ភ្នំពេញ: រូបសំណាកលោក ជា វិជ្ជា អតីតមេដឹកនាំសហជីពសេរីកម្មករ នៃព្រះរាជាណាចក្រកម្ពុជា ដែលធ្វើពីថ្មភក់ ពណ៌ខៀវ ត្រូវបានឆ្លាក់បាន ៥០ ភាគរយហើយ តែមិនមែនដាក់តាំងនៅសួនច្បារ ជិតវត្តលង្ការទេ។ នេះបើតាមការឲ្យដឹងពីលោក ជា មុនី ប្រធានសហជីពសេរីកម្មករ នៃព្រះរាជាណាចក្រកម្ពុជា កាលពីរសៀលថ្ងៃទី៥ ខែកញ្ញា ឆ្នាំ២០១២។
លោក ជា មុនី ដែលជាប្អូនប្រុស ស្នងតំណែងមេសហជីពបន្តពីលោក ជា វិជ្ជា បានឲ្យដឹងថា "រូបសំណាកលោក ជា វិជ្ជា ត្រូវបានសម្តេចនាយករដ្ឋមន្ត្រី ហ៊ុន សែន សម្រេចអនុញ្ញាតឲ្យសាងសង់ កាលពីថ្ងៃទី៣១ ខែធ្នូ ឆ្នាំ២០១១។ ជាទូទៅ យើងត្រូវទទួលយកសេចក្តីជូនដំណឹង និងចំណារសម្តេចនាយករដ្ឋមន្ត្រី ហ៊ុន សែន"។
លោក ជា មុនី បានបញ្ជាក់ថា "រូបសំណាកនេះ វាមានលក្ខណៈស្មុគស្មាញ។ យើងមិនចង់ធ្វើព័ត៌មានលម្អិត ហើយអត់មានដាក់នៅវត្តលង្ការទេ"។
សូមជម្រាបថា រូបសំណាកលោក ជា វិជ្ជា ត្រូវបានជួលជាងឲ្យឆ្លាក់ តាំងពីថ្ងៃទី២ ខែកក្កដា ឆ្នាំ២០១២ នៅកន្លែងឆ្លាក់រចនាបន្ទាយស្រី២ ស្ថិតក្នុងខេត្តសៀមរាប។ រូបសំណាកនេះ ធ្វើពីប្រភេទថ្មភក់ ពណ៌ខៀវ យកមកពីភ្នំត្បែងមានជ័យ ខេត្តព្រះវិហារ ដោយមានជើងទម្រមួយម៉ែត្រ និងកម្ពស់ ១,៦៨ ម៉ែត្រ នឹងអាចឆ្លាក់រួចរាល់នៅពាក់កណ្តាលខែតុលា ឆ្នាំ២០១២។
លោក ជា វិជ្ជា អតីតប្រធានសហជីពសេរីកម្មករ នៃព្រះរាជាណាចក្រកម្ពុជា ត្រូវបានឃាតកបាញ់សម្លាប់ កាលពីថ្ងៃទី២២ ខែមករា ឆ្នាំ២០០៤ ខណៈពេលដែលលោកកំពុងតែអានកាសែត នៅតូបលក់កាសែត ក្បែររបងវត្តលង្ការ។
ក្នុងសំណើរបស់លោក ជា មុនី ជូនសម្តេចនាយករដ្ឋមន្ត្រី ហ៊ុន សែន គឺបានស្នើសុំសម្តេច អនុញ្ញាតផ្ដល់នូវទីតាំងសមរម្យមួយកន្លែងទំហំប្រមាណ ១ម៉ែត្រក្រឡា ឋិតនៅពយសួនច្បារខាងលិចវិមានឯករាជ្យ ខាងជើងវត្តលង្ការ សម្រាប់សាងសង់រូបសំណាកលោក ជា វិជ្ជា អតីតប្រធានសហជីពសេរីកម្មករ នៃព្រះរាជាណាចក្រកម្ពុជា ដើម្បីរម្លឹកវិញ្ញាណក្ខន្ធ និងចងចាំនូវគុណូបការៈដ៏ថ្លៃថ្លារបស់លោក។ សំណើនោះ ត្រូវបានសម្តេចនាយករដ្ឋមន្ត្រី ចារព្រមព្រៀង កាលពីថ្ងៃទី៣១ ខែធ្នូ ឆ្នាំ២០១១ ហើយសម្តេចបានបញ្ជាឲ្យលោក កែប ជុតិមា អភិបាលរាជធានីភ្នំពេញ ប្រជុំពិភាក្សាជាមួយលោក ជា មុនី ដើម្បីរៀបចំការសាងសង់រូបសំណាកលោក ជា វិជ្ជា។
ក្នុងដំណើការប្រជុំរៀបចំសាងសង់រូបសំណាកលោក ជា វិជ្ជា ត្រូវបានធ្វើឡើងជាបន្តបន្ទាប់ រហូតដល់ចុងក្រោយនេះ មានសេចក្តីសម្រេចពីទីស្តីការគណៈរដ្ឋមន្ត្រីថែមទៀត៕