ដោយ ៖ សុខ ខេមរា
ភ្នំពេញ ៖ កាលពីវេលាម៉ោង៨ព្រឹក ថ្ងៃទី៤ ខែកញ្ញា ឆ្នាំ២០១២ នាយឧត្ដមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសបានអញ្ជើញជាអធិបតីភាពក្នុងពិធីបិទវគ្គបំប៉នជំនាញការងារការពារសន្ដិសុខជំនាន់ទី២ នៅសាលាកងរាជអាវុធហត្ថ (កំបូល) ដែលពិធីនេះមានការចូលរួមពីសិក្ខាកាម ជានាយ នាយរង កងរាជអាវុធហត្ថ និងថ្នាក់ដឹកនាំកងរាជអាវុធហត្ថជាច្រើននាក់ទៀត ។
នាយឧត្ដមសេនីយ៍ សៅ សុខា បានវាយតម្លៃខ្ពស់ចំពោះលទ្ធផលនៃការសិក្សាខិតខំប្រឹងប្រែងរបស់សិក្ខាកាមប្រកបដោយឆន្ទៈ មនសិការនិងស្មារតីទទួលខុសត្រូវក្នុងការបំពេញតួនាទី-ភារកិច្ច របស់នាយ នាយរងកងរាជអាវុធហត្ថដែលបានបម្រើការងារគ្រប់ផ្នែក និងវាយតម្លៃខ្ពស់ចំពោះការខិតខំប្រឹងប្រែងរបស់យោធាចារ្យ ដែលបានអញ្ជើញមកស្នងការការពារសន្ដិសុខនៃអគ្គស្នងការនយោបាយក្រសួងការពារប្រទេស នៃសាធារណរដ្ឋសង្គមនិយមវៀតណាម ។
នាយឧត្ដមសេនីយ៍ សៅ សុខា បានបញ្ជាក់ថា “ខ្ញុំគិតថា នេះគឺជាមូលដ្ឋានគ្រឹះដ៏សំខាន់នៃការងារការពារសន្ដិសុខ ព្រោះថា ព័ត៌មានដែលទទួលបានច្បាស់លាស់ ត្រឹមត្រូវល្អ ហើយប្រាកដប្រជា គឺជាកត្ដាដែលធានាឱ្យប្រតិបត្ដិការទទួលបានជោគជ័យ ។ ដូច្នេះឆ្លងកាត់ការសិក្សា និងបទពិសោធន៍កន្លងមក ដើម្បីទទួលបានព័ត៌មានមួយ ដែលមានភាពត្រឹមត្រូវច្បាស់លាស់ គឺចាំបាច់យើងត្រូវកសាងកម្លាំងភ្នាក់ងារមួយដែលមានឆន្ទៈ មានការលះបង់ ស្មោះត្រង់ និងមានការយល់ដឹងពីភារកិច្ចរបស់ខ្លួន ។ ដូច្នេះការងារព័ត៌មាន គឺជារឿងដែលលំបាកស្មុគ្រស្មាញហើយរសើបបំផុត ប៉ុន្ដែចំណុចដែលលំបាកហើយសំខាន់ជាងនេះទៅទៀតគឺ ការងារគ្រប់គ្រងកម្លាំង ការងារគ្រប់គ្រងព័ត៌មានឱ្យបានគត់មត់ ដើម្បីធានាថា ព័ត៌មាននោះមានសន្ដិសុខ មានសុវត្ថិភាពល្អ មិនត្រូវបានបែកធ្លាយ ។
នាយឧត្ដមសេនីយ៍ ក៏បានផ្ដាំផ្ញើនិងលើកកម្ពស់ចំពោះការវិវឌ្ឍទៅមុខនៃនាយ នាយរងកងរាជអាវុធហត្ថដែលបានខិតខំសិក្សាក្នុងវគ្គនេះ ប្រាកដជាយកចំណេះដឹងទៅបំពេញការងារឱ្យមានការវិវឌ្ឍ ប្រកបដោយសក្ដានុពលនៃសភាពការណ៍សន្ដិសុខនៅកម្ពុជា ក៏ដូចជាក្នុងតំបន់ និងសកលលោក និងដើម្បីបំពេញភារកិច្ចទទួលបានជោគជ័យ៕