ភ្នំពេញ: អគ្គលេខាធិការ គ.ជ.ប. លោក ទេព នីថា បានគូសបញ្ជាក់ជាថ្មីថា យោងតាមច្បាប់បោះឆ្នោត ទណ្ឌិត ឬអ្នកដែលតុលាការសម្រេចផ្តន្ទាទោស មិនអាចចុះឈ្មោះបោះឆ្នោត និងមិនអាចឈរឈ្មោះឲ្យគេបោះឆ្នោតបានទេ កុំថាឡើយមានបំណងឈរឈ្មោះជាបេក្ខជននាយករដ្ឋមន្ត្រី សម្រាប់ការបោះឆ្នោតជាតិ នៅឆ្នាំ២០១៣នោះ។ ការលើកឡើងដូច្នេះរបស់អគ្គលេខាធិការ គ.ជ.ប. គឺបានសំដៅទៅកាន់លោក សម រង្ស៊ី ដែលត្រូវបានតុលាការកម្ពុជាផ្តន្ទាទោស ក្នុងរឿងដកតម្រុយបង្គោលព្រំដែនកម្ពុជា-វៀតណាម កាលពីចុងឆ្នាំ២០០៩។
គណបក្សសង្គ្រោះជាតិ ដែលមានលោក សម រង្ស៊ី ជាប្រធាន និងរួមគ្នាបង្កើតដោយគណបក្សសមរង្ស៊ី និងគណបក្សសិទ្ធិមនុស្ស របស់លោក កឹម សុខា ត្រូវបានទទួលស្គាល់តាមច្បាប់ ស្តីពី គណបក្សនយោបាយ ដើម្បីឈានទៅចុះបញ្ជីត្រឹមត្រូវ ជាផ្លូវការ នៅក្រសួងមហាផ្ទៃ កាលពីដើមសប្តាហ៍នេះ។
សមាជិកគណបក្សសមរង្ស៊ី និងគណបក្សសិទ្ធិមនុស្ស ដោយរាប់ទាំងលោកសមរង្ស៊ី និងលោកកឹមសុខា នឹងឈរឈ្មោះក្នុងគណបក្សសង្គ្រោះជាតិ ដើម្បីចូលរួមការបោះឆ្នោតតំណាងរាស្ត្រ អាណត្តិទី៥ នៅថ្ងៃទី២៨ ខែកក្កដា ឆ្នាំ២០១៣។
យ៉ាងណាក៏ដោយ អគ្គលេខាធិការ គ.ជ.ប. បានថ្លែងប្រាប់ CEN នៅព្រឹកថ្ងៃទី១ ខែកញ្ញា ឆ្នាំ២០១២ ថា "ករណីដែលគណបក្ស ត្រូវបានទទួលស្គាល់ជាផ្លូវការ នៅក្រសួងមហាផ្ទៃរួចហើយនោះ គណបក្សមានសិទ្ធិ ស្នើសុំចុះបញ្ជីបេក្ខជន នៅ គ.ជ.ប. ហើយនៅពេលនោះ គ.ជ.ប. នឹងពិនិត្យមើលបញ្ជីឈ្មោះ ក្នុងចំណោមបេក្ខជន ដែលគណបក្សដាក់មក ហើយក្នុងករណីបេក្ខជន មានជាប់ឈ្មោះ ជាទណ្ឌិត គឺ គ.ជ.ប. នឹងធ្វើការបដិសេធឈ្មោះបេក្ខជននោះ ចេញពីបញ្ជីឈរឈ្មោះ ដែលជាបេក្ខជនបោះឆ្នោត"។
បន្ទាប់ពីទទួលយកសំណុំឯកសារ ស្នើសុំចុះបញ្ជីគណបក្សសង្គ្រោះជាតិ ជាថ្មីម្តងទៀត កាលពីថ្ងៃទី២៤ ខែសីហា ឆ្នាំ២០១២ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានចុះហត្ថលេខា ទទួលស្គាល់ការស្នើសុំបង្កើតគណបក្សសង្គ្រោះជាតិ កាលពីថ្ងៃទី៣០ ខែសីហា ឆ្នាំ២០១២។ ក៏ប៉ុន្តែក្នុងលិខិតនោះ លោករដ្ឋមន្ត្រីក្រសួងមហាផ្ទៃ បានជំរាបជូនលោក ប៉ុល ហំម អនុប្រធានគណៈកម្មាធិការបណ្តោះអាសន្ន នៃគណបក្សសង្គ្រោះជាតិ ឲ្យបំពេញបែបបទបន្ថែម ដោយមានទាំងការដាក់នូវស្នាមមេដៃ សមាជិកគាំទ្រចំនួន ៤.០០០ នាក់ ទៅកាន់ក្រសួងមហាផ្ទៃ សម្រាប់មានសុពលភាព និងទទួលបានការចុះបញ្ជីបង្កើតគណបក្សសង្គ្រោះជាតិ ជាផ្លូវការ ស្របតាមច្បាប់ស្តីពីគណបក្សនយោបាយ។
តាមគោលការណ៍ឯកភាពគ្នារវាងលោកសមរង្ស៊ី និងលោកកឹមសុខា គឺលោក សម រង្ស៊ី នឹងក្លាយទៅជាប្រធានគណបក្សសង្គ្រោះជាតិ និងជាបេក្ខភាពនាយករដ្ឋមន្ត្រី សម្រាប់ការចូលរួមប្រកួតប្រជែង ក្នុងការបោះឆ្នោតជ្រើសតាំងតំណាងរាស្ត្រ ឆ្នាំ២០១៣ នៅថ្ងៃទី២៨ ខែកក្កដា ឆ្នាំ២០១៣។
ក៏ប៉ុន្តែបើពិនិត្យតាមច្បាប់ ស្តីពី ការបោះឆ្នោតជ្រើសតាំងអ្នកតំណាងរាស្ត្រ គឺលោកសមរង្ស៊ី ដែលត្រូវបានតុលាការ កាត់ទោសដាក់ពន្ធនាគារកំបាំងមុខ រយៈពល ២ឆ្នាំ ក្នុងរឿងដកតម្រុយបង្គោលព្រំដែនកម្ពុជា-វៀតណាម នៅខេត្តស្វាយរៀងនោះ គឺលោកសមរង្ស៊ី មិនអាចឈរឈ្មោះឲ្យគេបោះឆ្នោតជាតំណាងរាស្ត្របានទេ កុំថាឡើយឈរឈ្មោះជាបេក្ខជននាយករដ្ឋមន្ត្រី។
ក៏ប៉ុន្តែនៅពេលនេះ លោកសមរង្ស៊ី និងលោកកឹមសុខា កំពុងធ្វើសកម្មភាពការទូត ក្រៅផ្លូវការ នៅក្រៅប្រទេស ដើម្បីកៀងគរឲ្យម្ចាស់ជំនួយ និងអ្នកការទូតប្រទេសមហាអំណាច ធ្វើអន្តរាគមន៍ មកលើរាជរដ្ឋាភិបាលកម្ពុជា រកផ្លូវឲ្យលោកសមរង្ស៊ី មានឱកាសវិលចូលមកកម្ពុជា ដោយមិនជាប់ទោស ដើម្បីធ្វើការប្រកួតប្រជែង ក្នុងការបោះឆ្នោតជ្រើសតាំងអ្នកតំណាងរាស្ត្រនៅឆ្នាំ២០១៣។
យុទ្ធនាការនៅក្រៅប្រទេសរបស់មេដឹកនាំគណបក្សសមរង្ស៊ី និងគណបកសិទ្ធិមនុស្ស ក្នុងនាមចលនាប្រជាធិបតេយ្យសង្គ្រោះជាតិ ក៏ដើម្បីទាមទារឲ្យមានការផ្លាស់ប្តូរសមាសភាព ក្បាលម៉ាស៊ីនដឹកនាំស្ថាប័នរៀបចំការបោះឆ្នោត គ.ជ.ប. ផងដែរ។
ក៏ប៉ុន្តែមន្ត្រីជាន់ខ្ពស់រាជរដ្ឋាភិបាលកម្ពុជា បានបញ្ជាក់ជាច្រើនលើកច្រើនសាមកហើយថា ប្រទេសកម្ពុជា គឺជារដ្ឋឯករាជ្យ មានអធិបតេយ្យភាពពេញលេញ។ ដូច្នេះ ពុំអាចមានបរទេសណាមួយ មកដាក់ការគាបសង្កត់ផ្នែកការទូត ឬការគាបសង្កត់ផ្នែកនយោបាយ និងសេដ្ឋកិច្ចណាមួយ មកលើរាជរដ្ឋាភិបាលកម្ពុជាបានទេ ជាពិសេសក្នុងករណីលោក សម រង្ស៊ី ដែលបានប្រព្រឹត្តបទព្រហ្មទណ្ឌ មិនមែនជាករណីនយោបាយ ដូចការយល់ឃើញរបស់ក្រុមគណបក្សប្រឆាំង និងអង្គសង្គមស៊ីវិល ព្រមទាំងមហាជនមួយចំនួននោះឡើយ៕
