ភ្នំពេញ: ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជាមុនី បានសរសេរលិខិតមួយច្បាប់ ជូនលោក វង សូត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីស្នើសុំលោករដ្ឋមន្ត្រី ឲ្យជួយអន្តរាគមន៍ឲ្យថៅកែរោងចក្រ សហគ្រាស អនុញ្ញាត ផ្តល់ឱកាសដល់កម្មករ កម្មការិនី ឈប់សម្រាក បានទៅពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១២។
ក្នុងលិខិតចុះថ្ងៃទី៣ ខែកញ្ញា ឆ្នាំ២០១២ លោកជា មុនី បានជម្រាបជូនលោករដ្ឋមន្ត្រី ថា ប្រតិទិននៃការពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១២ របស់គណៈកម្មាធិការជាតិរៀបចំការបោះឆ្នោត គ.ជ.ប. បានកំណត់ប្រព្រឹត្តិទៅចាប់ពីថ្ងៃទី១ ខែកញ្ញា ឆ្នាំ២០១២ ដល់ថ្ងៃទី១២ ខែតុលា ឆ្នាំ២០១២។ ក្នុងខណៈពេលនេះ ដើម្បីបំពេញសិទ្ធិ និងករណីយកិច្ចជាពលរដ្ឋពេញលក្ខណៈ គឺកម្មករ កម្មការិនី ដែលធ្លាប់មានឈ្មោះឋិតក្នុងបញ្ជីឈ្មោះបោះឆ្នោតរួចហើយនៅតាមបណ្តាឃុំ-សង្កាត់ ឯស្រុកកំណើតរបស់ពួកគេ តែពួកគេបានមកបម្រើការងារនៅក្នុងរោងចក្រ សហគ្រាស ក្រៅទីតាំងស្រុកកំណើត ត្រូវការឱកាសឈប់សម្រាកទៅចូលរួមពិនិត្យបញ្ជីឈ្មោះបោះឆ្នោតរបស់ពួកគេ។ ដោយឡែក កម្មករ កម្មការិនី ដែលដល់អាយុត្រូវចុះឈ្មោះបោះឆ្នោតនៅតាមបណ្តាឃុំសង្កាត់ ឯស្រុកកំណើតរបស់ពួកគេនោះ គឺពួកគេក៏ត្រូវការពេលវេលាទៅចូលរួមចុះឈ្មោះបោះឆ្នោតតាមការកំណត់ផងដែរ។
លោកជា មុនី បានគូសបញ្ជាក់ជម្រាបជូនលោកវង សូត ថា "ដូច្នេះ ខ្ញុំបាទសូមសំណូមពរឯកឧត្តម មេត្តាជួយអន្តរាគមន៍ឲ្យថៅកែ ( និយោជក ) ឬអ្នកគ្រប់គ្រងរោងចក្រ សហគ្រាស អនុញ្ញាតផ្តល់ឱកាសដ៏សមស្របតាមចម្ងាយនៃទីតាំងជាក់ស្តែងដល់កម្មករ កម្មការិនី បានទៅចូលរួមពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១២ ដោយមិនតម្រូវឲ្យកាត់ប្រាក់ឈ្នួល និងប្រាក់រង្វាន់ធ្វើការទៀងទាត់ ដែលត្រូវទទួលបាន ដោយក្តីអនុគ្រោះ"។
នៅថ្ងៃទី៣ ខែកញ្ញា ឆ្នាំ២០១២ មិនទាន់មានការឆ្លើយតបបែបណាពីលោក វង សូត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជុំវិញលិខិតស្នើសុំរបស់លោកជាមុនី ខាងលើនៅឡើយទេ។
ក៏ប៉ុន្តែ អំឡុងពេលបោះឆ្នោតឃុំសង្កាត់ កាលពីថ្ងៃទី៣ ខែមិថុនា ឆ្នាំ២០១២ លោកវងសូត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីណែនាំមួយ ដោយតម្រូវឲ្យកម្មករកាត់ដេរ បានឈប់សម្រាកពីមួយថ្ងៃ ទៅ បីថ្ងៃ ដើម្បីធ្វើដំណើរទៅចូលរួមការបោះឆ្នោត តាមស្រុកកំណើតនៅជិត និងនៅឆ្ងាយ៕
