ដោយ ៖ ឡុង សំបូរ
ខេត្តស្ទឹងត្រែង ៖ ទីបញ្ជាការដ្ឋានកងរាជអាវុធហត្ថខេត្តស្ទឹងត្រែង នៅថ្ងៃទី១១ ខែកញ្ញា ឆ្នាំ២០១២ បានបរិច្ចាគអង្ករ និងថវិកាផ្ទាល់របស់អង្គភាព ជួយដល់គ្រួសារកុមារីរងគ្រោះពីការចាប់រំលោភសេពសន្ថវៈពីសំណាក់ឪពុកចុង ប្រព្រឹត្តកាលពីថ្ងៃទី០៩ ខែកញ្ញា ឆ្នាំ២០១២ នៅខ្ទមចាំចំការក្នុងភូមិ ឃុំ ស្រែក្រសាំង ស្រុកសៀមបូក ខេត្តស្ទឹងត្រែង ។
លោកវរៈសេនីយ៏ត្រីភុយ ខ្វៃ អនុប្រធានមន្ទីរស្រាវជ្រាវ និងយុត្តិធម៌ កងរាជអាវុធហត្ថខេត្តបានឲ្យ ដឹងថា ករណីឪពុកចុងឈ្មោះ រីម រុន អាយុ៣៣ឆ្នាំ មុខរបរកម្មករដកដំឡូងមី និងមានទីលំនៅភូមិ ស្តៅជ័យ ឃុំស្តៅជ័យ ស្រុកជើងព្រៃ ខេត្តកំពង់ចាម ប្រើ កម្លាំងបាយចាប់កុមារីរងគ្រោះ ឈ្មោះ ជ ថ វ អាយុ១៣ឆ្នាំ បច្ចុប្បន្នរស់ក្នុងបន្ទុកម្តាយនិងជនសង្ស័យ ជាឪពុកចុង បានមកស្នាក់នៅភូមិ ឃុំកើតហេតុខាងលើ ធ្វើជាកម្មករដកដំឡូងមី ហើយបានគម្រាម និងប្រើកម្លាំងបាយចាប់រំលោភសេពសន្ថវៈ លើកូនស្រីដើមរហូតបានសម្រេចនារាត្រីទី០៩ ខែកញ្ញា កន្លងទៅនោះ ។
លោកវរៈសេនីយ៏ត្រីភុយ ខ្វៃ បានបន្តឲ្យដឹងទៀតថា ក្រោយការចាប់រំលោភសេពសន្ថវៈលើកុ មារីរាត្រីដ៏ស្ងប់ស្ងាត់ទី០៩ កញ្ញានោះរួចមក នៅព្រឹកថ្ងៃទីថ្ងៃទី១០ ខែ ឆ្នាំដដែល កម្លាំងកងរាជអាវុធហត្ថ បានទទួលពាក្យបណ្តឹងពីក្រុមគ្រួសារកុមារីរងគ្រោះ បន្ទាប់មកបានចុះទៅឃាត់ខ្លួនឪពុក ចុងជាជនសង្ស័យមកកាន់ទីបញ្ជាការដ្ឋានកងរាជអាវុធហត្ថខេត្តដើម្បីធ្វើការសាកសួរ។
បន្ទាប់ពីបានស្តាប់ចម្លើយ និងចងក្រងសំណុំឯកសារគ្រប់គ្រាន់ហើយនោះ ជនសង្ស័យ រីម រុន ត្រូវបានមន្ទីរជំនាញបញ្ជូនទៅកាន់អយ្យការសាលាដំបូងខេត្តស្ទឹងត្រែង ស៊ើបសួរជាបន្ត ។ ក្រោយការ ស៊ើបសួរ និងទទួលបានចម្លើយសារភាព អយ្យការសាលាដំបូងខេត្ត បានចេញដីការសម្រេចឃុំខ្លួន ជនសង្ស័យនៅក្នុងពន្ធធនាគារ ដោយចោទពីបទរំលោភសេពសន្ថវៈ លើមាត្រា២៣៤ និងមានមាត្រា ២៤១ មានស្ថានទម្ងន់ទោស ដោយបានប្រព្រឹត្តអណាចារលើកុមារីជាអនីតិជន (ក្រោមវ័យរៀបការ) នៅល្ងាចថ្ងៃទី១១ ខែកញ្ញា ក្រោយពីបញ្ចប់នូវសវនាការ ។
លោកភុយ ខ្វៃ បានបញ្ជាក់ថា ក្រោយការឃុំខ្លួនជនសង្ស័យ ដោយមើលឃើញគ្រួសារកុមារីរង គ្រោះមានជីវភាពទីទ័លក្រ ដោយប្រកបរបរជាកម្មករដកដំឡូងមី ទទួលបានប្រាក់កម្រៃបន្តិចបន្តួច មកដោះស្រាយជីវភាពប្រចាំថ្ងៃទាំងត្រដាបត្រដួសនោះ លោកឧត្តមសេនីយ៏ត្រីឧិ បូរិន្ទ មេបញ្ជាការកង រាជអាវុធហត្ថខេត្ត មានចិត្តករុណាដល់គ្រួសាររងគ្រោះ លោកបានបរិច្ចាគអង្ករចំនួន១បេ និង ថវិការ១០ម៉ឺនរៀលជារបស់អង្គភាពផ្ទាល់ ជួយដល់គ្រួសារកុមារីរងគ្រោះ។
ប្រភពខាងលើបានបញ្ជាក់ពីប្រសាសន៏លោកឧត្តមសេនីយ៏ថា អង្ករ និងថវិកាដ៏ស្តួចស្តើងខាង លើនេះ ថ្វីបើមិនអាចជួយដោះស្រាយជីវភាពកុមារីរងគ្រោះបានរហូតមែន តែវាអាចជួយដោះស្រាយ បាន១អន្លើដែរ ។ ចំណែកគ្រួសារ និងកុមារីរងគ្រោះ ជ ថ វ បានថ្លែងអំណរគុណដ៏ជ្រាលជ្រៅចំពោះទឹក ចិត្តសប្បុរសធម៌ របស់លោកមេបញ្ជាកងរាជអាវុធខេត្ត និង អង្គភាពទាំងមូល ដែលបានយកចិត្តទុក ដាក់ និងជួយដោះស្រាយទុក្ខធុរៈខណៈគ្រួសារកុមារីកំពុងជួបប្រទះនូវការលំបាកនោះ ៕
