ភ្នំពេញ: សម្ដេចនាយករដ្ឋមន្ត្រី ហ៊ុន សែន មុននឹងបញ្ចប់ការឆ្លើយបំភ្លឺនៅរដ្ឋសភា រឿងព្រំដែនកម្ពុជា និងវៀតណាម បានថ្លែងកោតសរសើរអំពីភាពក្លាហាន របស់អ្នកតំណាងរាស្ដ្រនៃគណបក្សសមរង្ស៊ី ដែលជាម្ចាស់សំណួរ បានទ្រាំអង្គុយស្ដាប់ទាំងជូរចត់។
ការថ្លែងកោតសរសើរនោះ សម្ដេចតេជោបានមានប្រសាសន៍យ៉ាងដូច្នេះថា “សូមកោតសរសើរដល់អ្នកតំណាងរាស្ដ្រ នៃគណបក្សម្ចាស់សំណួរ ដែលបានប្រឹងប្រែងអង្គុយស្ដាប់ ទោះបីជាជូរចត់ ក៏ប៉ុន្តែបានប្រឹង។ អរគុណ! កោតសរសើរចំពោះភាពក្លាហាន”។
សម្ដេចនាយករដ្ឋមន្ត្រីបានលើកឡើងផងដែរថា បើយើងសហការគ្នាដូចនេះ ថ្ងៃក្រោយយើងជិះកប៉ាល់ទៅជាមួយគ្នា មើលកោះមើលត្រើយមួយចំនួន ហើយមិនចោទគ្នាថា អាក្បត់ជាតិ លក់ដីឲ្យគេទេ។ យើងអាចមានមោទនភាពជាមួយគ្នា ក្នុងឋានៈជាជនរួមជាតិដូចគ្នា ហោចណាស់យើងជាខ្មែរដូចគ្នា។
សម្ដេចនាយករដ្ឋមន្ត្រីបានបន្ថែមទៀតថា “សូមអរគុណចំពោះឯកឧត្តម លោកជំទាវ ដែលទ្រាំអង្គុយស្ដាប់ ដោយភាសាខ្លះមិនពិរោះ ប៉ុន្តែខ្ញុំជំពាក់ ខ្ញុំត្រូវតែនិយាយ ព្រោះឯកឧត្តម លោកជំទាវ បានបង្ខំខ្ញុំឲ្យនិយាយ”៕
