ភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន នៅព្រឹកថ្ងៃទី១២ ខែកញ្ញា ឆ្នាំ២០១២ បានអញ្ជើញជាអធិបតីដ៏ខ្ពង់ខ្ពស់បើកកិច្ចប្រជុំថ្នាក់រដ្ឋមន្ដ្រីថាមពលអាស៊ានលើកទី៣០ និងកិច្ចប្រជុំពាក់ព័ន្ធដែលរួមមានកិច្ចសន្ននាថ្នាក់រដ្ឋមន្ដ្រីថាមពលអាស៊ាន និងទីភ្នាក់ងារថាមពលអន្ដរជាតិ (AMEM-IEA) និងកិច្ចប្រជុំថ្នាក់រដ្ឋមន្ដ្រីថាមពលអាស៊ានបូក៣លើកទី៩ កិច្ចប្រជុំថ្នាក់រដ្ឋមន្ដ្រីថាមពលអាស៊ីបូព៌ាលើកទី៦ កិច្ចសន្ននាថ្នាក់រដ្ឋមន្ដ្រីថាមពលអាស៊ានជាមួយក្រុមប្រឹក្សាធុរកិច្ចអាស៊ាន-សហរដ្ឋអាមេរិក និងវេទិកាធុរកិច្ចថាមពល អាស៊ាន២០១២ ក្រោមប្រធានបទការតភ្ជាប់អាស៊ានបៃតង នៅវិមានសន្ដិភាព ។
សម្ដេចតេជោ នាយករដ្ឋមន្ដ្រីនៅក្នុងឱកាសថ្លែងបើកកិច្ចប្រជុំបានសម្ដែងការស្វាគមន៍យ៉ាងកក់ក្ដៅចំពោះគណៈប្រតិភូ ប្រទេសជាសមាជិកអាស៊ាន និងគណៈប្រតិភូប្រទេសដៃគូទាំងអស់ ដែលបានអញ្ជើញមកចូលរួមក្នុងកិច្ចប្រជុំថ្នាក់រដ្ឋ មន្ដ្រីថាមពលអាស៊ានលើកទី៣០ ដែលរៀបចំធ្វើនៅព្រះរាជាណាចក្រកម្ពុជា ។ ជាមួយការស្វាគមន៍យ៉ាងកក់ក្ដៅសម្ដេចក៏បានផ្ដល់អនុសាសន៍មួយចំនួនទៅដល់រដ្ឋមន្ដ្រីថាមពលអាស៊ានទាំងអស់ ដើម្បីយកទៅពិភាក្សា ធ្វើយ៉ាងណាដើម្បីជំរុញបន្ថែមទៀត ទៅលើវិស័យថាមពល ។
បើតាមលោក ស៊ុយ សែម រដ្ឋមន្ដ្រីក្រសួងឧស្សាហកម្មរ៉ែនិងថាមពលបានឱ្យដឹងថា ក្នុងនាមប្រទេសកម្ពុជាជាប្រធាន អាស៊ាន គឺបានជ្រើសរើសយកប្រធានបទការតភ្ជាប់អាស៊ានបៃតង ការជ្រើសរើសនេះ គឺបន្ដពីប្រធានបទនៃកិច្ចប្រជុំថ្នាក់រដ្ឋមន្ដ្រីថាមពលអាស៊ានលើកទី២៩ នៅប្រទេសប្រ៊ុយណេ ដែលមានប្រធានបទការតភ្ជាប់អាស៊ាននិងបន្ដពីប្រធានបទលើកទី២៨នៅប្រទេសវៀតណាមថាមពលនិងការប្រែប្រួលអាកាសធាតុ ។
គួរបញ្ជាក់ថា កិច្ចប្រជុំថ្នាក់រដ្ឋមន្ដ្រីថាមពលអាស៊ានលើកទី៣០
នឹងរៀបចំធ្វើចាប់ពីថ្ងៃទី១២-១៣ ខែកញ្ញា ឆ្នាំ២០១២
ក្នុងនោះក៏មានការអញ្ជើញចូលរួមពីសំណាក់រដ្ឋមន្ដ្រីថាមពលអាស៊ាន
រដ្ឋមន្ដ្រីថាមពលប្រទេសបូក៣ ដែលមានចិន ជប៉ុន សាធារណរដ្ឋកូរ៉េ
រដ្ឋមន្ដ្រីថាមពលប្រទេសអាស៊ីបូព៌ាដែលមានជប៉ុន ចិន
សាធារណរដ្ឋកូរ៉េ អូស្ដ្រាលី ឥណ្ឌា ញូហ្សេឡេន រុស្ស៊ី
និងសហរដ្ឋអាមេរិក ទីភ្នាក់ងារថាមពលអន្ដរជាតិ
និងវិទ្យាស្ថានស្រាវជ្រាវសេដ្ឋកិច្ចអាស៊ាន-អាស៊ីបូព៌ា
ព្រមទាំងមានការចូលរួមផ្នែកឯកជនក្នុងវេទិកាធុរកិច្ចថាមពលអាស៊ាន
ឆ្នាំ២០១២ ។ កិច្ចប្រជុំនេះ
បានប្រកាសបើកក្រោមអធិបតីភាពដ៏ខ្ពង់ខ្ពស់របស់សម្ដេចតេជោ
នាយករដ្ឋមន្ដ្រី នៃព្រះរាជាណាចក្រកកម្ពុជានៅវិមានសន្ដិភាព
ខណៈកិច្ចប្រជុំនឹងបន្ដធ្វើនៅសណ្ឋាគារកាំបូឌីយ៉ាណា៕