ភ្នំពេញ: សេចក្តីប្រកាសព័ត៌មានរបស់ក្រសួងការបរទេស ដែលបានចែកដល់ក្រុមអ្នករាយការណ៍ព័ត៌មាន កាលពីព្រឹកថ្ងៃទី១២ ខែកញ្ញា ឆ្នាំ២០១២ បានបញ្ជាក់ថា ក្នុងនាមជាប្រធានអាស៊ាន ព្រះរាជាណាចក្រកម្ពុជា នឹងធ្វើជាម្ចាស់ផ្ទះ នៃកិច្ចប្រជុំថ្នាក់ឧត្តមមន្ត្រីអាស៊ាន នៅក្នុងសប្តាហ៍នេះ ចាប់ពីថ្ងៃទី១២ ដល់ថ្ងៃទី១៥ ខែកញ្ញា ឆ្នាំ២០១២ ដើម្បីត្រៀមរៀបចំសម្រាប់កិច្ចប្រជុំកំពូលអាស៊ាន លើកទី២១ និងកិច្ចប្រជុំកំពូលពាក់ព័ន្ធមួយចំនួន ដែលនឹងប្រព្រឹត្តទៅនៅខែវិច្ឆិកា ឆ្នាំ២០១២ នៅរាជធានីភ្នំពេញ។
កិច្ចប្រជុំឧត្តមមន្ត្រីអាស៊ាន រួមមាន៖
១. កិច្ចប្រជុំឧត្តមមន្ត្រីអាស៊ាន និងកិច្ចប្រជុំត្រៀមរួមគ្នា (JTM) ក្នុងនោះមានកិច្ចប្រជុំឧត្តមន្ត្រីអាស៊ាន កិច្ចប្រជុំឧត្តមមន្ត្រី នៃក្រុមប្រឹក្សាសេដ្ឋកិច្ចអាស៊ាន និងកិច្ចប្រជុំគណៈកម្មាធិការឧត្តមមន្ត្រី លើកទី១២ នៃក្រុមប្រឹក្សាសង្គមកិច្ច វប្បធម៌អាស៊ាន ដើម្បីរៀបចំកិច្ចប្រជុំកំពូលអាស៊ាន នាខែវិច្ឆិកាខាងមុខ។
២. កិច្ចប្រជុំឧត្តមមន្ត្រីអាស៊ានបូកបី (អាស៊ានបូក ចិន ជប៉ុន កូរ៉េ) ដើម្បីរៀបចំសម្រាប់កិច្ចប្រជុំអាស៊ានបូកបី កិច្ចប្រជុំដើម្បីរៀបចំកិច្ចប្រជុំកំពូលអាស៊ានបូកបី លើកទី១៥។
៣. កិច្ចប្រជុំឧត្តមន្ត្រីអាស៊ីបូព៌ា ដើម្បីរៀបចំសម្រាប់កិច្ចប្រជុំអាស៊ីបូព៌ា លើកទី៧។
៤. កិច្ចប្រជុំឧត្តមមន្ត្រីអាស៊ាន សហរដ្ឋអាមេរិក ដើម្បីរៀបចំសម្រាប់កិច្ចប្រជុំថ្នាក់ដឹកនាំអាស៊ាន សហរដ្ឋអាមេរិក លើកទី៤។
៥. កិច្ចប្រជុំគណៈកម្មាធិការប្រតិបត្តិ នៃគណៈកម្មាធិការសន្ធិសញ្ញា ស្តីពី តំបន់អាស៊ីអាគ្នេយ៍គ្មានអាវុធនុយក្លេអ៊ែ ដើម្បីរៀបចំចុះហត្ថលេខាលើពិធីសារ នៃសន្ធិសញ្ញា ស្តីពី តំបន់អាស៊ីអាគ្នេយ៍គ្មានអាវុធនុយក្លេអ៊ែ។
៦. តាមសំណើរបស់ប្រទេសកម្ពុជា មានការឯកភាពពីសមាជិកអាស៊ានទាំងអស់ កម្ពុជានឹងធ្វើជាម្ចាស់ផ្ទះ នៃកិច្ចប្រជុំពិគ្រោះយោបល់ក្រៅផ្លូវការ ថ្នាក់ឧត្តមមន្ត្រីអាស៊ាន-ចិន ស្តីពី ក្រមប្រតិបត្តិ (COC) នៅសមុទ្រចិនខាងត្បូង។ នេះជាលើកទី៣ ហើយ ដែលកម្ពុជាបានផ្តួចផ្តើមឲ្យមានកិច្ចប្រជុំ ស្តីពីក្រមប្រតិបត្តិនេះ ដើម្បីកាត់បន្ថយភាពតានតឹងក្នុងសមុទ្រចិនខាងត្បូង និងធ្វើការងារឆ្ពោះទៅកាន់ការតាក់តែងក្រមប្រតិបត្តិ (COC)៕
