ភ្នំពេញ ៖ ព័ត៌មាននៃការផ្លាស់ប្ដូរស្នងការនគរបាលរាជធានីភ្នំពេញត្រូវបានផ្សព្វផ្សាយតាមប្រព័ន្ធព័ត៌មានមួយចំនួន ប៉ុន្តែទោះបីជាយ៉ាងណាក៏ដោយ នៅមិនទាន់មានប្រភពច្បាស់ការពីករណីនោះនៅឡើយទេ។
កាលពីព្រឹកថ្ងៃទី២៩ ខែកញ្ញា ឆ្នាំ២០១២ បណ្ដាញផ្សព្វផ្សាយមួយចំនួនបានលើកឡើងថា មានការកែសម្រួលសមាសភាពនគរបាលរាជធានីភ្នំពេញនៅក្នុងនោះលោកឧត្តមសេនីយ៍ទូច ណារ៉ុថ ស្នងការនគរបាលរាជធានីភ្នំពេញត្រូវបានផ្លាស់ប្ដូរទៅជាប្រធាននាយកដ្ឋានអង្គរក្ស ហើយត្រូវបានដំឡើងជាឧត្តមសេនីយ៍ទោ(ផ្កាយ២)។ ចំណែកលោក ឧត្តមសេនីយ៍ឯក ជួន សុវណ្ណ ដែលជាអគ្គស្នងការរងនគរបាលជាតិ ត្រូវផ្ដល់តួនាទីបន្ថែមជាស្នងការនគរបាលរាជធានីភ្នំពេញ។
បើយោងតាមប្រភពនោះបានបញ្ជាក់ថា សេចក្ដីសម្រេចកែសម្រួលកម្លាំងនគរបាលនេះ ត្រូវបានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានចុះហត្ថលេខារួចហើយ តាមសំណើរបស់ឯកឧត្តមឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ។
ទាក់ទិននឹងតៅនឹងព័ត៌មានខាងលើនេះ លោក ទូច ណារ៉ុថ ស្នងការនគរបាលរាជធានីភ្នំពេញដែលព័ត៌មានខាងលើអះអាងថា នឹងត្រូវផ្លាស់ប្ដូរចេញនោះមិនអាចសុំអត្ថាធិប្បាយបានទេដោយខ្សែទូរស័ព្ទរបស់លោកចំនួន២មិនមានអ្នកទទួល។ ប៉ុន្តែលោកបាននិយាយប្រាប់ព័ត៌មានក្នុងស្រុកថា ពិតជាមានការផ្លាស់ប្ដូរតំណែងរបស់លោកមែន ហើយតួនាទីដែលផ្លាស់ប្ដូរនោះគឺលោកត្រូវទៅកាន់ជាប្រធាននាយកដ្ឋានអង្គរក្សក្រសួងមហាផ្ទៃជំនួស លោកឧត្តមសេនីយ៍ ជិន សារឿន។
ចំណែកឧត្តមសេនីយ៍ គាត ចាន់ថារិទ្ធ អ្នកនាំពាក្យក្រសួងមហាផ្ទៃមិនទាន់សុំអត្ថាធិប្បាយបានទេកាលពីរសៀលថ្ងៃទី២៩ ខែកញ្ញាឆ្នាំ២០១២។
រីឯលោក ជួន សុវណ្ណ អគ្គស្នងការរងនគរបាលជាតិដែលមានព័ត៌មានថា នឹងត្រូវបន្ថែមតំណែងជាស្នងការនគរបាលរាជធានីភ្នំពេញនោះ បានមានប្រសាសន៍ប្រាប់កម្ពុជាថ្មីថា លោកក៏បានទទួលព័ត៌មានខាងលើនេះដែរ តែមិនទាន់ទទួលលិខិតស្នាមពិតប្រាកដណាមួយនៅឡើយទេ។ លោក បញ្ជាក់ថាមានអ្នកសារព័ត៌មានជាច្រើនបានសួរគាត់ពីរឿងនោះ ហើយអ្នកសារព័ត៌មានប្រាប់គាត់វិញថា មានសេចក្ដីសម្រេចនោះហើយ។
លោកឧត្តមសេនីយ៍ជួន សុវណ្ណ បានអះអាងដែរថា«មានមិត្តភក្ដិជាច្រើន ក៏បាននិយាយអំពីព័ត៌មាននេះដែរ តែលោកមិនទាន់ទទួលបានអនុក្រឹត្យ ឬសេចក្ដីសម្រេចជាក់លាក់ណាមួយទេ»។
គួររំលឹកថា ព័ត៌មាននៃការដោះដូរស្នងការនគរបាលរាជធានីភ្នំពេញនេះ បានលេចឮជាច្រើនលើកច្រើនសារួចមកហើយ ប៉ុន្តែហាក់ដូចជាមិនទាន់ចេញជារូបរាងនៅឡើយ៕
កោះកែវ