បន្ទាយមានជ័យ: គណបក្សហ្វ៊ុនស៊ិនប៉ិច បានសម្រេចទទួលសមាជិក នៃគណបក្សសមរង្ស៊ី និងគណបក្សសិទ្ធិមនុស្ស ចំនួន ៣.៦០៧ នាក់ នៅវេលាម៉ោង ៩ និង ៣០ នាទី ព្រឹកថ្ងៃទី១ ខែកញ្ញា ឆ្នាំ២០១២ នៅទីស្នាក់ការគណបក្សហ្វ៊ុនស៊ិនប៉ិច ខេត្តបន្ទាយមានជ័យ។
លោក ញឹក គឹមឈុន ប្រធានប្រត្តិបត្តិ នៃគណបក្សហ្វ៊ុនស៊ិនប៉ិច ខេត្តបន្ទាយមានជ័យ បានថ្លែងថា គណបក្សហ្វ៊ុនស៊ិនប៉ិច មានមោទនភាព លើលទ្ធផលបោះឆ្នោតឃុំសង្កាត់ ដែលបានឈ្នះ នៅមូលដ្ឋាន ក្នុងស្រុកថ្មពួក ជាមេឃុំ។
ចំណែកលោក ប៉េង សុសេង ប្រធានប្រតិបត្តិនៃគណបក្សសិទ្ធិមនុស្ស នៅខេត្តបន្ទាយមានជ័យ ដែលបានចុះចូលជាមួយគណបក្សហ្វ៊ុនស៊ិនប៉ិច បានឲ្យដឹងថា លោកបានដឹកនាំសមាជិក ២.០០០ នាក់ ដើម្បីគាំទ្រគណបក្សហ្វ៊ុនស៊ិនប៉ិច សម្រាប់ចូលរួមការបោះឆ្នោតសភា នៅក្នុងអាណាតិទី៥ ឆ្នាំ២០១៣ ខាងមុខនេះ។
ដោយឡែកលោក ម៉ក ដារិទ្ធ អតីតជំទុកទី១ របស់គណបក្សសមរង្ស៊ី នៅសង្កាត់និមិត្ត ក៏បានដឹកនាំសមាជិក មកចុះចូលជាមួយគណបក្សហ្វ៊ុនស៊ិនប៉ិច ដោយបានប្តេជ្ញាចិត្ត និងខិតខំពង្រឹងតាមមូលដ្ឋាន ដែលខ្លួនឈរជើង ឆ្ពោះទៅរកការបោះឆ្នោតខាងនេះ។
ចំណែកលោក ញឹក ប៊ុនឆៃ ប្រធានប្រត្តិ្តបត្តិនៃគណបក្សហ្វ៊ុនស៊ិនប៉ិច និងជាតំណាងរាស្ត្រ ខេត្តបន្ទាយមានជ័យ បានមានប្រសាសន៍ ក្នុងពេលទទួលសមាជិកថ្មីរបស់ហ្វ៊ុនស៊ិនប៉ិច នៅព្រឹកថ្ងៃទី១ ខែកញ្ញា ឆ្នាំ២០១២ ថា ក្នុងចំណោមសមាជិកថ្មី ដែលមកពីគណបក្សសិទ្ធិមនុស្ស និងគណបក្សសមរង្ស៊ី ចំនួន ៣.៦០៧ នាក់ អ្នកខ្លះមានលិខិតតែងតាំង ធ្វើជាក្រុមការងារ និងទទួលខុសត្រូវតាមបណ្តាស្រុក និងឃុំ បាននាំមកជាមួយនូវកាតសមាជិក របស់គណបក្សទាំងពីរ ដើម្បីបង្ហាញថែមទៀត ដើម្បីចៀសវាងការចោទប្រកាន់ថា ជាការឃោសនា ក្នុងការទទួលសមាជិកថ្មីនេះ។
លោក ញឹក ប៊ុនឆៃ ក៏បានលើកឡើងរឿងរ៉ាវនយោបាយ ដែលកម្ពុជាឆ្លងកាត់ ក្នុងសម័យសង្គមរាស្ត្រនិយម ក្រោមការដឹកនាំរបស់សម្តេចឪ ប្រទេសសម្ពុជា មានការរីកចម្រើនជឿនលឿនលើគ្រប់វិស័យ និងមានសន្តិភាពស្ថិរភាព សម្បូរសប្បាយ ក្រោយមកក៏មានរដ្ឋប្រហារ ដោយសេនាប្រមុខ លន់ នល់ ក្រោយមកទៀត ឆ្លងកាត់របបខ្មៅងងឹត ខ្មែរក្រហម ធ្វើអោយប្រជាពលរដ្ឋខ្មែររប់រយនាក់រងនូវការឈឺចាប់ និងកាប់សម្លាប់គ្នាឯង។
លោក ញឹក ប៊ុនឆៃ បន្ថែមថា ក្រោយមកទៀត ក៏មានការឯកភាពគ្នា រវាងកងទ័ពចលនាភាគី ជាមួយរបបរដ្ឋកម្ពុជា បានព្រមព្រៀង ធ្វើការបោះឆ្នោតនៅក្នុងឆ្នាំ១៩៩៣ ក្រោយពីរដ្ឋកម្ពុជារួមជាមួយគ្នាកងទ័ពវៀតណាម បានបណ្តេញទ័ពខ្មែរក្រហម។ លទ្ធផលក្នុងការបោះឆ្នោត គឺគណបក្សហ្វ៊ុនស៊ិនប៉ិច បានទទួលជ័យជំនះ ហើយធ្វើកិច្ចសហការ ជាមួយគណបក្សប្រជាជន ដើម្បីអោយប្រទេសកម្ពុជា មានរាជានិយម រហូតដល់សព្វថ្ងៃនេះ។
បន្ទាប់ពីពិធីទទួលសមាជិកគណបក្សសិទ្ធិមនុស្ស និងគណបក្សសមរង្ស៊ី ចំនួន ៣.៦០៧ នាក់ នៅខេត្តបន្ទាយមានជ័យ រួចហើយនោះ លោកបានប្រគល់នូវម៉ាស៊ីនកុំព្យូទ័រ និងម៉ាស៊ីនថតចម្លង ១គ្រឿង ជូនដល់មេឃុំថ្មពួក ដែលបានឈ្នះឆ្នោត ហើយក្នុងការលើកទឹកចិត្តឃុំគំរូទាំងខេត្តទូទាំងប្រទេស ជាការគាំទ្ររបស់ប្រជាពលរដ្ឋ ដែលបានបោះឆ្នោត ជូនគណបក្សហ្វ៊ុនស៊ិនប៉ិចនោះ។
ជាការកត់សម្គាល់ ក្នុងពិធីទទួលសមាជិកថ្មីរបស់គណបក្សហ្វ៊ុនស៊ិនប៉ិច នៅខេត្តបន្ទាយមានជ័យ កាលពីព្រឹកថ្ងៃទី១ ខែកញ្ញា ឆ្នាំ២០១២ លោក សៅ រ៉ានី ប្រធានគណបក្សជាតិនិយម និងតំណាងរាស្ត្រខេត្តព្រៃវែង ក៏បានចូលរួមផងដែរ។
គណបក្សហ្វ៊ុនស៊ិនប៉ិច និងគណបក្សជាតិនិយម ដែលទើបប្តូរឈ្មោះមកពីគណបក្សនរោត្តមរណឫទ្ធិ បានព្រមព្រៀងបង្កើតសម្ព័ន្ធភាព ដោយថ្នាក់ដឹកនាំគណបក្សជាតិនិយម ត្រូវធ្វើសកម្មភាព និងឈរឈ្មោះ ក្នុងគណបក្សហ្វ៊ុនស៊ិនប៉ិច សម្រាប់ការបោះឆ្នោតតំណាងរាស្ត្រ អាណត្តិទី៥ នាថ្ងៃទី២៨ ខែកក្កដា ឆ្នាំ២០១៣៕
