ភ្នំពេញ ៖ ប្រធានអង្គជំនុំជម្រះតុលាការកំពូល អ.វ.ត.ក. ដោយអនុលោមតាមវិធាន៨២ (៦) នៃវិធានផ្ទៃក្នុងសម្រេចលើសំណើរបស់សហព្រះរាជអាជ្ញា សូមផ្អាកសេចក្ដីសម្រេចដោះលែងជនជាប់ចោទ អៀង ធីរិទ្ធ ដោយគ្មានលក្ខខណ្ឌរបស់អង្គជំនុំជម្រះសាលាដំបូង ដោយសម្រេចថា ៖ អៀង ធីរិទ្ធ ត្រូវបានដោះលែងជាមួយលក្ខខណ្ឌបណ្ដោះអាសន្នមួយចំនួនដូចជា ៖
១-ជនជាប់ចោទត្រូវជូនដំណឹងដល់អង្គជំនុំជម្រះអំពីអាសយដ្ឋានដែលខ្លួន ត្រូវស្នាក់នៅហើយមិនត្រូវផ្លាស់ប្ដូរទីលំនៅដោយមិនមានការអនុញ្ញាតពីអង្គជំនុំជម្រះឡើយ។
២-ជនជាប់ចោទត្រូវប្រគល់លិខិតឆ្លងដែននិងឯកសារធ្វើដំណើរពាក់ព័ន្ធដទៃទៀត ហើយមិនត្រូវចេញក្រៅព្រំ ប្រទល់ដែនដីនៃព្រះរាជាណាចក្រកម្ពុជាឡើយ។
៣-ជនជាប់ចោទត្រូវគោរពតាមដីកាកោះដែលចេញដោយតុលាការ ។
វិធានការបណ្ដោះអាសន្ននេះមាន សុពលភាពរហូតដល់អង្គជំនុំជម្រះតុលា ការកំពូលចេញសេចក្ដីសម្រេចទាំងស្រុង លើបណ្ដឹងសាលទុក្ខរបស់សហព្រះរាជអាជ្ញា។
សេចក្ដីខាងលើនេះមានន័យថា ជនជាប់ចោទអៀង ធីរិទ្ធ បច្ចុប្បន្នអាយុ៨០ ឆ្នាំដែលជាអតីតរដ្ឋមន្ដ្រីក្រសួងសង្គមកិច្ចនៃរបបកម្ពុជាប្រជាធិបតេយ្យត្រូវ បានដោះលែងជាបណ្ដោះអាសន្នដែល ការដោះលែងត្រូវបានសម្រេចដោយ តុលាការកំពូលនៃសាលាក្ដីខ្មែរក្រហម នៅរសៀលថ្ងៃទី១៦ ខែកញ្ញា ឆ្នាំ២០១២។
មន្ដ្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា ថ្លែងថា បើទោះបីជាដោះលែងតាមសេចក្ដីសម្រេចរបស់ សាលាដំបូងក្ដី ក៏តុលាការកំពូលបានដាក់លក្ខខណ្ឌបណ្ដោះអាសន្នមួយចំនួនផងដែរ។ លក្ខខណ្ឌដូចដែលបានបង្ហាញនៅខាងលើ។
ការដោះលែងជនជាប់ចោទ អៀង ធីរិទ្ធ ឱ្យនៅក្រៅឃុំបានធ្វើឱ្យភាគីជនរង គ្រោះទាំងមេធាវីការពារក្ដីដើមបណ្ដឹង រដ្ឋប្បវេណី និងដើមបណ្ដឹងរដ្ឋប្បវេណី មានប្រតិកម្មភ្លាមៗស្រដៀងគ្នា។ ដើម បណ្ដឹងរដ្ឋប្បវេណីនិយាយថា ការដោះ លែងនេះ ជះឥទ្ធិពលខ្លាំងដល់សង្គមកម្ពុជា ពីព្រោះអៀង ធីរិទ្ធ ជាអ្នកដឹកនាំជាន់ខ្ពស់មួយរូបនៃរបបខ្មែរក្រហម។
ឮកាលពីថ្ងៃទី១៣ ខែកញ្ញា សាលាដំបូង អ.វ.ត.ក. បានសម្រេចដោះលែងជន ជាប់ចោទអៀង ធីរិទ្ធ ជាមួយការបញ្ជាក់ ហេតុផលថា ដោយសារតែជនជាប់ចោទ មានជំងឺវង្វេងវង្វាន់និងបាត់ការចងចាំ កាន់តែធ្ងន់ធ្ងរ មិនអាចចូលរួមតតាំង ក្ដីក្នុងអង្គសវនាការបាន ហើយស្ថានភាព បែបនេះមិនមានសញ្ញាណាមួយដែល ប្រសើរឡើងនោះឡើយ។
ការដោះលែងជនជាប់ចោទ អៀង ធីរិទ្ធ ត្រូវបានជំទាស់ដោយភាគីសហ ព្រះរាជអាជ្ញា ហើយបានប្ដឹងសាលទុក្ខ ទៅតុលាការកំពូល ដោយបានស្នើសុំដាក់លក្ខខណ្ឌ៦ចំណុច។
លក្ខខណ្ឌទាំងនោះរួមមាន ត្រូវមាន លំនៅឋានច្បាស់លាស់ដែលសហមេធាវី ការពារក្ដីត្រូវប្រាប់អំពីអាសយដ្ឋាន ឬ ត្រូវបង្ហាញខ្លួន១សបា្ដហ៍ម្ដងដើម្បីឱ្យ អាជ្ញាធរមានសមត្ថកិច្ច ឬមន្ដ្រីផ្លូវការ ចាត់ការដោយអ.វ.ត.ក.ពិនិត្យ, ត្រូវ ប្រគល់លិខិតឆ្លងដែន និងអត្ដសញ្ញាណ បណ្ណ, មិនត្រូវទាក់ទងភាគីផ្សេងៗទាំង អស់ដែលពាក់ព័ន្ធនឹងសំណុំរឿង លើក លែងតែស្វាមីនិងត្រូវស្ថិតនៅក្រោម ការពិនិត្យវេជ្ជសាស្ដ្រ ដោយអ្នកអនុវត្ដ ផ្នែកវេជ្ជសាស្ដ្រអ.វ.ត.ក.បានចាត់តាំង។
សហព្រះរាជអាជ្ញាបានលើកឡើងថា លក្ខខណ្ឌសម្រាប់ដោះលែងជនជាប់ចោទ អៀង ធីរិទ្ធ មិនត្រឹមតែគិតពីសិទ្ធិជនជាប់ ចោទទេ ប៉ុន្ដែត្រូវពិចារណាពីសិទ្ធិជនរង គ្រោះ ដែលជាដើមបណ្ដឹងរដ្ឋប្បវេណី រួមជាមួយសហព្រះរាជអាជ្ញា និងសហ គមន៍អន្ដរជាតិ ក៏ដូចជាកត្ដាផ្សះផ្សារ ជាតិ, ស្ថិរភាព, យុត្ដិធម៌, សុវត្ថិភាព និងសណ្ដាប់ធ្នាប់សាធារណៈ។
សហព្រះរាជអាជ្ញាក៏បានស្នើឱ្យសាលា ដំបូងផ្អាកការដោះលែងជនជាប់ចោទ អៀង ធីរិទ្ធ រហូតទាល់តែអង្គជំនុំជម្រះ តុលាការកំពូលសម្រេចបណ្ដឹងសាលទុក្ខ នេះសិន។ ស្របតាមវិធានផ្ទៃក្នុង តុលាការកំពូលមានពេល២ថ្ងៃ ឬ៤៨ម៉ោង សម្រាប់ពិនិត្យបណ្ដឹងសាលទុក្ខ និងរយៈ ពេល១៥ថ្ងៃសម្រាប់ធ្វើសេចក្ដីសម្រេច ជាចុងក្រោយ។ ដូច្នេះការដោះលែងជន ជាប់ចោទអៀង ធីរិទ្ធ បានធ្វើឡើងដោយ តុលាការកំពូល បន្ទាប់ពីរយៈពេល៤៨ម៉ោង តាមវិធានផ្ទៃក្នុងនៃអង្គជំនុំជម្រះវិសាមញ្ញក្នុងតុលាការកម្ពុជា ៕
