ភ្នំពេញ: ជាការឆ្លើយតបនឹងសំណើ របស់គណៈកម្មាធិការជាតិរៀបចំការបោះឆ្នោត (គ.ជ.ប) ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹង ដើម្បីអនុញ្ញាតឲ្យកម្មករនិយោជិត ឈប់សម្រាកពីមួយថ្ងៃ ទៅបីថ្ងៃ ដើម្បីទៅពិនិត្យបញ្ជីឈ្មោះ និងចុះឈ្មោះបោះឆ្នោត។
សេចក្តីប្រកាសព័ត៌មានរបស់ គ.ជ.ប ធ្វើនៅភ្នំពេញ ចុះថ្ងៃទី៥ ខែកញ្ញា ឆ្នាំ២០១២ បង្ហាញថា ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងលេខ២៥០ កប/ស.ជ.ណ ចុះថ្ងៃទី២៩ ខែសីហា ឆ្នាំ២០១២ ណែនាំដល់ម្ចាស់ និងនាយកសហគ្រាស គ្រឹះស្ថានទាំងអស់ ដែលស្ថិតក្នុងដែនអនុវត្តច្បាប់ ស្តីពី ការងារ ឲ្យបង្កលក្ខណៈងាយស្រួល និងអនុញ្ញាតឲ្យកម្មករនិយោជិត បានឈប់សម្រាក ដើម្បីទៅពិនិត្យបញ្ជីឈ្មោះ និងចុះឈ្មោះបោះឆ្នោត តាមកាលរិច្ឆេទដូចខាងក្រោម៖
១-កម្មករ និយោជិត ធ្វើការនៅរាជធានីភ្នំពេញ ឬនៅក្នុងទីរួមខេត្តណាមួយនៃខេត្តទាំង២៣ ហើយត្រូវទៅពិនិត្យបញ្ជីឈ្មោះ និងចុះឈ្មោះបោះឆ្នោត នៅក្នុងរាជធានីភ្នំពេញនោះផ្ទាល់ ឬនៅក្នុងទីរួមខេត្តនោះផ្ទាល់ ត្រូវបានឈប់សម្រាក រយៈពេលមួយថ្ងៃ គឺនៅថ្ងៃទី១២ខែតុលា ឆ្នាំ២០១២។
២-កម្មករ និយោជិត ធ្វើការនៅក្នុងខេត្តណាមួយនៃខេត្តទាំង២៣ ហើយត្រូវទៅពិនិត្យបញ្ជីឈ្មោះ និងចុះឈ្មោះបោះឆ្នោត នៅក្នុងខេត្តនោះផ្ទាល់ ត្រូវបានឈប់សម្រាករយៈពេលពីរថ្ងៃ គឺនៅថ្ងៃទី១២ និងថ្ងៃទី១៣ ខែតុលា ឆ្នាំ២០១២។
៣-កម្មករ និយោជិត ធ្វើការនៅក្នុងរាជធានីភ្នំពេញ ហើយត្រូវបានទៅពិនិត្យបញ្ជីឈ្មោះ និងចុះឈ្មោះបោះឆ្នោត នៅខេត្តណាមួយនៃខេត្តទាំង២៣ ឬធ្វើការនៅខេត្តណាមួយនៃខេត្តទាំង២៣ ហើយត្រូវទៅពិនិត្យបញ្ជីឈ្មោះ និងចុះឈ្មោះបោះឆ្នោតនៅរាជធានីភ្នំពេញ ឬនៅខេត្តណាមួយផ្សេងទៀត ត្រូវបានឈប់សម្រាក រយៈពេលបីថ្ងៃ គឺនៅថ្ងៃទី១១-១២-១៣ ខែតុលា ឆ្នាំ២០១២។
សេចក្តីជូនដំណឹងនេះបានបញ្ជាក់ថា រាល់ការអនុញ្ញាតច្បាប់ជូនកម្មករនិយោជិត ដូចមានចែងខាងលើ និយោជកត្រូវរក្សាទុកប្រាក់ឈ្នួល និងប្រាក់រង្វាន់ធ្វើការទៀងទាត់ជូនកម្មករ និយោជិតនៅដដែល ដោយពុំតម្រូវឲ្យបង្ហាញឯកសារពាក់ព័ន្ធផ្សេងៗ នៅពេលត្រឡប់មកវិញឡើយ។
សេចក្តីប្រកាសក៏បានលើកឡើងថា ចំពោះកម្មករនិយោជិតដែលអវត្តមានហួសពីច្បាប់អនុញ្ញាត ដូចមានចែងខាងលើ ត្រូវទទួលខុសត្រូវតាមបទបញ្ជាផ្ទៃក្នុងរបស់រោងចក្រ សហគ្រាស និងគ្រឹះស្ថានទាំងនោះ។ និយោជក ត្រូវខិតខំបើកប្រាក់ឈ្នួលឲ្យកម្មករ និយោជិត ឲ្យបានមុនថ្ងៃទៅពិនិត្យបញ្ជីឈ្នោះ និងចុះឈ្មោះបោះឆ្នោត បើពុំមានលទ្ធភាពបើកប្រាក់ឈ្នួលទាន់ពេលវេលាទេ សូមអនុញ្ញាតឲ្យកម្មករនិយោជិតខ្ចីប្រាក់ឈ្នួសមួយភាគ (បុរេប្រទាន) ជាមុនសិន។
សូមរម្លឹកថា ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោត ប្រចាំឆ្នាំ២០១២ ធ្វើឡើងចាប់ពីថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២ នៅតាមសាលាឃុំសង្កាត់ទូទាំងប្រទេស។ បញ្ជីឈ្មោះបោះឆ្នោតនេះ នឹងត្រូវប្រើប្រាស់សម្រាប់ការបោះឆ្នោតជ្រើសតាំងតំណាងរាស្ត្រ នៅថ្ងៃទី២៨ ខែកក្កដា ឆ្នាំ២០១៣៕