ភ្នំពេញ: នៅរសៀលថ្ងៃទី៦ ខែកញ្ញា ឆ្នាំ២០១២ លោកស្រី មូរ សុខហួរ អ្នកតំណាងរាស្ត្រមណ្ឌលកំពត នៃគណបក្សសមរង្ស៊ី បានដាក់លិខិតជូនប្រធានសាលាឧទ្ធរណ៍ ដើម្បីសាលដីកាស្ថាពរចុងក្រោយ។ នេះតាមការបញ្ជាក់របស់ជំនួយការលោកស្រី មូរ សុខហួរ បានប្រាប់ឲ្យដឹង កាលពីព្រឹកថ្ងៃទី៦ ខែកញ្ញា ឆ្នាំ២០១២។
អ្នកជំនាញច្បាប់ បានអះអាងថា តាមនីតិវិធី បន្ទាប់ពីលោកស្រី មូរ សុខហួរ បានទទួលដីកាស្ថាពរ ពីសាលាឧទ្ធរណ៍ហើយនោះ គឺរដ្ឋមន្ត្រីក្រសួងយុត្តិធម៌ ត្រូវបំពេញនីតិវិធីយោងតាមដីកាស្ថាពរ ដែលលោកស្រី មូរ សុខហួរ បានបំពេញ ដោយសាលាឧទ្ធរណ៍ ត្រូវចេញដីកាស្ថាពរចុងក្រោយ ហើយជម្រាបជូនសម្តេច ហេង សំរិន ប្រធានរដ្ឋសភា ដើម្បីឲ្យរដ្ឋសភាប្រគល់នីតិសម្បទា អភ័យឯកសិទ្ធិសមាជិកសភាពេញលេញ ជូនលោកស្រី មូរ សុខហួរ វិញ។
លោកស្រី មូរ សុខហួរ ត្រូវបានរដ្ឋសភាព្យួរអភ័យឯកសិទ្ធិសភា បន្ទាប់ពីមានពាក្យបណ្តឹងរឿងបរិហារកេរ្តិ៍ ដែលប្តឹងដោយសម្តេចនាយករដ្ឋមន្ត្រី ហ៊ុន សែន កាលពីឆ្នាំ២០០៩។ ក្នុងរឿងក្តីនោះ លោកស្រី មូរ សុខហួរ បានចាញ់ក្តី ហើយត្រូវតុលាការពិន័យជាប្រាក់សរុប ១៦,៥ លានរៀល។
ទោះបីជាលោកស្រី មូរ សុខហួរ មិនយល់ព្រមបង់ប្រាក់ពិន័យនោះមែន ប៉ុន្តែខាងតុលាការបានកាត់យកប្រាក់ខែសមាជិកសភារបស់លោកស្រី កាលពីដើមឆ្នាំ២០១១។ ប៉ុន្តែរដ្ឋសភា មកដល់ពេលនេះ មិនទាន់បានផ្តល់អភ័យឯកសិទ្ធិសភា ដល់លោកស្រីឡើយ ព្រោះសំអាងថា នីតិវិធីមិនទាន់រួចរាល់ពីខាងតុលាការ៕