ខេត្តកំពង់ចាម ៖ ដោយមើលឃើញនូវការលំបាករបស់ក្មួយៗជាសិស្សក្រីក្រនៅតាមជនបទ ក្នុងការធ្វើដំណើរទៅសាលារៀន មូលនិធិមជ្ឈមណ្ឌលរៀបចំណតកង់ជប៉ុន(KJO) អង្គការអាស៊ី អេស្ពេកា និងអង្គការក្រៅរដ្ឋាភិបាល បានសហការជាមួយក្រសួងសង្គមកិច្ច អតីត យុទ្ធជន និងយុវនិតិសម្បទា តែងបាននាំយកកង់ទៅចែកជូនដល់សិស្សក្រីក្រនៅតាមបណ្តាខេត្ត និងរាជធានី ។ ជាក់ស្តែងនៅព្រឹកថ្ងៃទី០៣ កញ្ញា ឆ្នាំ២០១២នេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោក Masahiro Sano ប្រធានមូលនិធិ KJO បាននាំយកកង់ ចំនួន ២០០គ្រឿង ទៅចែកជូនដល់សិស្សក្រីក្រនៅក្នុង ឃុំកំពង់រាប ស្រុកកោះសូទិន ខេត្ត កំពង់ចាម ។ នេះជាលើកទី២ហើយ ដែលស្រុកកោះសូទិនបាន ទទួលអំណោយកង់ពីមូលនិធិKJO ជប៉ុន តាមរយៈការទំនាក់ទំនងរបស់លោករដ្ឋមន្ត្រី ខៀវ កាញារីទ្ធ ហើយលើកទី១ នៅឆ្នាំ២០១១ មានចំនួន៤០០កង់ ចែកជូនសិស្សក្រីក្រនៅក្នុងឃុំពាមប្រធ្នោះ ឃុំពង្រ និង ឃុំមហាលាភ ។
លោក Masahiro Sano បានសំដែងនុវការរីករាយដែលបានមកផ្ទាល់ជាមួយក្មួយៗ ជាសិស្សក្រីក្រ ហើយបានចែកអំណោយកង់ និងសម្ភារៈសិក្សានៅទីនេះ ដើម្បីជាមធ្យោ បាយធ្វើដំណើរទៅសិក្សាបានទាន់ពេលវេលា និងជាការជំរុញលើកទឹកចិត្តដល់ក្មួយៗឲ្យ ខិតខំរៀនសូត្របានពូកែ ។ ជាមួយគ្នានេះដែរ លោក Masahiro Sano បានជម្រាបថា លោក នឹងស្នើសុំដល់រាជរដ្ឋាភិបាលជប៉ុន បន្តចូលរួមសហការជាប្រចាំ និងជួយដល់សិស្សក្រីក្រ នៅកម្ពុជាថែមទៀត ដើម្បីឲ្យក្មួយៗទាំងអស់បានរៀនសូត្រចេះដឹងបានច្រើន និងទទួល បានអនាគតភ្លឺស្វាង ។ លោក Masahiro Sano បានជម្រាបថា រហូតមកដល់ពេលនេះ យើង បានចែកកង់សរុបចំនួន ៨.៣៣០គ្រឿងហើយដល់សិស្សក្រីក្រនៅតាមបណ្តាខេត្ត-រាជធានី នៅក្នុងប្រទេសកម្ពុជា ហើយនៅឆ្នាំ២០១៣ លោកមានគម្រោងទៅឆ្នាំក្រោយៗពី១ម៉ឺន គ្រឿង ទៅ២ម៉ឺនគ្រឿងជាបន្តបន្ទាប់ ។ ទន្ទឹមនឹងនេះដែរ លោក Masahiro Sano ក៏បានផ្តាំផ្ញើ ដល់ក្មួយៗទាំងអស់ឲ្យធ្វើដំណើរប្រុងប្រយ័ត្នផង ព្រោះថាចរាចរតាមដងផ្លូវនាពេលបច្ចុប្ប ន្ន មានភាពមមាញឹកណាស់ ដែលជាការបង្ករឲ្យមានគ្រោះថ្នាក់ជាយថាហេតុ ។
លោករដ្ឋមន្ត្រី ខៀវ កាញារីទ្ធ បានបញ្ជាក់ថា សកម្មភាពមនុស្សធម៌របស់មូលនិធិ KJO ជប៉ុន ក្នុងរយៈពេលជាបន្តបន្ទាប់មកនេះ គឺជាការបង្ហាញឲ្យឃើញពីការយកចិត្តទុក ដាក់ អាណិតស្រឡាញ់ចំពោះសិស្សក្រីក្រកម្ពុជា នៅតាមជនបទ ក៏ដូចនៅទីប្រជុំជន និងរាជធានី បានទៅចូលរៀនគ្រប់ៗគ្នា ជៀសវាងការបោះបង់ចោលការសិក្សា ។ លោករដ្ឋ មន្ត្រីបានផ្តាំផ្ញើដល់ក្មួយៗទាំងអស់ដែលបានទទួលកង់នេះហើយត្រូវខិតខំប្រឹងសិក្សារៀនសូត្រឲ្យបានពូកែ ក្លាយជាពលរដ្ឋល្អ ដើម្បីអភិវឌ្ឍន៍សង្គម និងគ្រួសារនាពេលអនាគត និងធ្វើឲ្យម្ចាស់អំណោយសប្បាយចិត្ត ដោយបានឃើញក្មួយៗខិតខំរៀនសូត្រ ៕