ភ្នំពេញ: កិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៤៤ នឹងប្រព្រឹត្តទៅចាប់ពីថ្ងៃទី២៥ ខែសីហា ដល់ថ្ងៃទី១ ខែកញ្ញា ឆ្នាំ២០១២ នៅសណ្ឋាគារ អប្សរាអង្គរ ក្រុងសៀមរាប ខេត្តសៀមរាប។ កិច្ចប្រជុំនោះនឹងមានការចូលរួមបើកកិច្ចប្រជុំដោយសម្តេចនាយករដ្ឋមន្ត្រី ហ៊ុន សែន នៅព្រឹកថ្ងៃទី២៧ ខែសីហា ឆ្នាំ២០១២។ នេះបើតាមលិខិតជូនដំណឹងរបស់លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម ជូនទៅរដ្ឋមន្ត្រីក្រសួងព័ត៌មាន។
ក្រសួងពាណិជ្ជកម្ម បានផ្សព្វផ្សាយនូវខ្លឹមសារសំខាន់ៗ ពាក់ព័ន្ធនឹងកិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៤៤ និងកិច្ចប្រជុំពាក់ព័ន្ធ ដែលនឹងប្រព្រឹត្តទៅពីថ្ងៃទី២៥ ខែសីហា ឆ្នាំ២០១២ ដល់ថ្ងៃទី១ ខែកញ្ញា ឆ្នាំ២០១២ នៅខេត្តសៀមរាប ដែលកម្ពុជា ធ្វើជាម្ចាស់ផ្ទះនៃកិច្ចប្រជុំនោះ។
សេចក្តីប្រកាសលើកឡើងថា កិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៤៤ នឹងពិនិត្យលើរបៀបវារៈសំខាន់ៗពាក់ព័ន្ធនឹងសេរីភាវូបនីយកម្ម ពាណិជ្ជកម្ម និងកិច្ចសហប្រតិបត្តិការសេដ្ឋកិច្ច ក្នុងចំណោមប្រទេសសមាជិកអាស៊ានទាំងដប់ និងជាមួយប្រទេសដៃគូពិភាក្សា មានដូចជា សធារណរដ្ឋប្រជាមានិតចិន សាធារណរដ្ឋកូរ៉េ ជប៉ុន អូស្ត្រាលី ញូវហ្សេឡិន ឥណ្ឌា សហរដ្ឋអាមេរិក កាណាដា និងរុស្ស៊ី។
សេចក្តីប្រកាស ក៏បានលើកឡើងថា ក្នុងកិច្ចប្រជុំនោះដែរ នឹងមានកិច្ចប្រជុំពិគ្រោះយោបល់រវាងរដ្ឋមន្ត្រីសេដ្ឋកិច្ចអាស៊ាន ជាមួយរដ្ឋមន្ត្រីនៃក្រុមប្រឹក្សានានា ក្នុងក្របខ័ណ្ឌអាស៊ាន ( AFTA Council, AIA Council, AEC Council ) ក្របខ័ណ្ឌសហប្រតិបត្តិការកម្ពុជា ឡាវ មីយ៉ាន់ម៉ា និងវៀតណាម ( CLMV ) ក្របខ័ណ្ឌសហប្រតិបត្តិការទន្លេមេគង្គ ( AMBDC ) កិច្ចប្រជុំពិគ្រោះយោបល់រវាងរដ្ឋមន្ត្រីសេដ្ឋកិច្ចអាស៊ាន ជាមួយអគ្គនាយកអង្គការកម្មសិទ្ធិបញ្ញាពិភពលោក ( AEM-WIPO Consultations )។ល។
ក្រសួងពាណិជ្ជកម្ម ក៏បានប្រកាសថា ទន្ទឹមនឹងកិច្ចប្រជុំខាងលើនេះ ក៏នឹងមានព្រឹត្តិការណ៍ជំនួបកំពូលធុរកិច្ចអាស៊ាន-សហរដ្ឋអាមេរិក និងពិព័រណ៍ផលិតផលសម្លៀកបំពាក់ និងតម្បាញ ឆ្នាំ២០១២ របស់កម្ពុជាផងដែរ៕
