ស្វាយរៀង ៖ទឹកជំនន់កំពុងបន្តឡើងអាចឈានទៅលិចក្រុងស្វាយរៀងព្រោះទំនប់ដែលទប់ដោយអាជ្ញាធរខេត្តក្រុង មន្ត្រីកងកម្លាំងប្រដាប់អាវុធរួមទាំងសមាគមយុវជនកម្ពុជាខេត្តដែលបើកយុទ្ធនាការទប់នោះឥឡូវទឹកជំនន់បានជ្រាបចូលជាបណ្ដើរៗហើយអាជ្ញាធរក្រុងស្វាយរៀងបានបិទផ្លូវជាយក្រុងផ្នែកខាងត្បូងចាប់ពីស្ពានអំណោយសម្ដេចតេជោហ៊ុនសែនគយត្របែករហូតដល់នាគបាញ់ទឹក។
ប្រជាពលរដ្ឋនិងមន្ត្រីរាជការដែលមានលំនៅដ្ឋានក្នុងស្រុកស្វាយរៀងព្រមទាំងរដ្ឋបាលខេត្តកំពុងមានការព្រួយបារម្ភព្រោះទឹកចេះតែឡើងបើទឹកមិនស្រកទេនោះវានិងលិចក្រុងស្វាយរៀងជាមិនខានឡើយបើតាមរបាយការណ៍ប៉ះពាល់ដោយទឹកជំនន់ក្នុងស្រុកស្វាយរៀងលោកយូប៊ុននីអភិបាលក្រុងស្វាយរៀងបានឲ្យកម្ពុជាថ្មីដឹងតាមទូរស័ព្ទថាក្រុងស្វាយរៀងដែលរងគ្រោះដោយទឹកជំនន់គិតចាប់ពីថ្ងៃទី២០ខែកញ្ញាឆ្នាំ២០១១រហូតដល់ថ្ងៃទី១១ខែតុលាឆ្នាំ២០១១នេះ។ក្រុងប៉ះពាល់ទាំងអស់ចំនួន៧សង្កាត់ស្មើរនិង២៨ភូមិប៉ះពាល់ប្រជាពលរដ្ឋចំនួន១២២៨គ្រួសារជម្លៀសប្រជាជនទៅកាន់ទីទួលសុវត្ថិភាពចំនួន៨១៨គ្រួសារលិចស្រូវស្រែអស់ចំនួន៤៧៥.២៥ហិកតាលិចស្រូវទូទាំងស្រុកចំនួន២៩៤.៩៨ហិកតាលិចដំណាំរួមផ្សំចំនួន៩៣.៧៥ហិកតា។
អនុប្រធានមន្ទីរធនធានទឹកនិងឧតុនិយមខេត្តបានឲ្យកម្ពុជាថ្មីតាមទូរស័ព្ទថាកំពស់ទឹកថ្ងៃទី១១ តុលានេះទឹកមានកម្ពស់១.៨៣ ម៉ែត្រ បើសិនជាមេឃមិនភ្លៀងអាចនឹងស្រក ប្រសិនមេឃភ្លៀងអាចឡើង ប៉ុន្តែបើប្រៀបធៀបកម្ពស់ទឹកឆ្នាំ ២០០០ ខេត្តស្វាយរៀងទឹកមានកម្ពស់ ១,៤៧ម៉ែត្រឯណោះ ទើបលិចក្រុងស្វារៀង ឥឡូវទើបមានកម្ពស់៣,៨៣ម៉ែត្រ មានន័យថាខុសគ្នាច្រើន បើភ្លៀងរាំងពិតជាមិនលិចក្រុងនោះទេ។
ប៉ុន្តែស្ថិតនៅក្នុងស្ថានភាពប្រឈមក្នុងការលិចនោះអាជ្ញាធរខេត្ត ក្រុង រួមទាំងមន្ត្រីជំនាញ បានអំពាវនាវដល់ប្រជាពលរដ្ឋទូទាំងខេត្ត រួមទាំងអាជ្ញាធរមូលដ្ឋាន ឲ្យត្រៀមខ្លួនប្រុងប្រយ័ត្នជានិច្ចនៅក្នុងស្ថានភាពបែបនេះ ដើម្បីបញ្ចៀសឲ្យបាននូវគ្រោះថ្នាក់ជាយថាហេតុ ហើយត្រូវតាមដានសភាពការណ៍គ្រប់ពេលវេលាដើម្បីកាត់បន្ថយមហន្តរាយ ដោយទឹកជំនន់ក្នុងរដូវវស្សាឆ្នាំ២០១១នេះ៕
គឹមសេង