ភ្នំពេញ ៖ អង្គភាពអធិការកិច្ចនៃក្រុមប្រឹក្សាវិន័យរបស់ឧត្តមក្រុមប្រឹក្សានៃអង្គចៅក្រមបានចាប់ផ្ដើមប្រជុំលើកទី១របស់ខ្លួននៅព្រឹកថ្ងៃទី១៧ ខែកញ្ញា ឆ្នាំ២០១២បន្ទាប់ពីមានសេចក្ដីសម្រេចរបស់សហប្រធានក្រុមប្រឹក្សាកំណែទម្រង់ច្បាប់ និង ប្រព័ន្ធយុត្តិធម៌លើសំណើធ្វើអនុក្រិតថ្មីដើម្បីកែសម្រួលឲ្យជំនួយការក្រុមប្រឹក្សាវិន័យក្លាយជាអង្គភាពអធិការកិច្ចអាចបំពេញភារកិច្ចរបស់ខ្លួនឲ្យមានប្រសិទ្ធភាពខ្ពស់ និងតម្លាភាព។
អង្គភាពអធិការកិច្ចនៃក្រុមប្រឹក្សាវិន័យរបស់ឧត្តមក្រុមប្រឹក្សានៃចៅក្រមដែលចាប់ដំណើរការប្រជុំរបស់ខ្លួនរួមមានសមាសភាពចំនួន២២រូបក្នុងនោះមានឯកឧត្តម ជីវ កេង ជាសមាជិកឧត្តមក្រុមប្រឹក្សានៃអង្គចៅក្រម ជាប្រធានសាលាដំបូងរាជធានីភ្នំពេញ ជាប្រធានអង្គភាពអធិការកិច្ច លោកប៉ាល់ ច័ន្ទតារា មេធាវី តំណាងរាជរដ្ឋាភិបាលជាអនុប្រធាន និង លោក សេង ប៊ុនឃាង ជាអគ្គព្រះរាជអាជ្ញាមហាអយ្យអមតុលាការកំពូលជាអនុប្រធាន សមាជិកចំនួន១៦រូបជាចៅក្រម ព្រះរាជអាជ្ញាដែលមានបទពិសោធន៍ការងារ លេខាធិការ១រូប និង ជំនួយការ២រូបរួមទាំងមន្ត្រីជំនួយការឧត្តមក្រុមប្រឹក្សានៃអង្គចៅក្រមមួយចំនួនទៀត។
ឯកឧត្តម ជីវ កេង ដែលជាប្រធានអង្គការអធិការកិច្ចបានលើកឡើងថា គោលបំណង និងមូលហេតុចាំបាច់ដើម្បីបង្កើតឲ្យមានអង្គភាពអង្គភាពនេះឡើងដើម្បីអនុវត្តតាមយុទ្ធសាស្ត្រចតុកោណរបស់រាជរដ្ឋាភិបាលអាណត្តិទី៤ ស្ដីពីកំណែទម្រង់ច្បាប់ និង ប្រព័ន្ធយុត្តិធម៌ ក្នុងគោលដៅធ្វើឲ្យប្រសើរឡើងនូវគុណភាពនៃដំណើររឿងក្ដី សេវាពាក់ព័ន្ធ និងការពង្រីកប្រសិទ្ធភាពការងារឲ្យកាន់តែប្រសើរឡើង។
ធ្វើយ៉ាងណាពង្រឹងស្ថាប័នវិស័យច្បាប់ និងតុលាការឲ្យបំពេញអាណត្តិរបស់ខ្លួនឲ្យបានសម្រេចប្រកបដោយប្រសិទ្ធភាព និងតម្លាភាព ដោយសារតែកន្លងមកនៅពេលដែលច្បាប់ស្ដីពីការប្រឆាំងអំពើពុករលួយចូលជាធរមាននៅខែសីហា ឆ្នាំ២០១០ មានចៅក្រមតុលាការ និង ព្រះរាជអាជ្ញាខ្លះត្រូវផ្ដន្ទាទោស ហើយខ្លះទៀតត្រូវប្រឈមនឹងការចោទប្រកាន់នៅពេលខាងមុខ។
ឯកឧត្តមប្រធានអង្គការអធិការកិច្ចបានលើកឡើងទៀតថា ការបង្កើតអង្គភាពអធិការកិច្ចនេះគឺសំដៅដើម្បីអប់រំណែនាំដាក់វិន័យចៅក្រម ព្រះរាជអាជ្ញា មន្ត្រីតុលាការជាការការបង្ការមុនដើម្បីចៀសវាងកុំឲ្យមានបទល្មើស និង ទទួលការផ្ដន្ទាទោស។ ការលើកកម្ពស់ក្រមសីលធម៌ សមត្ថភាព និង សេចក្ដីថ្លៃថ្នូររបស់ចៅក្រម ព្រះរាជអាជ្ញាឲ្យក្លាយជាទីទំនុកចិត្តរបស់ប្រជាពលរដ្ឋ គឺជាអាទិភាពចំបងនៅក្នុងចក្ខុវិស័យនៃកំណែទម្រង់ច្បាប់ក្នុងប្រព័ន្ធយុត្តិធម៌របស់កម្ពុជា។
ដូច្នេះអង្គភាពអធិការកិច្ចនៃឧត្តមក្រុមប្រឹក្សាអង្គចៅក្រមត្រូវឆ្លងកាត់ការលំបាកជាច្រើនដែលពិបាកឈានទៅរកជោគជ័យ។ ដូច្នេះការចាំបាច់អង្គភាពត្រូវតែបង្កើតគណៈកម្មការមួយរៀបចំបទបញ្ជាផ្ទៃក្នុងតាមមាត្រា៦ នៃអនុក្រិតចាត់តាំងក្រុមការងារជា៣ក្រុម ក្នុងចំណោមសមាជិក និង មន្ត្រីជំនួយការចុះតាមតុលាការខេត្ត ក្រុង រាជធានី និងដោះស្រាយរាល់ពាក្យបណ្ដឹងឲ្យបានឆាប់ និង មានប្រសិទ្ធភាព ហើយមន្ត្រីដែលចុះបំពេញភារកិច្ចធ្វើអធិការកិច្ចត្រូវធានាបាននូវភាពស្អាតស្អំមិនឲ្យពាក់ព័ន្ធផលប្រយោជន៍ក្នុងការបំពេញការងារទាំងអស់ធ្វើយ៉ាងណារកឲ្យឃើញនូវការពិត និងមានដំណោះស្រាយឲ្យបានទាន់ពេលវេលារាល់បាតុភាពដែលកើតមាននៅតាមសាលាជម្រះក្ដី៕