឧសភា ២០១១ ពួកគេទាំង៣នាក់បាននាំពលករឆ្លងដែនខុសច្បាប់ចំនួន៣៣នាក់ ក្នុងនោះមាន១០នាក់ ជាអនីតិជនចេញពីភូមិធ្លក ឃុំច្រណុក ស្រុកកំពង់លែង យកទៅឱ្យស្ត្រីម្នាក់ឈ្មោះញ៉ែម ពេញ អាយុ៦២ឆ្នាំ មានទីលំនៅស្រុកសំពៅលូន ខេត្តបាត់ដំបង តាមការអូសទាញរបស់ឈ្មោះឡោ ឡា ភេទប្រុស អាយុ៣២ឆ្នាំ ដែលត្រូវជាបងប្រុសរបស់ឈ្មោះឡោ អូប ដោយប្រាប់ថា ទៅច្រូតស្រូវរបស់យាយពេញ ។