ខេត្ដបាត់ដំបង ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា នៅតែមានសុទិដ្ឋិនិយមការពារកម្មសិទ្ធិស្របច្បាប់បញ្ហាដីធ្លីរបស់ប្រជាពលរដ្ឋ នៅក្របខ័ណ្ណទូទាំងប្រទេស និងដកហូតពីក្រុមហ៊ុនសម្បទានដីធ្លីមួយចំនួន បន្ទាប់ពីមានវិវាទ ប៉ះពាល់ទៅលើដីធ្លីរបស់ប្រជាពលរដ្ឋ ។
សម្ដេចតេជោ ហ៊ុន សែន បានថ្លែងនៅក្នុងពិធីចែកប័ណ្ណកម្មសិទ្ធិដល់ប្រជាពលរដ្ឋក្នុងស្រុកគាស់ក្រឡ ខេត្ដបាត់ដំបង កាលពីព្រឹកថ្ងៃអាទិត្យ ទី៣០ ខែកញ្ញា ឆ្នាំ២០១២ថា ប្រសិនបើក្រុមហ៊ុនព្រៃសម្បទានសេដ្ឋកិច្ចមានវិវាទដីធ្លី ជាមួយប្រជាពលរដ្ឋ ក៏ដូចជាប្រជាពលរដ្ឋមានជម្លោះដីធ្លីជាមួយដីដែលគ្រប់គ្រងដោយរាជរដ្ឋាភិបាល គឺត្រូវដោះស្រាយដីធ្លីនេះ ជូនទៅប្រជាពលរដ្ឋវិញ ប៉ុន្ដែរាជរដ្ឋាភិបាលមិនអាចដោះស្រាយបានទេ ចំពោះវិវាទបញ្ហាដីធ្លីរវាងប្រជាពលរដ្ឋនឹងប្រជាពលរដ្ឋ ដែលសម្ដេចសំដៅវិវាទបែបនេះ មានតែស្ថាប័នតុលាការប៉ុណ្ណោះ ។
ប្រជាពលរដ្ឋស្ទើរតែក្របខ័ណ្ឌទូទាំងប្រទេសបានអបអរសាទរ ចំពោះអនុសាសន៍របស់សម្ដេចតេជោ ដែលបានគិតគូរចំពោះការគ្រប់គ្រងដីកម្មសិទ្ធិស្របច្បាប់របស់ប្រជាពលរដ្ឋ ។
សម្ដេចនាយករដ្ឋមន្ដ្រី ហ៊ុន សែន បានថ្លែងរិះគន់ទៅលើមតិយោបល់របស់ក្រុមអង្គការសង្គមស៊ីវិល កន្លងមកដែលបានជួបប្រជុំគ្នានៅសណ្ឋាគារកាំបូឌីយ៉ាណា រាជធានីភ្នំពេញ កាលពីថ្ងៃទី២៥ ខែកញ្ញា ឆ្នាំ២០១២ ដើម្បីចងក្រងទៅកាន់រដ្ឋាភិបាល និងម្ចាស់ជំនួយដែលមានការជំរុញឱ្យរដ្ឋាភិបាលផ្ដល់កម្មសិទ្ធិដីធ្លីដល់ប្រជាពលរដ្ឋ ស្របពេលដែលសម្ដេចបានមានការគិតគូរខ្ពស់ក្នុងបញ្ហានេះ ។
អង្គការសង្គមស៊ីវិល ហាក់ដូចជាព្យាយាមរកឱកាសចំណេញណាមួយពីប្រជាពលរដ្ឋ បន្ទាប់ពីក្រុមយុវជនស្ម័គ្រចិត្ដចុះវាស់វែងដីធ្លី ជូនប្រជាពលរដ្ឋ និងមានការដោះដូរគោលនយោបាយនេះ បែរជាសង្គមស៊ីវិល ចាប់ផ្ដើមកេងយកផលចំណេញចំពោះបេសកកម្មរបស់ខ្លួនគិតគូរពីដីធ្លីរបស់ប្រជាពលរដ្ឋ ។
អង្គការសង្គមស៊ីវិល ហាក់ដូចជាព្យាយាមរកឱកាសចំណេញណាមួយពីប្រជាពលរដ្ឋ បន្ទាប់ពីក្រុមយុវជនស្ម័គ្រចិត្ដចុះវាស់វែងដីធ្លី ជូនប្រជាពលរដ្ឋ និងមានការដោះដូរគោលនយោបាយនេះ បែរជាសង្គមស៊ីវិល ចាប់ផ្ដើមកេងយកផលចំណេញចំពោះបេសកកម្មរបស់ខ្លួនគិតគូរពីដីធ្លីរបស់ប្រជាពលរដ្ឋ ។
ឆ្លើយតបនិងទស្សនកេងចំណេញនយោបាយនេះ សម្ដេចតេជោ បានមានប្រសាសន៍នៅក្នុងពិធីចែកប័ណ្ណកម្មសិទ្ធិដល់ប្រជាពលរដ្ឋ នៅស្រុកគាស់ក្រឡ ខេត្ដបាត់ដំបង ដែលសំដៅទៅលើសង្គមស៊ីវិល ចូលចិត្ដកេងចំណេញនយោបាយនោះថា “គេថា ប្រជុំដើម្បីប្រមូលមតិជូនទៅដៃគូអភិវឌ្ឍន៍ដើម្បីឱ្យអនុសាសន៍ទៅរាជរដ្ឋាភិបាល ក្នុងនោះមានចំណុចដែលគេលើកឡើងថា សូមផ្ដល់កម្មសិទ្ធិដីធ្លីឱ្យប្រជាពលរដ្ឋ ឱ្យបានឆាប់ៗ ” សម្ដេចបន្ដថា ខ្ញុំសូមផ្ដាំទៅវិញ បើទោះបីជាមាន់មិនរងាវ ថ្ងៃក៏គង់តែលេចដែរ...សូមអស់លោកកុំព្យាយាមទម្លាយទ្វារនៅពេលទ្វារវាបើកចំហរ...ម៉េចអត់ការងារធ្វើឬ? ចាំបាច់ធ្វើអីចឹង?។
បន្ទាប់ពីសម្ដេចបានលើកឡើងអំពីការទាញយកផលចំណេញរបស់សង្គមស៊ីវិល លើបញ្ហាវាស់វែងដីធ្លីជូនប្រជាពលរដ្ឋនេះ សម្ដេចក៏បានមានប្រសាសន៍លើកឡើងអំពីកិច្ចខិតខំប្រឹងប្រែងរបស់ក្រុមយុវជនស្ម័គ្រចិត្ដដែលក្មួយៗវីរៈរបស់យើងបានខំប្រឹងទាំងយប់ទាំងថ្ងៃ ជាមួយមន្ដ្រីជំនាញ កម្លាំងប្រដាប់អាវុធក្នុងការងារទាំងភ្លៀងទាំងផ្គរប្រឹងប្រែងធ្វើការណាស់ បែរជាអស់លោកមានលុយមានកាក់ទៅប្រជុំនៅកាំបូឌីយ៉ាណាទៅវិញ ។ ចំណុចនេះ សម្ដេចចង់បញ្ជាក់ថា យើងកំពុងធ្វើកិច្ចការនេះ មិនសមញ្ញ មិនធម្មតា ។ បានន័យថា កិច្ចខិតខំប្រឹងប្រែងរបស់សម្ដេចទៅកាន់ប្រជាពលរដ្ឋលើគោលនយោបាយវាស់វែងដីធ្លីជូនប្រជាពលរដ្ឋនៅក្របខ័ណ្ឌទូទាំងប្រទេស ប្រកបដោយការទទួលគាំទ្រពីប្រជាពលរដ្ឋនិងបញ្ចប់វិវាទដីធ្លី ប្រជាពលរដ្ឋជាមួយក្រុមហ៊ុនដីសម្បទានសេដ្ឋកិច្ច និងប្រជាពលរដ្ឋជាមួយនឹងដីគ្រប់គ្រងដោយរាជរដ្ឋាភិបាលត្រូវបានបញ្ចប់ក្រុមសង្គមស៊ីវិលទាំងនោះ អត់មានការធ្វើងារធ្វើទេអី ៕