ភ្នំពេញ: នៅពេលនេះ លោក សម រង្ស៊ី មេដឹកនាំគណបក្សប្រឆាំង ដែលនិរទេសនៅក្រៅប្រទេស មិនអាចវិលមកកាន់ប្រទេសកម្ពុជា ដើម្បីប្រឡូកក្នុងនយោបាយ ដោយផ្ទាល់ឡើងវិញ បានឡើយ។ ក៏ប៉ុន្តែលោក ជាម យៀប សមាជិកសភា មកពីគណបក្សប្រជាជនកម្ពុជា ដែលកំពុងដឹកនាំរាជរដ្ឋាភិបាល បានលើកឡើងថា នៅកម្ពុជា គ្មានអ្នកណា រារាំងលោកសមរង្ស៊ី មិនឲ្យចូលស្រុកទេ។
លោក ជាម យៀប ដែលជាមន្ត្រីជាន់ខ្ពស់គណបក្សប្រជាជនកម្ពុជា បានមានប្រសាសន៍ថា ក្នុងនាមលោកជាសមាជិកគណៈកម្មាធិការអចិន្ត្រៃយ៍ នៃរដ្ឋសភា លោកបានតាមដានរឿងលោកសមរង្ស៊ី ហើយឃើញថា អត់មានអ្នកណាលើកឡើង ឬដេញចោល ឬរារាំងទៅនឹងការចូលស្រុករបស់លោកសមរង្ស៊ីទេ។
លោក ជាម យៀប បានបញ្ជាក់ថា "គ្មានអ្នកណា ឃាត់ឃាំងអីគាត់ទេ។ គាត់ចូលមក។ ប៉ុន្តែគាត់ចូលមក គាត់ត្រូវគោរពអនុវត្ត អ្វីដែលជាសាលដីកា និងសាលក្រមរបស់តុលាការ ដែលជាច្បាប់"។
ចំពោះករណីតុលាការផ្តន្ទាទោសដាក់ពន្ធនាគារ កំបាំងមុខ លោកសមរង្ស៊ី ត្រូវបានលោក ជាម យៀប បញ្ជាក់ជាថ្មីម្តងទៀតថា ករណីលោកសមរង្ស៊ី មិនមែន ជារឿងនយោបាយទេ។ ការងារនេះ ជាការងារបច្ចេកទេសរបស់តុលាការ។
លោក ជាម យៀប បានបញ្ជាក់ថា "អ៊ីចឹងទេ សុំឲ្យគាត់ចូលមក។ គ្មានអ្នកណាទៅឃាត់ឃាំងអីទេ គឺនរណាក៏គ្មានសិទ្ធិទៅឃាត់ឃាំងលោក សម រង្ស៊ី មិនឲ្យគាត់ចូលមកប្រទេសកម្ពុជានោះទេ។ តែបន្ទាប់ពីគាត់មកដល់ គាត់ (សម រង្ស៊ី) ត្រូវតែគោរពតាមអំណាចសាលដីកា ឲ្យបានចប់ជាមុនសិន តែប៉ុណ្ណឹងទេ"។
ការលើកបញ្ជាក់ជាថ្មីរបស់លោក ជាម យៀប ខាងលើនេះ បានធ្វើឡើង ចំពេលដែលខុទ្ទកាល័យគណបក្សសមរង្ស៊ី បានផ្សព្វផ្សាយថា លោកសមរង្ស៊ី គ្រោងនឹងចូលរួមវេទិការបស់ក្រុមប្រឹក្សាអ្នកប្រជាធិបតេយ្យសេរីអាស៊ី ហៅកាត់ថា CALD នៅប្រទេសហ្វីលីពីន នៅសប្ដាហ៍ក្រោយ។ លោក សម រង្ស៊ី នឹងថ្លែងអំពីបរិយាកាសនយោបាយ នៅកម្ពុជា ហើយនៅពេលនោះ លោកនឹងជួបសន្ទនារជាមួយមន្ត្រីជាន់ខ្ពស់របស់ប្រទេសហ្វីលីពីន។
យ៉ាងណាក៏ដោយ លោកស្រី មូរ សុខហួរ ប្រធានលេខាធិការដ្ឋានចលនាប្រជាធិបតេយ្យសង្គ្រោះជាតិ បានលើកឡើងកាលពីថ្ងៃទី៥ ខែកញ្ញា ឆ្នាំ២០១២ ថា ការស្វែងរកកិច្ចជួយអន្តរាគមន៏របស់លោក សម រង្ស៊ី ពីសំណាក់មេដឹកនាំធំៗ នៅក្រៅប្រទេសនោះ បានទទួលលទ្ធផលជាបណ្តើរៗហើយ ដែលអាចផ្តល់លទ្ធភាពឲ្យលោកសមរង្ស៊ី ចូលមកកាន់ប្រទេស ដើម្បីចូលរួមការបោះឆ្នោតជាតិ នៅឆ្នាំ២០១៣ ខាងមុខនេះ៕
