ភ្នំពេញ ៖ ក្នុងពេលចូលរួមជូនដំណើរដល់ក្រុមអ្នកទេសចរដោយរថយន្ដ និងក្រុមអ្នកសារព័ត៌មានចិន-អាស៊ានកាល ពីពេលថ្មីៗនេះ មន្ដ្រីជាន់ខ្ពស់នៃណៈកម្មាធិការជាតិអូឡាំពិកកម្ពុជា (NOCC) បានមានប្រសាសន៍ថា NOCC នៅឆ្នាំក្រោយ នឹងជំរុញឱ្យមានការចុះ MOU រវាងសហព័ន្ធយានយន្ដកម្ពុជានឹងសហព័ន្ធយានយន្ដខេត្ដគង់ស៊ូ ប្រទេសចិន និងជំរុញឱ្យមានការចូលរួមជារៀងរាល់ឆ្នាំទៀតផង ។
ព្រឹត្ដិការណ៍ខាងលើមានរថយន្ដចំនួន២៤គ្រឿង និងមានមនុស្សជាង១០០នាក់មកពីប្រទេស៨គឺ ចិន, កម្ពុជា, វៀតណាម, ឡាវ, ម៉ាឡេស៊ី, ឥណ្ឌូណេស៊ី សិង្ហបុរី និង ប្រទេសភូមាចូលរួម ។ ក្រៅពីការធ្វើទស្សនាចរណ៍នៅតាមតំបន់ទេសចរណ៍ របស់ប្រទេសដែលឆ្លងកាត់ក៏មានកម្មវិធី កីឡាជាលក្ខណៈប្រណាំងរថយន្ដផងដែរ។
លោក វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា បានឱ្យដឹងថា គណៈកម្មាធិការជាតិអូឡាំ ពិកកម្ពុជា(NOCC)នឹងជំរុញឱ្យមានការចុះអនុស្សរណៈយោគយល់មួយរវាង សហព័ន្ធយានយន្ដកម្ពុជានិងសហព័ន្ធយានយន្ដខេត្ដគង់ស៊ូនៃប្រទេសចិននៅ ឆ្នាំ២០១៣នេះដើម្បីបង្កើនចំណងទាក់ទង រវាងសហពន្ធ័ទាំង២និងដើម្បីលើកកម្ពស់វិស័យទេសចរណ៍បានមួយកម្រិតទៀត ។
លោកបានបញ្ជាក់ថា ការចុះ MOU នេះជាផ្នែកមួយជួយលើកស្ទួយវិស័យ ទេសចរណ៍កម្ពុជាយើងឱ្យមានការរីក ចម្រើនថែមទៀត ព្រោះថាព្រឹត្ដិការណ៍ ជួបជុំក្រុមអ្នកទេសចរដោយរថយន្ដ និងក្រុមអ្នកសារព័ត៌មានចិន-អាស៊ាន អន្ដរជាតិ រួមទាំងការប្រណាំងរថយន្ដ នេះវាអាចជួយឱ្យប្រទេសយើងមានការ រីកចម្រើនផ្នែកវិស័យទេសចរណ៍កាន់ តែខ្លាំង ។ ម្យ៉ាងកីឡាករនិងក្រុមអ្នកសារ ព័ត៌មានអន្ដរជាតិដែលឆ្លងកាត់ប្រទេសកម្ពុជានេះពួកគេបានផ្ដិតយករូបភាព ស្អាតៗទៅផ្សព្វផ្សាយនៅប្រទេសរបស់គេ និងថតយកទៅផ្សាយតាមទូរទស្សន៍ធំៗ នៅលើពិភពលោកពីទេសភាពបែបធម្មជាតិ និងជាប្រទេសដែលមានវប្បធម៌ ទេសចរណ៍ធម្មជាតិដ៏សម្បូរបែប ។
គួររំលឹកថា ក្រុមអ្នកទេសចរតាម រថយន្ដ និងការជួបជុំអ្នកសារព័ត៌មាន ចិន-អាស៊ាននេះបានចាប់ផ្ដើមនៅទីក្រុង ណាននីង ខេត្ដគង់ស៊ូ ប្រទេសចិន កាល ពីថ្ងៃទី១៥ ខែសីហា ឆ្នាំ២០១២ ហើយ បានបញ្ចប់ទៅវិញនៅថ្ងៃទី៧ ខែកញ្ញា ឆ្នាំ ២០១២ នៅកន្លែងដដែល ដោយបានឆ្លង កាត់ប្រទេសវៀតណាម, ឡាវ, ថៃ, ម៉ា- ឡេស៊ី, សិង្ហបុរី និងកម្ពុជា ៕