ខេត្តកណ្តាលៈ នៅទីលានហ្វឹកហាត់នៃស្នងការដ្ឋាននគរបាលខេត្តកណ្តាលកាលពីព្រឹកថ្ងៃទី២៩ខែកញ្ញាឆ្នាំ២០១២ មានរៀបចំពិធីបិទវគ្គបំពាក់បំប៉នជំនាញទប់ស្កាត់បាតុកម្ម កូដកម្ម ដោយមានការអញ្ជើញចូលជាអធិបតីពីលោកឧត្តមសេនីយ៍ត្រី អ៊ាវ ចំរើន ស្នងការនគរបាល ខេត្តកណ្តាល ស្នងការរង និងនាយការិយាល័យជាច្រើននាក់ចូលរួម បន្ទាប់ពីសិក្ខាកាមចំនួន ១២០នាក់ បានហ្វឹកហាត់បំពាក់បំប៉នជំនាញខាងលើរយៈពេល៣០ថ្ងៃដោយមានគ្រូមកពីអគ្គស្នងការនគរបាលជាតិមកបង្ហាត់បង្រៀន។
បន្ទាប់ពីកម្លាំងនគរបាលទាំង១២០នាក់ បានបញ្ចេញជំនាញបទពិសោធន៍ដែលបានហ្វឹកហាត់ កន្លងមកជូនគណអធិបតីរួចមក លោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្ត កណ្តាលបានថ្លែងទៅកាន់កងកម្លាំងថា ការបញ្ចេញបទពិសោធន៍របស់កងកម្លាំងដែលបានហ្វឹកហាត់អស់រយៈពេល៣០ថ្ងៃកន្លងមកនេះ ឃើញថា កងកម្លាំងទាំងអស់ទទួលបានការ ចេះដឹងខ្ពស់ ។
លោក អ៊ាវ ចំរើន បានបញ្ជាក់ថា កងកម្លាំងទាំងអស់ត្រូវប្រើយុទ្ធវិធីនិងយុទ្ធសាស្ត្រសម្រាប់ទប់ទល់និងសកម្មចលាចលដល់វិទ្ធង្សនា ហើយជាក់ស្តែងកងកម្លាំងត្រូវផ្សាភ្ជាប់ជាមួយនឹងសកម្មភាពបង្កចលាចលជាក់ស្តែងទៀត ប៉ុន្តែកងកម្លាំងទាំងអស់មិនត្រូវយកទៅទប់ទល់ជាមួយកម្មករកម្មការិនីធ្វើកូដកម្មដើម្បីទាមទារប្រាក់បៀវត្សរ៍ដែល ជាសកម្មភាពបង្កឡើង ដោយអហឹង្សានោះទេ ។ កងកម្លាំងដែលបានហ្វឹកហាត់នេះគឺសម្រាប់តែទប់ទល់ទៅនឹងកម្លាំងអមិត្តដែលបង្កជាសកម្មភាពវិទ្ធង្សនាជាចលនាប្រឆាំងដោយហឹង្សា ដែលធ្វើ ឲ្យសង្គមជាតិយើងអស្ថេរភាព។
លោក អ៊ាវ ចំរើន បានបន្តថា លោកនឹងសុំគោលការណ៍ពីនាយឧត្តមសេនីយ៍នេត សាវឿន អគ្គស្នងការនគរបាលជាតិដើម្បីបើកវគ្គបំពាក់បំប៉នជំនាញខាងលើមួយវគ្គទៀត ចំនួន១២០ នាក់ ដើម្បីឲ្យកងកម្លាំងគ្រប់បណ្តាស្រុក ក្រុងទាំង១១មកចូលរួមហ្វឹតហាត់ជំនាញនេះបន្ត ទៀត។
លោកវរសេនីយ៍ត្រី ឈាង ប៊ុនហុង គ្រូបង្វឹកមកពីអគ្គស្នងការដ្ឋាននគរបាលជាតិបានឲ្យដឹងថា ការហ្វឹកហាត់រយៈពេល៣០ថ្ងៃដល់កងកម្លាំងនគរបាលខេត្តកណ្តាលចំនួន១២០នាក់នេះ លោកបានបង្ហាត់បង្រៀនដល់កងកម្លាំងនូវវិន័យ០០៦ របស់កងកម្លាំងនគរបាលជាតិ លំហាត់របៀបនិងខ្លឹមសាមេរៀនការពារកូដកម្មបាតុកម្ម។ សិក្ខាកាមដែលបានចូលហ្វឹកហាត់ ជាក់ស្តែងនៅលើទីលាននេះ ឃើញថាកងកម្លាំងនគរបាលទាំងអស់បានយកចិត្តទុកដាក់ខ្ពស់ ក្នុងការហ្វឹកហាត់បានល្អប្រសើរ។
លោកស្នងការរង សែ សារឿន បានឲ្យដឹងដែរថា កងកម្លាំងដែលបានមកចូលហ្វឹក ហាត់ចំនួន១២០នាក់រយៈពេល៣០ថ្ងៃនេះ លោកឧត្តមសេនីយ៍ត្រី អ៊ាវ ចំរើន ស្នងការនគរ បាលខេត្តកណ្តាលបានជួយឧបត្ថម្ភដល់កងកម្លាំងម្នាក់ៗចំនួន១៥ម៉ឺនរៀន ។ លោក សែ សារឿន បានបន្តថា បន្ទាប់ពីពិធីបិទវគ្គរួចគណៈស្នងការបានធ្វើពិធីជប់លៀងដល់កងកម្លាំងទាំងអស់នោះផងដែរ៕