ភ្នំពេញ: គណបក្សសង្គ្រោះជាតិ ដែលរួមគ្នាបង្កើតឡើងដោយគណបក្សសមរង្ស៊ី និងគណបក្សសិទ្ធិមនុស្ស មកដល់ពេលនេះ កំពុងតែប្រមូលស្នាមមេដៃ ឲ្យបានចំនួន ៤.០០០ នាក់ តាមច្បាប់តម្រូវ ដើម្បីឲ្យមានសុពលភាព ក្នុងការចុះបញ្ជី បង្កើតគណបក្សថ្មី នៅក្រសួងមហាផ្ទៃ។ ការដើរប្រមូលស្នាមមេដៃនេះ ធ្វើឡើង ក្រោយពីរដ្ឋមន្ត្រីក្រសួងមហាផ្ទៃ បានយល់ព្រមតាមការស្នើសុំបង្កើតគណបក្សសង្គ្រោះជាតិ កាលពីថ្ងៃទី៣០ ខែសីហា ឆ្នាំ២០១២។
លោក ប៉ុល ហំម អនុប្រធានគណៈកម្មាធិការបណ្តោះអាសន្ន នៃគណបក្សសង្គ្រោះជាតិ កាលពីព្រឹកថ្ងៃទី៣ ខែកញ្ញា ឆ្នាំ២០១២ បានមានប្រសាសន៍ថា លោកទើបតែបានទទួលលិខិតពីក្រសួងមហាផ្ទៃ ដែលចុះហត្ថលេខា ដោយលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ កាលពីព្រឹកថ្ងៃទី៣ ខែកញ្ញា ឆ្នាំ២០១២ គឺជាសេចក្តីស្នើសុំបង្កើតគណបក្សសង្គ្រោះជាតិ នៅលោកសខេង បានអនុញ្ញាតឲ្យហើយ។
លោក ប៉ុល ហំម បានមានប្រសាសន៍បន្តថា ចំពោះការប្រមូលស្នាមមេដៃ ពីសមាជិកចំនួន ៤.០០០ នាក់ ដាក់ជូនក្រសួងមហាផ្ទៃ សម្រាប់សុំចុះបញ្ជីគណបក្សនយោបាយ គឺគណបក្សកំពុងតែដំណើការ ហើយការប្រមូលស្នាមមេដៃនោះ គណបក្ស និងប្រមូលឲ្យបានលើសចំនួន ៤.០០០ នាក់ មិនជាការពិបាកទេ ដែលនឹងយកទៅដាក់ជូនក្រសួងមហាផ្ទៃ នៅពេលខាងមកនេះ គ្រាន់តែគណបក្ស ត្រូវការពេលបន្តិច។
លោក ប៉ុល ហំម បានមានប្រសាសន៍បញ្ជាក់ថា បន្ទាប់ពីប្រមូលស្នាមមេដៃ គ្រប់ ៤០០០នាក់រួចហើយ គឺត្រូវផ្ញើឯកសារ ជូនលោកសមរង្ស៊ី ចុះហត្ថលេខាលើស្នាមមេដៃសមាជិក ដោយផ្ទាល់ ឬមួយត្រូវឲ្យលោកសមរង្ស៊ី ផ្ទេរសិទ្ធិ មកឲ្យរូបលោក ដើម្បីមានសិទ្ធិចុះហត្ថលេខានោះ ដាក់ជូនក្រសួងមហាផ្ទៃ នៅពេលសុំចុះបញ្ជីគណបក្ស។
លោក ប៉ុល ហំម បានបន្ថែមថា លោកសមរង្ស៊ី ជាប្រធានគណបក្សសង្គ្រោះជាតិ ដែលត្រូវតែជាអ្នកសុំចុះបញ្ជីគណបក្ស នៅក្រសួងមហាផ្ទៃផ្ទាល់ តែក្នុងករណីគាត់នៅក្រៅប្រទេសសព្វថ្ងៃនេះ គឺគាត់ត្រូវផ្ទេរសិទ្ធិ មកឲ្យលោក ធ្វើការងារនេះ ជំនួស។
លោក ប៉ុល ហំម បានបញ្ជាក់ថា ទោះបីជាលោកសមរង្ស៊ី ជាប់ឈ្មោះ ជាទណ្ឌិត ដោយអំណាចតុលាការក្តី គឺពុំមានបញ្ហាផ្លូវច្បាប់ទេ ក្នុងការសុំបង្កើត និងចុះបញ្ជីកណបក្សសង្គ្រោះជាតិ នៅក្រសូងមហាផ្ទៃនោះ ពីព្រោះលោកសមរង្ស៊ី នៅតែជាប្រធានគណបក្សសមរង្ស៊ី អីចឹងដែរ ក្នុងរយៈកាលកន្លងមក។
ក៏ប៉ុន្តែបើតាមច្បាប់គណបក្សនយោបាយ គឺក្រោយពីលោកសមរង្ស៊ី ក្លាយជាប្រធានគណបក្សសង្គ្រោះជាតិ នោះលោកសមរង្ស៊ី ត្រូវបាត់បង់តំណែងជាស្វ័យប្រវត្តិ ក្នុងនាមជាប្រធានគណបក្សសមរង្ស៊ី ព្រោះថាច្បាប់កំណត់ថា បុគ្គលម្នាក់ មិនអាចឈរជើង នៅក្នុងគណបក្សពីរបានទេ៕