ឯកឧត្តមបណ្ឌិត
សុខ អាន ឧបនាយករដ្ឋមន្រ្តី
រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានថ្លែងនាព្រឹកថ្ងៃទី ១២
ខែ តុលា ឆ្នាំ ២០១១ ដោយកត់សម្គាល់ថា ព្រះរាជាណាចក្រកម្ពុជា នៅតែអាចធានាបានកំណើនសេដ្ឋកិច្ចក្នុងរង្វង់
៦.៥% ក្នុងឆ្នាំ ២០១១ និង ២០១២
បើទោះបីជាស្ថានភាពសេដ្ឋកិច្ចនៅសហរដ្ឋអាមេរិក
និងនៅបណ្តាប្រទេសក្នុងតំបន់អឺរ៉ុបមិនមានស្ថិរភាព
ហើយកម្ពុជាត្រូវប្រឈមជាមួយគ្រោះទឹកជំនន់ក៏ដោយ។
នៅក្នុងសន្និសីទស្តីពី
ពាណិជ្ជកម្ម និងការវិនិយោគឆ្នាំ ២០១១ ៖ បញ្ហាប្រឈមរបស់ពិភពលោក,
ការឆ្លើយតបរបស់កម្ពុជា រយៈពេលពីរថ្ងៃ(១១-១២ ខែតុលា ឆ្នាំ២០១១)
ដែលរៀបចំឡើងដោយសភាពាណិជ្ជកម្មអន្តរជាតិនៃកម្ពុជា(IBC)
នៅសណ្ឋាគារអាំងទែរកុងទីណង់តាល់ រាជធានីភ្នំពេញ ឯកឧត្តមបណ្ឌិត សុខ អាន បានមានប្រសាសន៍ឲ្យដឹងថា ក្រៅពីកំណើននៃការវិនិយោគ
និងសំណង់ កំណើននៃការនាំចេញលើវិស័យវាយនភ័ណ្ឌ និងកសិកម្ម
ចំណូលពីទេសចរណ៍ វិស័យប្រេង និងឧស្ម័ននៅកម្ពុជា ក៏បង្ហាញពីនិន្នាការវិជ្ជមានក្នុងការធ្វើឲ្យកម្ពុជារក្សាបាននូវកំណើនសេដ្ឋកិច្ចផងដែរ។
នៅក្នុងរយៈពេល
៨ ខែ ឆ្នាំ ២០១១ នេះមានគំរោងវិនិយោគចំនួន ៨៧ លើវិស័យឧស្សាហកម្ម កសិកម្ម
និងទូរគមនាគមន៍ ដែលមានតម្លៃសរុបប្រមាណ ៥.៦ ពាន់លានដុល្លារអាមេរិក(US$ 5.6 Billion)
ទទួលបានការអនុម័តពីក្រុមប្រឹក្សាអភិវឌ្ឍន៍កម្ពុជា (CDC)។
តួលេខនេះបង្ហាញពីកំណើនចំនួន ២៥០% ប្រៀបធៀបរយៈពេលដូចគ្នាក្នុងឆ្នាំ
២០១០ ។ ការនាំចេញកើនឡើង ៤៦% មានតម្លៃ ២.១៥ ពាន់លានដុល្លារ(US$ 2.15 billion)
ក្នុងនោះវិស័យវាយនភ័ណ្ឌមាន ៨០% ។ ឯកឧត្តមបណ្ឌិត សុខ អាន បានឲ្យដឹងថា កម្ពុជាត្រូវបានគេទទួលស្គាល់ថា
ជាកូនខ្លាមួយក្នុងវិស័យវាយនភ័ណ្ឌនេះដែរ។
លើវិស័យទេសចរណ៍
កម្ពុជាមានកំណើន ១៥% ដែលអាចប៉ាន់ស្មានបានថា ឆ្នាំ ២០១១
មានភ្ញៀវទេសចរណ៍ជិត ៣ លាននាក់ មកទស្សនាកម្ពុជា ដែលអាចនាំមកនូវចំណូលប្រមាណ
២ ពាន់លានដុល្លារអាមេរិក។ វិស័យសំណង់កើន ៨៤% ពីមួយឆ្នាំទៅមួយឆ្នាំ
មានតម្លៃ ៧៤៧.៧ លានដុល្លារអាមេរិក
ដែលជាការកើនឡើងដ៏ធំចាប់តាំងពីមានវិបត្តិសេដ្ឋកិច្ច ៣ ឆ្នាំ កន្លងទៅ។
សេវាកម្មលើវិស័យធនាគារក៏មានកំណើននៅឆ្នាំ ២០១១ នេះ
ក្នុងនោះប្រាក់កម្ចីកើនឡើងក្នុងអត្រា ១២.៥១% ដែលមានទឹកប្រាក់ប្រមាណ
៣.៦ ពាន់លានដុល្លារអាមេរិក។ ប្រាក់បញ្ញើ និងសន្សំ មានកំណើនក្នុងអត្រា
១១.៤៣% ដែលមានទឹកប្រាក់ ៤.៣ ពាន់លានដុល្លារ។
ទាក់ទងនឹងបញ្ហាប្រេង
និងឧស្ម័ននៅកម្ពុជា
ដែលជាធាតុមួយយ៉ាងសំខាន់ក្នុងការជួយជម្រុញកំណើនសេដ្ឋកិច្ច
ឯកឧត្តមបណ្ឌិត សុខ អាន ដែលជាប្រធានអាជ្ញាធរជាតិប្រេងកាតកម្ពុជាផងដែរ
បានឲ្យដឹងថា ក្រុមការងាររបស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន
បាននឹងកំពុងធ្វើការងារយ៉ាងប្រុងប្រយ័ត្ន ជាមួយក្រុមហ៊ុន
វិនិយោគលើលិខិតបទដ្ឋាននានា ដើម្បីធានាការផលិត និងការប្រមូលពន្ធ។
«ខ្ញុំសូមបញ្ជាក់ថា រាជរដ្ឋាភិបាលមានគោលការណ៍ច្បាស់លាស់គឺ
អគ្គមេបញ្ជាការមួយ ដែលជាសម្តេចអគ្គមហាសេនាបតីតេជោ
ហ៊ុន សែន និងសេនាធិការមួយដែលជារដ្ឋមន្រ្តីក្រសួងសេដ្ឋកិច្ច
និងហិរញ្ញវត្ថុ ក្នុងការគ្រប់គ្រងចាត់ចែងប្រើប្រាស់ចំណូលចំណាយ
ដែលបានមកពីប្រេង និងឧស្ម័ន» ដើម្បីការអភិវឌ្ឍន៍
និងគាំទ្រដល់ការផ្តល់សេវាផ្សេងៗ។ ឯកឧត្តមបណ្ឌិត សុខ អាន បានមានប្រសាសន៍បន្តថា ខ្ញុំត្រូវអរគុណចំពោះដៃគូរផ្តល់ជំនួយអន្តរជាតិដោយភាពអត់ធ្មត់
ដោយផ្តល់អ្នកជំនាញការ និងគាំទ្រការចាត់ចែងលើវិស័យប្រេង និងឧស្ម័នកម្ពុជា
ជំនួសឲ្យការទិតៀន ។ វាមានសារៈប្រយោជន៍ខ្លាំងណាស់ក្នុងពេលដែលយើងបាននិងកំពុងរៀបចំផលិតប្រេង
និងដាក់ចេញនូវគ្រឹះសម្រាប់ការអភិវឌ្ឍន៍វិស័យឧស្សាហកម្មប្រេងនាពេលអនាគត។
សម្រាប់ការផលិតប្រេងលើកដំបូងនៅចុងឆ្នាំ
២០១២ ខាងមុខនេះឯកឧត្តមបណ្ឌិត សុខ អាន
បានមានប្រសាសន៍ថា ឯកឧត្តមសង្ឃឹមថា ក្រុមហ៊ុន ឆេវរ៉ុន
នឹងប្រើប្រាស់បច្ចេកវិទ្យាចុងក្រោយដើម្បីបូមប្រេង
ក៏ដូចជារក្សាស្ថិរភាពនៃការផលិតប្រេង និងឧស្ម័ននៅកម្ពុជាផងដែរ។
ឯកឧត្តមបណ្ឌិត សុខ អាន បានបញ្ជាក់ថា
ផលិតប្រេងនៅកម្ពុជាយ៉ាងហោចក៏អាចចូលរួមចំណែកផ្គត់ផ្គង់
និងរក្សាតម្លៃប្រេងក្នុងអន្តរជាតិផងដែរ។
ឯកឧត្តមបណ្ឌិត
សុខ អាន ក៏បានមានប្រសាសន៍ឲ្យដឹងដែរថា
ដោយផ្អែកតាមអនុស្សរណៈយោគយល់គ្នាឆ្នាំ ២០០១
រាជរដ្ឋាភិបាលទីក្រុងបាងកករបស់លោកជំទាវ យ៉ីង
ឡាក់ រាជរដ្ឋាភិបាលកម្ពុជានឹងបន្តការចរចាដោះស្រាយការរុករកប្រេងនៅក្នុងតំបន់សមុទ្រត្រួតស៊ីគ្នា
ដើម្បីជាប្រយោជន៍រវាងប្រទេសទាំងពីរដោយស្មើភាពនិងមានភាពយុត្តិធម៌។