ភ្នំពេញ ៖ អនុវត្តតាមការដឹកនាំរបស់សាលារាជធានីភ្នំពេញក៏ដូចជាសាលាខណ្ឌទួលគោកកាលពីព្រឹកថ្ងៃទី៤ ខែសីហា ឆ្នាំ២០១២ លោក ប៉ិច សុឃឿន ចៅសង្កាត់ទឹកល្អក់ទី១ បានដឹកនាំមន្ត្រីសង្កាត់ មេភូមិ និង ប្រជាពលរដ្ឋចំនួនប្រមាណ៤០នាក់ ចុះធ្វើអនាម័យ បរិស្ថាន ដោយដើររើសសំរាមឲ្យមាននិងកាកសំណល់ផ្សេងៗនៅក្នុងមូលដ្ឋានរបស់ខ្លួន ដើម្បីឲ្យមានបរិស្ថានល្អ និង ទប់ស្កាត់ជំងឺគ្រុនឈាម។
លោក ប៉ិច សុឃឿន ចៅសង្កាត់ទឹកល្អក់ទី១ បានឲ្យដឹងថា ក្រោមការដឹកនាំរបស់លោក សេង រតនៈ អភិបាលនៃគណៈអភិបាលខណ្ឌទួលគោក និង ផ្នែកបរិស្ថានបានឲ្យគ្រប់សង្កាត់ទាំង១០ នៅក្នុងអាណាចក្រខណ្ឌទួលគោកធ្វើអនាម័យបរិស្ថានឲ្យមានអនាម័យ បរិស្ថានល្អ និង ការពារជំងឺគ្រុនឈាម។ អនុវត្តតាមការណែនាំនេះទើប នៅព្រឹកថ្ងៃទី៤ ខែសីហា មន្ត្រីសង្កាត់មេភូមិ និង ប្រជាពលរដ្ឋនៅក្នុងសង្កាត់ទឹកល្អក់១ ប្រមាណ៤០នាក់ចុះអនុវត្តការងារនេះតែម្ដង៕