ភ្នំពេញ: ប្រមុខដឹកនាំប្រទេសកម្ពុជា និងចិន ដែលជាដៃគូយុទ្ធសាស្ត្រគ្រប់ជ្រុងជ្រោយនោះ បានជួបពិភាក្សាការងារជាមួយគ្នា កាលពីថ្ងៃទី២ ខែកញ្ញា ឆ្នាំ២០១២ នៅឯប្រទេសចិន។
លោក អូន ព័ន្ធមុនីរ័ត្ន រដ្ឋមន្ត្រីប្រតិភូអមនាយករដ្ឋមន្ត្រី បានមានប្រសាសន៍ ប្រាប់ក្រុមអ្នករាយការណ៍ព័ត៌មាន កាលពីរសៀលថ្ងៃទី៣ ខែកញ្ញា ឆ្នាំ២០១២ នៅព្រលានយន្តហោះអន្តរាជាតិភ្នំពេញថា នៅក្នុងកិច្ចពិភាក្សារវាងសម្តេចតេជោ ហ៊ុន សែន នាយករដ្ឋមន្ត្រី នៃប្រទេសកម្ពុជា ជាមួយលោក វេន ជាបាវ នាយករដ្ឋមន្ត្រីប្រទេសចិននោះ គឺនាយករដ្ឋមន្ត្រីចិន បានបញ្ជាក់ថា បញ្ហាសមុទ្រចិន គឺចិនបន្តការពិភាក្សាជាមួយអាស៊ាន និងចិននឹងអនុវត្ត DOC ឲ្យបានគ្រប់ជ្រុងជ្រោយ ហើយចិននឹងដោះស្រាយបញ្ហាសមុទ្រចិន ដោយសន្តិវិធីជាមួយបណ្តាប្រទេស ដែលពាក់ព័ន្ធ ក្នុងជម្លោះសមុទ្រចិនខាងត្បូងនោះ ផងដែរ។
សូមបញ្ជាក់ថា នាយករដ្ឋមន្ត្រីចិន បានអរគុណប្រទេសកម្ពុជា ចំពោះការគាំទ្ររបស់ខ្លួន នៅក្នុងប្លុកតំបន់អាស៊ីភាគអាគ្នេយ៍ បន្ទាប់ពីមានភាពតានតឹងរវាងរដ្ឋាភិបាលក្រុងប៉េកាំង និងបណ្តាប្រទេស មួយចំនួនអំពីជម្លោះទឹកដីនៅសមុទ្រចិនខាងត្បូង។
ទីភ្នាក់ងារ សារព័ត៌មានស៊ីនហួរបស់ចិន បាននិយាយថា លោក វេន ជាបាវ នាយករដ្ឋមន្ត្រីចិន បានថ្លែងទៅកាន់នាយករដ្ឋមន្ត្រីកម្ពុជា សម្តេច ហ៊ុន សែន នៅក្នុងកិច្ចប្រជុំមួយកាលពីថ្ងៃអាទិត្យថា ចិននឹងបង្កើន និងលើកស្ទួយកិច្ចសហប្រតិបត្តិការកាន់តែជិតស្និទ្ធជាមួយប្រទេសកម្ពុជា។
កាលពីពាក់កណ្តាលខែកក្កដា ក្រុមរដ្ឋមន្ត្រីការបរទេសនៃសមាគមនៃប្រជាជាតិអាស៊ីភាគអាគ្នេយ៍ អាស៊ាន ដែលមានប្រទេសជាសមាជិក១០ប្រទេស ដោយមានកម្ពុជាជាប្រធានមិនអាចសម្រេចបានសេចក្តីថ្លែងការណ៍រួមនោះទេ បន្ទាប់ពីកិច្ចប្រជុំប្រចាំឆ្នាំ នៅភ្នំពេញ។
សេចក្តីរាយការណ៍ បានលើកឡើងថា ប្រទេសកម្ពុជា ដែលជាម្ចាស់ផ្ទះនៃកិច្ចប្រជុំនេះ បានច្រានចោលសំណើមួយ ដែលត្រូវបានលើកឡើង ដោយប្រទេសហ្វីលីពីន និងប្រទេសវៀតណាម ដើម្បីនិយាយអំពីជម្លោះទឹកដីរបស់ពួកគេ ជាមួយប្រទេសចិន នៅក្នុងឯកសារនៃកិច្ចប្រជុំនេះ។
ទីភ្នាក់ងារសារព័ត៌មាន ស៊ីនហួ បានបន្ថែមថា លោក វិន ជាបាវ បានអរគុណប្រទេសកម្ពុជា ចំពោះតួនាទីដ៏សំខាន់របស់ខ្លួន ក្នុងការប្រកាន់ភ្ជាប់ទំនាក់ទំនងមិត្តភាពជារួម ក្នុងស្ថានភាពជាទូទៅ រវាងចិន និងអាស៊ាន៕