ខេត្ដតាកែវ ៖ សមត្ថកិច្ចនគរបាលខេត្ដតាកែវនៅមិនទាន់ទាញបិទសំណុំរឿងករណីមន្ដ្រីថ្នាក់ឡូសនៅខេត្ដតាកែវ ប្រើកាំភ្លើងថ្លៃបាញ់បោះនៅក្នុងហាង ខារ៉ាអូខេនោះនៅឡើយទេ។ យ៉ាងណាក៏ដោយ ខាងជនរងគ្រោះមិនព្រមសហការជាមួយសមត្ថកិច្ចដើម្បីបន្ដសំណុំរឿងនេះឡើយ។ មានមូលហេតុ២ដែលជន រងគ្រោះមិនព្រមសហការជាមួយសមត្ថកិច្ចនោះ គឺការសម្របសម្រួលក្រៅប្រព័ន្ធតុលាការ និងការខ្លាចរអា ពីព្រោះមុខរបររកស៊ីរបស់ខ្លួនត្រូវពឹងពាក់ខ្នងបង្អែកអ្នកធំ។
យ៉ាងណាក៏ដោយលោក អ៊ុក សំណាង ស្នងការនគរបាលខេត្ដតាកែវ ត្រូវបានប្រភពពីវិទ្យុមួយផ្សាយថា សមត្ថកិច្ចនៅមិនទាន់បញ្ចប់សំណុំរឿងក្រុមលោក ឡាយ វណ្ណៈ អភិបាលរងខេត្ដតាកែវដែលបាញ់ម្ចាស់ហាងបណ្ដាលឱ្យរបួសនោះនៅឡើយទេ។ លោកអះអាងថា ការយឺតយ៉ាវដោយសារតែជនរងគ្រោះបានទៅ ព្យាបាលនៅប្រទេសវៀតណាម ហើយមិនទាន់សហការពេញលេញជាមួយ សមត្ថកិច្ចនៅឡើយ។
ជនរងគ្រោះត្រូវគេដឹងថា ឈ្មោះ មាស សុថុន បានរងរបួសដោយគ្រាប់ កាំភ្លើងដែលក្រុមលោកឡាយ វណ្ណៈ បាន បាញ់។ ប្រភពខុសៗគ្នាដែលគ្រួសារជន រងគ្រោះខ្លះនិយាយថា លោកមាស សុថុន កំពុងសម្រាកព្យាបាលរបួសនៅក្នុងផ្ទះ របស់ខ្លួន ប៉ុន្ដែប្រភពពីសាច់ញាតិជនរង គ្រោះអះអាងថាលោក មាស សុថុន កំពុងសម្រាកព្យាបាលនៅប្រទេសវៀត ណាម។ ការដែលជនរងគ្រោះចេញទៅ ព្យាបាលនៅប្រទេសវៀតណាមព្រោះ ស្ថានភាពមុខរបួសកាន់តែរីករាលដាល ខ្លាំងឡើងៗ។
ប្រភពពីសមត្ថកិច្ចខេត្ដតាកែវបាន ឱ្យដឹងថា លោកឡាយ វណ្ណៈ បានប្រើ ប្រាស់អាវុធខ្លីមួយដើមដែលមានតម្លៃ ៨ពាន់ដុល្លារ ហើយគ្រាប់នៅពេលដែល បាញ់បង្កឱ្យរបួសហើយនោះ មិនងាយ នឹងព្យាបាលឱ្យជាសះស្បើយនោះឡើយ។ វិធីតែម្យ៉ាង ប្រសិនបើគ្រាប់ត្រូវជើង ត្រូវតែកាត់ជើង ឬបើត្រូវដៃ ត្រូវតែ កាត់ដៃ ។ ប្រភពពីអ្នកដែលធ្លាប់ឃើញ កាំភ្លើងលោក ឡាយ វណ្ណៈ អះអាងថា កាំភ្លើងដែលមានតម្លៃថ្លៃនោះ គ្រាប់ របស់វាមានរសជាតិប្រៃ ដែលធ្វើឱ្យមុខ របួសស្អុយរលួយ ហើយគេចមិនផុតពី ត្រូវកាត់ដៃ ឬកាត់ជើងដើម្បីកុំឱ្យមុខ របួសរាលដាល។
ប្រភពពីមន្ដ្រីនគរបាលដែលដឹងរឿង ហេតុបានឱ្យដឹងថា ករណីដែលបណ្ដាល ឱ្យមានការផ្ទុះអាវុធ មិនមែនជាការ បង្ហាញកាំភ្លើងថ្លៃៗបង្អួតគ្នានោះទេ ។ ក៏ ប៉ុន្ដែលោកឡាយ វណ្ណៈ ត្រូវគេរាយការណ៍ ថា បានពេញចិត្ដនឹងនារីខារ៉ាអូខេម្នាក់ ដែលធ្វើការនៅក្នុងហាងរស្មីអង្គរ ហើយ បានហៅនាងមកអង្គុយកំដរ ប៉ុន្ដែនាង បដិសេធ។ សំដីបដិសេធរបស់ស្ដ្រីបម្រើ ខារ៉ាអូខេនៅក្នុងហាងរស្មីអង្គរ ធ្វើឱ្យលោក ឡាយ វណ្ណៈ ក្ដៅដល់បេះដូងចេញកំសួល ខឹង ក៏ទាញកាំភ្លើងថ្លៃ៨ពាន់ដុល្លារបាញ់ ប្រហារឱ្យដឹងថា អញអភិបាលរងខេត្ដ គ្រាន់តែហៅនាងឯងមកអង្គុយជិតអញ មិនបានឬ?
បន្ទាប់ពីហេតុការណ៍ផ្ទុះអាវុធ ក៏ មានការសម្របសម្រួល។ រីឯម្ចាស់ហាង ដោយខ្លាចអំណាចលោកអភិបាលរងខេត្ដ និងយល់មុខដល់លោកស៊ូ ភិរិន្ទ អតីត ចៅហ្វាយខេត្ដដែលជាឪពុកក្មេកជនបង្ក ផងនោះ ក៏សុខចិត្ដនៅស្ងៀម និងម្យ៉ាង ទៀតយល់ឃើញថា មុខរបួសទំនងដូច ជាមិនធ្ងន់ ក៏ទទួលយកការសម្របសម្រួល នោះទៅ។ ប៉ុន្ដែអំណាចនៃគ្រាប់កាំភ្លើង ដែលមានរសជាតិប្រៃ ធ្វើឱ្យមុខរបួស កាន់តែរីករាលដាលនោះ គេរាយការណ៍ថា ម្ចាស់ហាងដែលទទួលយល់ព្រមការ សម្របសម្រួលកំពុងខកចិត្ដ។
គួរបញ្ជាក់ថា រាត្រីម៉ោង១១ ថ្ងៃទី៣ ខែកញ្ញា ឆ្នាំ២០១២ អ្នកមុខអ្នកការ៤-៥ នាក់ដឹកនាំដោយលោកឡាយ វណ្ណៈ អភិ បាលរងខេត្ដតាកែវបានរៀបចំកម្មវិធី ផឹកស៊ីនៅក្នុងហាងរស្មីអង្គរ ដែលមាន ទីតាំងនៅភូមិស្នោ ក្រុងដូនកែវ ខេត្ដ តាកែវ ។ ការផឹកស៊ីមិនជាស្រវឹង រហូត ដល់ថ្នាក់វង្វេងបាត់ស្មារតី បណ្ដាលឱ្យ មានការបាញ់បោះនោះទេ ប៉ុន្ដែអ្វីដែល បណ្ដាលឱ្យមានការផ្ទុះអាវុធគឺសម្រស់ នារីខារ៉ាអូខេម្នាក់ ធ្វើឱ្យលោកឡាយ វណ្ណៈ ទប់អារម្មណ៍មិនបាន គួបផ្សំនឹង ការចង់បង្ហាញអំពីតម្លៃកាំភ្លើងរបស់ខ្លួន ផង និងយល់ថា អញជាអភិបាលរងខេត្ដ ផ្ទុះកាំភ្លើង១គ្រាប់មិនបានឬអី? ក៏បាញ់មួយគ្រាប់បណ្ដាលឱ្យមានរឿងដល់ថ្ងៃនេះទៅ។
រឿងស្រដៀងគ្នានេះដែរ បានកើតឡើងនៅឯកណ្ដាលទីរួមខេត្ដកំពង់ស្ពឺ ដែលបង្កឡើងដោយបុរសម្នាក់ជាស្នងការរងនគរ បាលខេត្ដជាមួយនឹងគូកន២នាក់ផ្សេង ទៀតចូលទៅផឹកស៊ីនៅហាងខារ៉ាអូខេ ហើយភ្លេចភ្លាំងសេចក្ដីថ្លៃថ្នូរ នាំគ្នាស្ទុះ ទៅចាប់ហែកអាវនារីខារ៉ាអូខេ រហូត ដល់មានការប្ដឹងផ្ដល់។ ទីបំផុតនារីខារ៉ា អូខេ ព្រមទទួលយកការសម្របសម្រួល ជាមួយនឹងទឹកប្រាក់១ពាន់ដុល្លារ។ មិន ដឹងថា ករណីខាងលើច្បាប់បញ្ចប់ត្រឹម សំណង១ពាន់ដុល្លារឬយ៉ាងណា?
ករណីលោក ឡាយ វណ្ណៈ ដែលបង្ក ឱ្យមានការភ្ញាក់ផ្អើលឬខូចមុខខូចមាត់ ប្រទេសជាតិ ជាបញ្ហាមួយដែលគេយល់ ថា ក្រសួងមហាផ្ទៃ មិនបណ្ដោយឱ្យ សំណុំរឿងនេះត្រូវបានបន្ដទុកឱ្យគេលាបពណ៌ ទៀតនោះឡើយ។ វាជាកំហុសបុគ្គល ដែលចាំបាច់ត្រូវតែកាត់សាច់ស្អុយនោះចោល ដូចដែលលោកឡាយ វណ្ណៈ ប្រើកាំភ្លើងថ្លៃបាញ់ត្រង់ណា កាត់សាច់ត្រង់នោះយ៉ាងដូច្នេះដែរ ៕