ភ្នំពេញ: ក្រសួងមហាផ្ទៃ បានបដិសេធសំណើរបស់គណបក្សប្រឆាំង ដែលទាមទារឲ្យមានការផ្លាស់ប្ដូរ សមាសភាពគណៈកម្មាធិការជាតិរៀបចំការបោះឆ្នោត (គ.ជ.ប) និងគណៈកម្មការរៀបចំការបោះឆ្នោតគ្រប់លំដាប់ថ្នាក់ សម្រាប់ការបោះឆ្នោតជ្រើសតាំងតំណាងរាស្ដ្រ អាណត្តិទី៥។
លិខិតឆ្លើយតបរបស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ជូនទៅលោក គង់ គាំ ប្រធានស្ដីទីគណបក្សសមរង្ស៊ី និងលោក សឺន ស៊ូប៊ែរ្តិ៍ ប្រធានស្ដីទីគណបក្សសិទ្ធិមនុស្ស ចុះថ្ងៃទី៧ ខែកញ្ញា ឆ្នាំ២០១២ បានលើកឡើងថា ពាក់ព័ន្ធនឹងសំណើរបស់លោក ក្រសួងមហាផ្ទៃបានធ្វើការសិក្សាពិចារណា និងកត់សម្គាល់ឃើញបញ្ហាប្រឈមសំខាន់ៗមួយចំនួន ជាអាទិ៍៖
- នីតិវិធីដែលស្នើឡើងនេះ បានធ្វើឲ្យប៉ះពាល់ដល់ឯករាជ្យភាព និងអព្យាក្រឹត្យភាព របស់ស្ថាប័នរៀបចំការបោះឆ្នោតគ្រប់លំដាប់ថ្នាក់ ដែលធានាដោយច្បាប់បោះឆ្នោតជាធរមាន ដោយហេតុថា សមាសភាពស្ថាប័នរៀបចំការបោះឆ្នោតគ្រប់លំដាប់ថ្នាក់ ដែលស្នើឡើងនេះ មានតំណាងពីគណបក្សនយោបាយនានា។
- ចំពោះសំណើបង្កើតឲ្យមានគណៈកម្មការជ្រើសរើសសមាសភាព គ.ជ.ប ដោយគណបក្សនីមួយៗ ដែលមានអាសនៈក្នុងរដ្ឋសភាបញ្ជូនតំណាង ២រូប សម្រាប់បង្កើតគណៈកម្មការនេះ។ ការជ្រើសរើសសមាសភាព គ.ជ.ប គណៈកម្មការត្រូវសម្រេចដោយសំឡេងឯកច្ឆន្ទ ឬដោយសំឡេងពីរភាគបីនោះ គណៈកម្មការនេះនឹងមិនអាចរកសំឡេងគ្រប់គ្រាន់ ដើម្បីសម្រេចបានឡើយ ដោយសារតែតំណាងពីគណបក្សនីមួយៗក្នុងគណៈកម្មការនេះ អាចនឹងប្រកួតប្រជែងគ្នា ទាមទារឲ្យមានប្រៀបខាងនយោបាយ ក្នុងស្ថាប័ន គ.ជ.ប។ ជម្រើសដែលស្នើឡើងខាងលើនេះ រដ្ឋសភាបច្ចុប្បន្ន និងក្នុងអាណត្តិជាបន្តបន្ទាប់ទៀត គណបក្សដែលមានសំឡេងភាគច្រើន នឹងមិនអាចទទួលបានឡើយ ទាំងក្នុងពេលរៀបចំគណៈកម្មការជ្រើសរើស គ.ជ.ប ក៏ដូចពេលបញ្ចូលសមាសភាព គ.ជ.ប ទៅសុំការយល់ព្រមពីសភា។ ដូច្នេះនីតិវិធីដែលស្នើឡើងនេះ នឹងនាំឲ្យមានភាពជាប់គាំង ក្នុងការបង្កើត គ.ជ.ប ដែលភាពជាប់គាំងនេះ នឹងមិនអាចធានាឲ្យការបោះឆ្នោតប្រព្រឹត្តទៅបានឡើយ។ ប្រការនេះ នឹងនាំមកនូវហានិភ័យខ្ពស់ខាងនយោបាយ មកលើស្ថិរភាពនយោបាយ ស្ថិរភាពសង្គម និងការអភិវឌ្ឍប្រទេសជាតិ។
- ចំពោះសំណើកំណត់សមាសភាពគណៈកម្មការរាជធានី ខេត្ត ឃុំ សង្កាត់ និងគណៈកម្មការការិយាល័យបោះឆ្នោត ចំនួន ៧រូប ដូចៗគ្នា ដែលមានសមាសភាពតំណាងមកពីគ្រប់គណបក្ស ដែលមានអាសនៈក្នុងរដ្ឋសភា ដែលជ្រើសរើសឡើងដោយវិធីរាប់លេខឆ្លាស់ តាមចំនួនអាសនៈពីច្រើនមកតិច រហូតគ្រប់ចំនួន ៧រូប។ ការរៀបចំគណៈកម្មការបោះឆ្នោតតាមសំណើនេះ នឹងធ្វើឲ្យប៉ះពាល់មកលើឯករាជ្យភាព និងអព្យាក្រឹត្យភាព ក៏ដូចកិច្ចដំណើរការ នៃស្ថាប័នបោះឆ្នោតទាំងនេះ។
លោកឧបនាយករដ្ឋមន្ត្រី ស ខេង បានបន្ថែមថា បន្ថែមពីលើនេះ តាមសំណើរបស់លោក គណៈកម្មការបោះឆ្នោតគ្រប់លំដាប់ថ្នាក់ ត្រូវធ្វើសេចក្ដីសម្រេចដោយសំឡេងពីរភាគបី នៃគណៈកម្មការទាំងមូល។ របៀបរបបបំពេញការងារដែលស្នើឡើងនេះ រួមជាមួយសំណើឲ្យមានតំណាងគណបក្សនយោបាយក្នុងរដ្ឋសភា ក្នុងសមាសភាពគណៈកម្មការរៀបចំការបោះឆ្នោតទាំងនេះ នឹងធ្វើឲ្យគណៈកម្មការបោះឆ្នោតទាំងនេះ មិនអាចអនុវត្តការងាររបស់ខ្លួនតាមច្បាប់បោះឆ្នោត បទបញ្ជា នីតិវិធី ក្រមសីលធម៌ និងប្រតិទិន នៃការបោះឆ្នោតបានឡើយ ដោយសារតែសមាសភាពមកពីគណបក្សនយោបាយផ្សេងៗ នឹងអាចធ្វើការប្រកួតប្រជែងគ្នាខាងនយោបាយ ក្នុងគណៈកម្មការបោះឆ្នោតទាំងនេះ។ ដូច្នេះ ដំណើរការបោះឆ្នោតនឹងត្រូវជាប់គាំង។
លោកឧបនាយករដ្ឋមន្ត្រី បានបញ្ជាក់ថា “សរុបមក ផ្អែកតាមការសិក្សា ពិចារណាជាមួយហេតុផលខាងលើនេះ សំណើរបស់គណបក្សឯកឧត្តម អាចធ្វើឲ្យដំណើរការបោះឆ្នោតទាំងមូល ត្រូវប្រឈមជាមួយភាពជាប់គាំង ដែលនឹងនាំឲ្យប៉ះពាល់មកលើស្ថិរភាពនយោបាយរបស់ជាតិ”៕
