ខេត្តកំពង់ឆ្នាំង ៖ អគារស្នាក់ការថ្មីរបស់គណបក្សប្រជាជនកម្ពុជាឃុំពោធិ៍ ស្រុកកំពង់លែង បានសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាពលោកអ៊ឹង ប៊ុនហូវ ប្រធានក្រុមការងារថ្នាក់កណ្តាលចុះជួយស្រុកកំពង់លែង និងលោកចេង ញ៉ាន់ អនុប្រធានក្រុមការងារព្រមទាំងមានការអញ្ជើញចូលរួមពីសមាជិក សមាជិកាគណបក្សប្រជាជនកម្ពុជា យ៉ាងច្រើនកុះករ ។ ពិធីនេះធ្វើឡើងកាលពីថ្ងៃទី៧ តុលា នៅភូមិពោធិ៍ ឃុំពោធិ៍ ស្រុកកំពង់លែង ។
លោកកែវ ពៅ ប្រធានក្រុមការងារចុះជួយឃុំពោធិ៍ឱ្យដឹងថា សំណង់អគារស្នាក់ការថ្មីនេះចាប់ផ្តើមសាងសង់កាលពីថ្ងៃទី៧ ឧសភា និងបានរួចរាល់ជាស្ថាពរនៅថ្ងៃទី១៩ សីហា ឆ្នាំ ២០១១ ដោយចំណាយប្រាក់សរុបចំនួន៣.៣០០០ដុល្លារ សហរដ្ឋអាេមរិក។ ប្រាក់សម្រាប់ការសាងសង់នេះឧបត្ថម្ភដោយលោកអ៊ឹង ប៊ុនហ៊ូវ និងលោកជំទាវ ។
លោកចេង ញ៉ាន់ អនុប្រធានក្រុមការងារគណបក្សប្រជាជនកម្ពុជាចុះជួយស្រុកកំពង់លែង មានប្រសាសន៍ថា ការសម្ពោធដាក់ឱ្យប្រើប្រាស់ជាផ្លូវការអគារស្នាក់ការគណបក្សប្រជាជនកម្ពុជាឃុំពោធិ៍នេះជាសមិទ្ធផលថ្មីមួយទៀតបង្ហាញពីស្មារតីសាមគ្គីភាពរបស់មូលដ្ឋានជាមួយក្រុមការងារ និងបញ្ជាក់យ៉ាងច្បាស់ពីភាពរីកចម្រើនរបស់គណបក្ស ។
លោកអ៊ឹង ប៊ុនហូវ ប្រធានក្រុមការងារថ្នាក់កណ្តាលចុះជួយស្រុកកំពង់លែងបានថ្លែងកោតសរសើរចំពោះមន្ត្រីក្រុមការងារ និងសមាជិក សមាជិកា គណបក្សប្រជាជនកម្ពុជានៅក្នុងស្រុកកំពង់លែងទាំងអស់ដែលក្នុងរយៈពេលកន្លងទៅនេះមានសាមគ្គីភាពល្អ និងចលនាបានសមាជិកថ្មីជាបន្តបន្ទាប់ ។ លោកបានអំពាវដល់សមាជិក សមាជិកាគណបក្សប្រជាជនកម្ពុជាទាំងចាស់ទាំងថ្មីត្រូវទៅចុះឈ្មោះបោះឆ្នោត និងពិនិត្យបញ្ជីឈ្មោះបោះឆ្នោតឱ្យបានគ្រប់ៗគ្នា ។ លោកបានចែកជូនវត្ថុអនុស្សាវរីយ៍សារុងពុម្ពម្នាក់មួយដល់សមាជិកសមាជិកាដែលចូលរួមក្នុងពិធី ៕
