អស់រយៈពេលពេញមួយថ្ងៃ មន្ទីរទេសចរណ៍ខេត្តសៀមរាប បានដំណើរការសន្តិបាតបូកសរុបការងាររបស់ខ្លួន ព្រមទាំងបានឆ្លងផែនការទិសដៅអនុវត្តបន្តសំរាប់ឆមាសទី ២ ឆ្នាំ ២០១៣ផងដែរ ក្រោមអធិបតីភាព ឯកឧត្តម ថោង ខុន រដ្ឋមន្ត្រីក្រសួងទេសចរណ៍។ អង្គសន្និបាតបានតាមដានស្តាប់របាយការណ៍បូកសរុបការងារទេសចរណ៍ និងភារកិច្ចដែលត្រូវអនុវត្តបន្ត ដែលអានដោយលោកប្រធានមន្ទីរទេសចរណ៍ខេត្តសៀមរាប។ របៀបវារៈបន្ត គឺបទអន្តរាគមន៍ចូលរួម របស់អង្គភាពស្ថាប័នដែលពាក់ព័ន្ធ និង មានវិស័យឯកជន បានចូលរួមផងដែរ។
បទអន្តរាគមន៍ បានលើកឡើងជាសំខាន់អំពីការងារសន្តិសុខសណ្តាប់ធ្នាប់ ផែនការគ្រប់គ្រងនិងការអភិវឌ្ឍន៍ហេដ្ឋារចនាសម្ព័ន្ធក្នុងតំបន់ រមណីដ្ឋានអង្គរ គម្រោងអភិវឌ្ឍន៍ទីក្រុងសៀមរាប ការងារគ្រប់គ្រង និងអភិវឌ្ឍន៍អាកាសយានដ្ឋានអន្តរជាតិសៀមរាប វិធានការដើម្បីលើកស្ទួយផ្នែកវត្ថុអនុស្សាវរីយ៍ សេវាកម្មម្ហូបអាហារនិងការត្រៀមលក្ខណៈបង្កើតសមាគមចុងភៅកម្ពុជា ទេសចរណ៍បៃតង (ទេសចរម្នាក់ ដើមឈើមួយដើម) យុទ្ធនាការទីក្រុងស្អាត(ទីក្រុងដែលគ្មានថង់ប្លាស្ទីកហើរតាម ខ្យល់) និងបទអន្តរាគមន៍ស្តីអំពីដំណើរសៀមរាប អង្គរ ឆ្ពោះទៅរភាពបៃតង។
ឯកឧត្តមបណ្ឌិត ស៊ូ ភិរិន្ទ អភិបាលខេត្តសៀមរាប មានប្រសាសន៍ថា ចំណូលនៃវិស័យទេសចរណ៍ត្រូវបានចាត់បញ្ចូលភ្លាមៗទៅក្នុងចរន្ត សេដ្ឋកិច្ចជាតិ រួមចំណែកបង្កើតការងារ លើកកំពស់ជីវភាពរស់នៅ ជំវិញកំណើនផលិតផលសរុបក្នុងស្រុក (GDP) ធ្វើឱ្យមានសំនឹងផ្នែកជញ្ជីងពាណិជ្ជកម្ម និងកាត់បន្ថយភាពក្រីក្រ។ ឯកឧត្តមក៏បានគូសបញ្ជាក់ដែរថា ការអភិវឌ្ឍន៍វិស័យទេសចរណ៍ប្រកបដោយចរិភាព និងការទទួលខុសត្រូវ នឹងបានរួមចំណែកយ៉ាងសកម្មដល់កិច្ចអភិវឌ្ឍន៍ ថែរក្សាការពារ និង អភិរក្សសម្បត្តិវប្បធម៌ប្រវត្តិសាស្ត្រ និង ធនធានធម្មជាតិរបស់ប្រទេសជាតិ។
ឯកឧត្តមរដ្ឋមន្ត្រីក្រសួងទេសចរណ៍បានលើកយកមកបង្ហាញអង្គសន្និបាត នូវការវិភាគទីផ្សារទេសចរណ៍កម្ពុជា ដែលក្នុងនេះ ឯកឧត្តម សង្កត់ធ្ងន់ទៅលើការខិតខំប្រឹងប្រែងលើចលនាប្រឡងប្រណាំងទីក្រុង ស្អាត៕