ភ្នំពេញ: សមាជិកសភាគណបក្សសមរង្ស៊ី នៅថ្ងៃទី៦ ខែកញ្ញា ឆ្នាំ២០១២ នឹងដាក់លិខិតតវ៉ាជាថ្មីទៀត ជូនទៅអគ្គមហាអយ្យការអមសាលាឧទ្ធរណ៍ ដើម្បីស្នើសុំអភ័យឯកសិទ្ធិសមាជិកសភារបស់លោកស្រី ត្រឡប់មកវិញ។ ការស្នើសុំនេះ ធ្វើឡើងបន្ទាប់ពីលោកស្រី បានបំពេញកាតព្វកិច្ចចប់សព្វគ្រប់ តាមដីកាបង្គាប់របស់តុលាការ ហើយតុលាការសាលាឧទ្ធរណ៍ ក៏បានសម្រេចកាលពីខែមុនថា យល់ព្រមផ្តល់អភ័យឯកសិទ្ធិសភាជូនលោកស្រីផងដែរ។
លោកស្រី មូរ សុខហួរ សមាជិកសភាមណ្ឌលកំពត របស់គណបក្សសមរង្ស៊ី និងជាប្រធានលេខាធិការដ្ឋាន ចលនាប្រជាធិបតេយ្យសង្គ្រោះជាតិ បានមានឲ្យដឹងនៅថ្ងៃទី៥ ខែកញ្ញា ថា លោកស្រីកំពុងតែធ្វើលិខិត ហើយយកទៅដាក់នៅសាលាឧទ្ធរណ៍ នាថ្ងៃទី៦ ខែកញ្ញា ឆ្នាំ២០១២។ បន្ទាប់ពីបានទទួលលិខិតនោះហើយ ទើបគេចេញសាលក្រមចុងក្រោយ និងប្រគល់អភ័យឯកសិទ្ធិសភាពពេញលេញ ជូនលោកស្រីធ្វើជាអ្នកតំណាងរាស្ត្រ។
លោកស្រី មូរ សុខហួរ បានមានប្រសាសន៍បញ្ជាក់ថា "គេបានប្រាប់ខ្ញុំហើយថា ដីកាសាលក្រមនោះ ចៅក្រមគេមានហើយ នៅតុលាការ គឺចាំតែខ្ញុំសរសេរលិខិតទៅទេ។ ដូច្នេះខ្ញុំនឹងបញ្ជូនលិខិតនោះទៅ"។
លោកស្រី មូរ សុខហួរ បានបញ្ជាក់បន្ថែមថា "យុត្តិធម៌ លុះត្រាតែមានការធានានូវអ្វីដែលជាច្បាប់ និងអ្វីដែលជារដ្ឋធម្មនុញ្ញ។ ខ្ញុំបំពេញតួនាទីខ្ញុំ ជាអ្នកតំណាងរាស្ត្រ។ ខ្ញុំទទួលរងគ្រោះនូវការចោទប្រកាន់ និងរងគ្រោះដោយការកាត់សេចក្តីមិនយុត្តិធម៌ និងមានការគំរាមមិនឲ្យមានមេធាវីជួយការពារក្តីខ្ញុំទេ នៅចំពោះមុខតុលាការ។ ដូច្នេះខ្ញុំចង់ឲ្យមានប្រព័ន្ធយុត្តិធម៌ សម្រាប់ការពារប្រជាពលរដ្ឋខ្មែរទាំងអស់គ្នា ហើយលើសពីនេះទៀត ខ្ញុំចង់ឲ្យស្ថាប័នកំពូល គឺសភាជាតិ ដែលចេះការពារសមាជិករបស់ខ្លួន។ ដូច្នេះបើនិយាយអំពីយុត្តិធម៌ ត្រូវតែមានស្ថាប័នយុត្តិធម៌មួយ ដើម្បីការពារប្រជាពលរដ្ឋទាំង ១៥ លាននាក់"។
ដោយឡែក លោក ជាម យៀប សមាជិកគណៈកម្មាធិការអចិន្ត្រៃយ៍នៃរដ្ឋសភា បានមានប្រសាសន៍បញ្ជាក់ នៅថ្ងៃទី៥ ខែកញ្ញា ថា គណៈកម្មាធិការអចិន្ត្រៃយ៍នៃរដ្ឋសភា នៅមិនទាន់បានទទួលបញ្ហានេះទេ គឺនៅលើក្រសួងយុត្តិធម៌ ឬក៏ព្រះរាជអាជ្ញា ដែលកាន់រឿងក្តីគាត់ (លោកស្រី មូរ សុខហួរ) ស្នើសុំមកសម្តេចប្រធានសភា ប្រគល់អភ័យឯកសិទ្ធិជូនគាត់វិញ ទើបគាត់មាននីតិសម្បទា បន្ទាប់ពីគាត់បានអនុវត្តតាមសាលក្រមកន្លងមក។
សូមបញ្ជាក់ថា សាលាដំបូងរាជធានីភ្នំពេញ បានប្រកាសសាលក្រមកាលពីថ្ងៃទី៤ ខែសីហា ឆ្នាំ២០១០ សម្រេចឲ្យលោកស្រី មូរ សុខហួរ ចាញ់ក្តីសម្តេចនាយករដ្ឋមន្ត្រី ហ៊ុន សែន ហើយត្រូវបង់ប្រាក់សរុបចំនួន ១៦,៥ លានរៀល។ ក្នុងនោះ ៨ លានរៀល ជាប្រាក់សងជំងឺចិត្តទៅឲ្យសម្តេចនាយករដ្ឋមន្ត្រី និង ៨,៥ លានរៀលទៀត ជាប្រាក់ពិន័យបង់ចូលរដ្ឋ។ តែលោកស្រី មូរ សុខហួរ មិនព្រមបង់ប្រាក់ទាំងនោះ រហូតដល់តុលាការជ្រើសយកវិធីកាត់ប្រាក់ខែរដ្ឋសភារបស់លោកស្រី។
លោកស្រី មូរ សុខហួរ ក៏បានប្តឹងឧទ្ធរណ៍ ហើយនៅតុលាការឧទ្ធរណ៍ និងតុលាការកំពូល បានរក្សាការសម្រេចរបស់តុលាការសាលាដំបូងរាជធានីភ្នំពេញ។ ពោលគឺសម្រេចថា លោកស្រី មូរ សុខហួរ ចាញ់ក្តីសម្តេច ហ៊ុន សែន ក្នុងសំណុំរឿងបរិហារកេរ្តិ៍
