ចេញផ្សាយថ្ងៃ (ថ្ងៃ សៅរ៏ ទី១១ ខែ សីហា ឆ្នាំ ២០១២ ម៉ោង ០៨:៥៩:០៥ ព្រឹក)
រាជធានីភ្នំពេញ៖ ក្រសួងរៀបចំដែនដី បានព្យួរការងារលោក ផូ វុឌ្ឍី
ប្រធាននាយកដ្ឋានផែនការសេដ្ឋកិច្ច និងហិរញ្ញវត្ថុរបស់ក្រសួង
កាលពីថ្ងៃទី១៩ ខែមិថុនា កន្លងទៅនេះ
ដើម្បីឲ្យគណៈកម្មការសវនកម្មរបស់ក្រសូងធ្វើអធិការកិច្ច ដោយចំហរ
និងមានកិច្ចសហការជាមួយអង្គភាពប្រឆាំងអំពើពុរលួយដើម្បីចាត់
ការតាមនិតិវិធី។
ជាលទ្ធផលមកដល់ពេលនេះ មន្រ្តីរបស់ក្រសួងចំនួន៤រូប
ដែលជាប់សង្ស័យត្រូវបាន អង្គភាពប្រឆាំងអំពើពុករលួយ
បញ្ជូនទៅតុលាកាដើម្បីបន្តការស្រាវជ្រាវ
និងសម្រេចតាមនិតិវិធីនៃច្បាប់។
មន្ត្រីក្រសួងរៀបចំដែនដីនគររូបនីយកម្ម និងសំណង់ ចំនួន៤នាក់
បានត្រូវសមត្ថកិច្ចអង្គភាពប្រឆាំងអំពើពុករលួយ
បញ្ជូនមកអយ្យការអមសាលាដំបូងរាជធានីភ្នំពេញ
ដើម្បីសាកសួរករណីប្រព្រឹត្តអំពើពុករលួយ កេងប្រវ័ញ្ចថវិការដ្ឋ
ពីគម្រោងប្រគល់ដីសម្បទានសង្គមកិច្ច
និងសាងសង់លំនៅស្ថានជូនអតីតយុទ្ធជននៅខេត្តមួយចំនួន
ក្នុងព្រះរាជាណាចក្រកម្ពុជាប្រចាំឆ្នាំ២០១១ ។
មន្ត្រីទាំងបួននាក់នេះមាន ទី១ឈ្មោះ សារ៉េត បូរ៉ាមី, ទី២ឈ្មោះ
ផូរ វុឌ្ឍី, ទី៣ឈ្មោះ មាស ឥស្សរ៉ា និងទី៤ឈ្មោះ ទុយ ឡាយរិទី្ធ
បានត្រូវអង្គភាពប្រឆាំងអំពើពុករលួយ ឃាត់ខ្លួនជាបន្តបន្ទាប់
កាលពីថ្ងៃទី៦ ខែសីហា ឆ្នាំ២០១២ កន្លងទៅ។
ការចាប់បញ្ជូននេះ ត្រូវបានធ្វើឡើងកាលពីរសៀលថ្ងៃទី៨ ខែសីហា ឆ្នាំ២០១២ ។
ដោយ៖ សំរិទ្ធ មេត្តា