ភ្នំពេញ ៖ លោកជំទាវ ម៉ែន សំអន ឧបនាយករដ្ឋមន្ត្រីប្រចាំការបានមានប្រសាសន៍ថារាជរដ្ឋាភិបាលកម្ពុជាដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានទទួលស្គាល់និងចាត់ទុកថា«ស្ត្រីគឺជាឆ្អឹងខ្នងនៃការអភិវឌ្ឍសេដ្ឋកិច្ចសង្គម»។ នេះជាប្រសាសន៍ដ៏មានអត្តន័យដែលធ្វើឡើងខណៈពេលលោកជំទាវបានអញ្ជើញជាអធិបតីដ៏ខ្ពង់ខ្ពស់ក្នុងពិធីប្រកាសសមាគមនារីកម្ពុជាដើម្បីសន្តិភាពនិងអភិវឌ្ឍក្រសួងផែនការនាល្ងាចថ្ងៃទី១១ខែតុលាឆ្នាំ២០១១នៅទីស្ដីការក្រសួង។
គួរបញ្ជាក់ថាតាមសេចក្ដីសំរេចគណៈកម្មាធិការកណ្ដាលសមាគមនារីកម្ពុជាដើម្បីសន្តិភាពនិងអភិវឌ្ឍបាននទទួលស្គាល់សមាសភាពដែលទើបបានបង្កើតថ្មីក្នុងក្រសួងផែនការក្នុងនោះលោក ឆាយ ថន ទេសរដ្ឋមន្ត្រីរដ្ឋមន្ត្រីក្រសួងផែនការមុខងារជាប្រធានកិត្តិយសនិងលោកស្រី ហង់ លីណា ជាប្រធានសមាគមនារីកម្ពុជាដើម្បីសន្តិភាពនិងអភិវឌ្ឍរបស់ក្រសួងផែនការនិងសមាសភាពជាសមាជិក ហិរញ្ញិក និងថ្នាក់អនុប្រធានកិត្តិយសសរុប១៨នាក់។
លោកជំទាវ ម៉ែន សំអន បានមានប្រសាសន៍ស្វាគមន៍និងរីករាយចំពោះសមាសភាពថ្មីដែលទើបបានបង្កើតឡើងជាសមាគមនារីកម្ពុជាដើម្បីសន្តិភាពនិងអភិវឌ្ឍក្នុងក្រសួងផែនការនោះ ដែលនេះសបញ្ជាក់អោយឃើញថាស្ត្រីគឺជាឆ្អឹងខ្នងដ៏រឹងមាំនៃការអភិវឌ្ឍសេដ្ឋកិច្ចសង្គមនិងជាមូលធនដ៏សំខាន់មិនអាចខ្វះបានក្នុងការអភិវឌ្ឍប្រទេសជាតិ។
លោកជំទាវឧបនាយករដ្ឋមន្ត្រីក្នុងនាមជាប្រធានសមាគមនារីកម្ពុជាដើម្បីសន្តិភាពនិងអភិវឌ្ឍបានបញ្ជាក់បន្ថែមថានាពេលបច្ចុប្បន្នស្ត្រីមានតួនាទីយ៉ាងសំខាន់មួយទៀតគឺការចូលរួមចំណែកក្នុងការទប់ស្កាត់ផលប៉ះពាល់នៃវិបត្តិសេដ្ឋកិច្ចអន្តរជាតិនិងការប្រែប្រួលអាកាសធាតុនៅក្នុងពិភពលោកដែលតំរូវអោយមានការលើកកំពស់ការងារផ្សព្វផ្សាយអប់រំបំផុសអោយមានការយល់ដឹងអំពីតួនាទីរបស់នារីការចូលរួមក្នុងការទប់ស្កាត់ផលប៉ះពាល់និងភាពគំរាមកំហែងទាំងនោះ។ហើយលោកជំទាវក៏បានផ្ដាំផ្ញើរដល់សមាគមនារីដែលទើបបង្កើតថ្មីក្នុងក្រសួងផែនការអោយអនុវត្តអោយបាននូវទិសដៅការងាររបស់សមាគមដើម្បីលើកកំពស់សិទ្ធិសេរីភាពរបស់ស្ត្រីទប់ស្កាត់ការជួញដូរស្ត្រីនិងអំពើហិង្សាជាដើម។កិច្ចការរបស់សមាគមនារីសំដៅលើកកំពស់សេរីភាពគ្រប់បែបយ៉ាងរបស់ស្ត្រីអោយចូលរួមចំណែកជាមួយរាជរដ្ឋាភិបាលលើការងារសមធម៌ ការងារអភិវឌ្ឍ អោយមានប្រសិទ្ធភាពខ្ពស់ពិសេសអោយសាកសមជា«ស្ត្រីជាត្បូងពេជ្រដ៏មានតម្លៃ»៕
វិមាន