ភ្នំពេញៈ រដ្ឋាភិបាលសហរដ្ឋអាមេរិក តាមរយៈទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID) បានផ្តល់នូវអំណោយជាទឹកប្រាក់ចំនួន ៥០០០០ ដុល្លាអាមេរិក ដល់អង្គការសង្គ្រោះកុមារ (Save the Children) សំរាប់ការងារសង្គ្រោះបន្ទាន់ក្នុងទឹកជំនន់ក្នុងប្រទេសកម្ពុជា។
យោងតាមសេចក្តីប្រកាសព័ត៌មានរបស់ស្ថានទូតអាមេរិកបានឲ្យដឹងថា ថវិកាទាំងនេះនឹងត្រូវបានផ្តល់ដល់អង្គការសង្គ្រោះកុមារ សំរាប់ជួយប្រជាជនដែលរងគ្រោះដោយទឹកជំនន់ តាមរយៈការផ្តល់ដល់ពួកគេនូវសំភារៈមួយចំនួនដូចជា តង់ប្រក់សំរាប់ទីជំរក បណ្តោះអាសន្ន ឧបករណ៏ច្រោះទឹកស្អាត មុងគេង និងសាប៊ូដុះខ្លួនជាដើម។ ជំនួយសង្គ្រោះទាំងនេះ គឺសំរាប់ចែកចាយដល់ប្រជាពលរដ្ឋប្រមាណ ២២១៥ គ្រួសារ ដែលទទួលរងគ្រោះដោយទឹកជំនន់ ធ្ងន់ធ្ងរក្នុងខេត្តកំពង់ចាម។
សេចក្តីប្រកាសព័ត៌មានបានបញ្ជាក់ថា ជំនួយនេះត្រូវបានសំរេចផ្តល់អោយ បន្ទាប់ពីរាជរដ្ឋាភិបាលកម្ពុជាបានរាយការណ៍ថា ប្រទេសកម្ពុជាកំពុងជួបស្ថានភាពទឹកជំនន់ដ៏អាក្រក់បំផុតរបស់ខ្លួន ក្នុងរយៈពេលជាង១០ឆ្នាំមកនេះ។ ជាការឆ្លើយតបទៅនឹងគ្រោះទឹកជំនន់នេះដែរ លោកស្រី Hilary Clinton រដ្ឋមន្រ្តីក្រសួងការបរទេសសហរដ្ឋអាមេរិកបានមានប្រសាសន៍ថា តាងនាមអោយលោកប្រធានាធិបតី Obama និងប្រជាជនអាមេរិក សូមសំដែងនូវការរំលែកទុក្ខយ៉ាងជ្រាលជ្រៅបំផុត ចំពោះអ្នកដែលបានបាត់បង់មិត្តភក្តិ បងប្អូន និងអ្នកជាទីស្រឡាញ់របស់ខ្លួន ដោយសាភ្លៀងធ្លាក់ខ្លាំង និងទឹកជំនន់នៅ ទូទាំងតំបន់អាស៊ីអាគ្នេយ៍ ដែលក្នុងនោះរួមមានតំបន់នានានៅក្នុងប្រទេសកម្ពុជា ឡាវ ហ្វីលីពីន ថៃ និងវៀតណាម។
លោកស្រីបន្តថា ស្ថានទូតនៅក្នុងតំបន់នេះ កំពុងតែធ្វើការជាមួយអាជ្ញាធរមូលដ្ឋាន និងអង្គការអន្តរជាតិនានាដើម្បីវាយតំលៃថា តើសហរដ្ឋអាមេរិកអាចជួយបានយ៉ាងដូចម្តេច ដល់ប្រទេសដែលកំពុងរងគ្រោះខ្លាំងដោយទឹកជំនន់ទាំងនេះ ។ ជាមួយគ្នានោះលោកស្រីបានបួងសួងអោយអ្នកទាំងឡាយ ដែលរស់នៅក្នុងតំបន់ដែលរងការប៉ះពាល់ដោយទឹកជំនន់នេះ បានចាកផុតពីសោកនាដកម្ម ៕ កោះកែវ