អ្នកគ្រប់គ្រងជាន់ខ្ពស់មកពីក្រុមហ៊ុន យូនីលីវើ ប្រចាំឥណ្ឌូចិន និង យូនីលីវើ ប្រចាំកម្ពុជា បានចូលជួបសម្តែងការគួរសមជាមួយ ឯកឧត្តម បណ្ឌិត ម៉ុក ម៉ារ៉េត ទេសរដ្ឋមន្ត្រី រដ្ឋមន្ត្រីក្រសួងបរិស្ថាន ដើម្បីពិភាក្សាអំពីវិធីសាស្ត្រផ្សេងៗក្នុងការអប់រំប្រជាពលរដ្ឋខ្មែរ ឲ្យយល់ដឹងអំពីការកាត់បន្ថយនៃការខ្ជះខ្ជាយទឹក។
នៅក្នុងជំនួបនោះ ឯកឧត្តមបណ្ឌិត ម៉ុក ម៉ារ៉េត និងអ្នកគ្រប់គ្រងជាន់ខ្ពស់របស់ យូនីលីវើ ក៏បានពិភាក្សាអំពីយុទ្ធសាស្ត្រនៃការផ្តល់ព័ត៌មានដល់ប្រជាពលរដ្ឋខ្មែរ អំពីវិធីកាត់បន្ថយផលប៉ះពាល់នៃបរិស្ថានផងដែរ។
នាយកគ្រប់គ្រង យូនីលីវើ ឥណ្ឌូចិន លោក Maks Mukundan បានមានប្រសាសន៍ថា “ក្រុមហ៊ុន យូនីលីវើ នៅទូទាំងពិភពលោក បានចាត់ទុកការរស់នៅប្រកបដោយនិរន្តរភាពជាស្នូលនៃទស្សនវិស័យរបស់ក្រុមហ៊ុន។ ដោយសារហេតុផលនេះ ទើបក្រុមហ៊ុនយល់ឃើញថា ជាការល្អបំផុត ដែលមានការជួបប្រជុំជាមួយក្រសួងបរិស្ថានដើម្បីពិភាក្សាអំពីគម្រោងនេះ”។
កាលពីខែវិច្ឆិកា ឆ្នាំ២០១០ ក្រុមហ៊ុន យូនីលីវើ នៅទូទាំងពិភពលោក បានដាក់ចេញនូវគម្រោងមួយ ហៅថា “ការរស់នៅប្រកបដោយនិរន្តរភាព” ដោយតម្រូវឲ្យក្រុមហ៊ុនអនុវត្តន៍ផែនការរយៈពេល១០ឆ្នាំមួយឆ្ពោះទៅរកការសម្រេចបាននូវកំណើនប្រកបដោយនិរន្តភាព។
គម្រោងនេះ គឺជាគំនិតផ្តួចផ្តើមផ្ទាល់របស់លោក Paul Polman នាយកប្រតិបត្តិរបស់ក្រុមហ៊ុន យូនីលីវើ ដែលបាននឹងកំពុងធ្វើការអំពាវនាវដល់រដ្ឋាភិបាល បណ្តាអាជីវកម្ម និងអង្គការនានា ដើម្បីធ្វើការរួមគ្នាកាត់បន្ថយបញ្ហា ដែលប្រឈមមុខសំខាន់បំផុត របស់ពិភពលោក។
ដោយគិតគូរដល់បញ្ហានេះ ក្រុមហ៊ុនទទួលខុសត្រូវចំពោះទាំងកិច្ចប្រតិបតិ្តការផ្ទាល់ខ្លួនផង និងទាំងប្រតិបត្តិការនៃអ្នកផ្គត់ផ្គង់ អ្នកចែកចាយ និងអ្នកប្រើប្រាស់ផលិតផលរបស់ខ្លួនផង។
នៅក្នុងប្រទេសកម្ពុជា ក្រុមហ៊ុន យូនីលីវើ បានរៀបចំកិច្ចពិភាក្សាជាមួយរាជរដ្ឋាភិបាលកម្ពុជា ស្តីអំពីគំនិតផ្តួចផ្តើមផ្សេងៗ ស្ដីពីការរស់នៅប្រកបដោយនិរន្តរភាព។ ការយកចិត្តទុកដាក់ជាជំហានដំបូងរបស់ក្រុមហ៊ុន គឺផ្ដោតទៅលើការកាត់បន្ថយការខ្ជះខ្ជាយទឹក។
លោក Mukundan បានបន្ថែមទៀតថា “ប្រទេសកម្ពុជានៅតែមានការនិយាយមិនដាច់អំពីគ្រោះរាំងស្ងួត បើទោះបីជាស្ថិតនៅក្នុងរដូវវស្សាក៏ដោយ ហេតុដូច្នេះទើបក្រុមហ៊ុនយើងផ្តោតសំខាន់ដំបូងគេ គឺការកាត់បន្ថយការប្រើប្រាស់ទឹកដោយខ្ជះខ្ជាយ។ គំនិតផ្តួចផ្តើមនេះ ស្របគ្នាជាមួយនឹងគំនិតផ្ដួចផ្តើមជាសាកលរបស់ក្រុមហ៊ុន យូនីលីវើ ដើម្បីកាត់បន្ថយការប្រើប្រាស់ទឹក ដែលពាក់ព័ន្ធ នឹងផលិតផលប្រើប្រាស់ ឲ្យបានពាក់កណ្តាលគិតត្រឹមឆ្នាំ ២០២០។ ហើយយើងចង់ឲ្យគម្រោងនេះសម្រេចបានដូចគ្នា នៅក្នុងប្រទេសកម្ពុជា”។
នៅក្នុងកិច្ចខិតខំប្រឹងប្រែងដើម្បីកាត់បន្ថយការខ្ជះខ្ជាយទឹក ក្រុមហ៊ុន យូនីលីវើ បានផលិតនូវផលិតផលជាច្រើនប្រភេទ ដែលមានគោលគំនិត ក្នុងការកាត់បន្ថយ ការប្រើប្រាស់ទឹករួចជាស្រេច។ ផលិតផលបែបនេះមួយ គឺផលិតផលទឹកក្រអូប COMFORT ONE RINSE ដែលអាចលាងសម្អាតសម្លៀកបំពាក់ ដោយប្រើប្រាស់ទឹកត្រឹមតែមួយធុងជាជាងបីធុង។ នេះជាផលិផលមួយក្នុងចំណោមផលិតផលដទៃទៀត ដែលក្រុមហ៊ុន យូនីលីវើ ផលិតឡើងដោយគិតគូរដល់បញ្ហានិរន្តរភាព។
ក្រុមហ៊ុន យូនីលីវើ គឺជាក្រុមហ៊ុនផ្គត់ផ្គង់ផលិតផលប្រើប្រាស់ឈានមុខគេមួយ នៅលើពិភពលោក ដែលមានប្រតិបតិ្តការរឹងមាំនៅក្នុងប្រទេសជាង ១០០ និងលក់ផលិតផលនៅក្នុងប្រទេសចំនួន ១៩០។ ផលិតផលរបស់ក្រុមហ៊ុន យូនីលីវើ ត្រូវបានប្រជាជនប្រើប្រាស់ជាង ២០០០លានដងក្នុងមួយថ្ងៃនៅទូទាំងពិភពលោក ហើយក្រុមហ៊ុនខិតខំដើម្បីបង្កើតអនាគតល្អប្រសើរជារៀងរាល់ថ្ងៃ និងជួយប្រជាជនឲ្យមាន អារម្មណ៍ល្អ មានសម្ផស្សស្រស់ស្អាត និងរីករាយនឹងជីវភាពរស់នៅជាមួយនឹងផលិតផល និងសេវាដែលល្អសម្រាប់ខ្លួនឯងផង និងល្អសម្រាប់អ្នកដទៃផង។
ក្រុមហ៊ុន យូនីលីវើ ចាប់ផ្តើមប្រតិបត្តិការនៅក្នុងប្រទេសកម្ពុជាតាំងពីខែវិច្ឆិកា ឆ្នាំ២០០៣។ ក្រុមហ៊ុនមានមោទនភាពក្នុងការដើរតួនាទីសកម្មនៅក្នុងសង្គមកម្ពុជា ស្ទើរតែគ្រប់វិស័យ ក្នុងនោះមានតាំងពីការផ្គត់ផ្គង់ផលិតផលអាហារបំប៉ន រហូតដល់ផលិតផលលើកកម្ពស់អនាម័យ៕