ភ្នំពេញ ៖ សម្ដេចតេជោហ៊ុន សែនបានថ្លែងក្នុងពិធីចែកសញ្ញាបត្រដល់និស្សិតសកលវិទ្យាល័យឯកទេសនៃកម្ពុជាថា រដ្ឋធម្មនុញ្ញមាត្រាទី២ អាចនឹងត្រូវសិក្សាពិចារណាធ្វើវិសោធនកម្មនៅពេលខាងមុខ។
សម្ដេចតេជោថ្លែងទៀតថា បន្ទាប់ពីវិលត្រឡប់មកពីប្រទេសអ៊ីរ៉ង់ និងប្រទេសចិនវិញ សម្ដេចបានជួបជាមួយឧបនាយករដ្ឋមន្រ្តីប្រចាំការនៃប្រទេសវៀតណាមពិភាក្សាគ្នាលើបញ្ហាមួយចំនួន។ លោកឧបនាយករដ្ឋមន្រ្តីប្រចាំការវៀតណាមបានលើកជាចម្ងល់ថា តើផ្ទៃដីជាង៣០០គីឡូម៉ែត្រការ៉េដែលសម្ដេចតេជោលើកឡើងថាជាផ្ទៃដីដែលលើសពីផែនទីនោះយ៉ាងម៉េចដែរ? តើជាផ្ទៃដីដែលបានមកពីប្រទេសជិតខាងឬយ៉ាងណា?
សម្ដេចតេជោបានបង្ហាញថា ផ្ទៃដីទាំងជាង៣០០គីឡូម៉ែត្រការ៉េដែលលើសនោះ ជាផ្ទៃដីសល់ពីបញ្ហាវាស់វែងពីជំនាន់មុន ដែលធាតុពិតជាក់ស្ដែងផ្ទៃដីនោះបើប្រើប្រាស់ឧបករណ៍ទំនើបវាស់វែងនាពេលបច្ចុប្បន្នមានចំនួនច្រើនជាង៣០០គីឡូម៉ែត្រការ៉េ ធៀបជាមួយនឹងផ្ទៃដីលើផែនទី។
សម្ដេចតេជោថ្លែងទៀតថា យើងនឹងសិក្សាពិចារណាអំពីការធ្វើវិសោធនកម្មមាត្រាទី២ នៃរដ្ឋធម្មនុញ្ញពាក់ព័ន្ធនឹងបញ្ហានេះផងដែរ៕
ស្នាយពល