ភ្នំពេញ ៖ រថយន្តកាមរីឆ្លាមមួយគ្រឿងបើកបរក្នុងល្បឿនលឿនចាក់គួរមិនបានប្រុងប្រយ័ត្ន ក៏បានឡើងលើចិញ្ចើមផ្លូវហោះទៅត្របាក់ដើមគគីរមួយដើម បណ្ដាលឲ្យរថយន្តក្រឡាប់ផ្ងារជើង ឡើងលើ ហើយមនុស្ស៣នាក់លូនចេញពីក្នុងរថយន្តដោយសុវត្ថិភាព។
ហេតុការណ៍នេះបានកើតឡើងកាលពីវេលាម៉ោង២១និង៤០នាទី យប់ថ្ងៃទី១១ ខែតុលា ឆ្នាំ ២០១១ នៅចំណុចមុខអគ្គិសនីកម្ពុជាវត្តភ្នំ តាមបណ្ដោយផ្លូវនរោត្តម សង្កាត់វត្តភ្នំ ខណ្ឌដូនពេញ រាជធានីភ្នំពេញ។ តៃកុងរថយន្តមានឈ្មោះយ៉ាន់ ពិសិដ្ឋ ភេទប្រុស អាយុ២៥ឆ្នាំ ជានិស្សិត មានទីលំនៅភូមិបឹងឈូក សង្កាត់ទឹកថ្លា ខណ្ឌសែនសុខ រួមនឹងអ្នកធ្វើដំណើរជាមួយ៣នាក់ទៀត តែអ្នកទាំងអស់នោះមិនមានគ្រោះថ្នាក់អ្វីធ្ងន់ធ្ងរនោះទេ។
ប្រភពព័ត៌មានបានឲ្យដឹងថា នៅមុនពេលកើតហេតុរថយន្តបានបើកបរតាមបណ្ដោយផ្លូវនរោត្ដម ហើយចាក់គួរកាច់តាមរង្វង់មូលវត្តភ្នំត្រង់ចំណុចអគ្គិសនីកម្ពុជា ដោយល្បឿនរថយន្តលឿនពេក ក៏បានឡើងលើចិញ្ចើមផ្លូវហើយហោះទៅត្របាក់ដើមគគីរនៅក្បែរនោះ បណ្ដាលឲ្យរថយន្តក្រឡាប់ផ្ងារជើងឡើងលើ ហើយអ្នកជិះក្នុងរថយន្តបានលូនចេញមកក្រៅ ទាំងសភាពស្រវឹងជោក គ្រប់គ្នា។ សមត្ថកិច្ចបានសាកសួរតៃកុង បើកបររថយន្ត និងបានអូសយករថយន្តបង្កទៅកាន់ការិយាល័យនគរបាលចរាចរផ្លូវគោក ដើម្បីដោះស្រាយសំណងដើមគគីរ៕ រស្មី
