ភ្នំពេញ: ក្រុមមន្ត្រីអាជ្ញាធរសង្កាត់បឹងទំពុន ខណ្ឌមានជ័យ រាជធានីភ្នំពេញ កាលពីព្រលប់ថ្ងៃទី៣០ ខែកញ្ញា ឆ្នាំ២០១២ បានចូលទៅហាមប្រាម មិនអនុញ្ញាតឲ្យក្រុមប្រជាពលរដ្ឋ ចូលទៅស្នាក់នៅស្ថានីយវិទ្យុសំបុកឃ្មុំ អេហ្វអឹម ១០៥ របស់លោកម៉មសូណង់ដូ ដើម្បីចូលរួមស្តាប់ចៅក្រមតុលាការក្រុងភ្នំពេញ ប្រកាសសាលក្រម ក្នុងករណីលោក ម៉ម សូណង់ដូ នៅព្រឹកថ្ងៃទី១ ខែតុលា ឆ្នាំ២០១២ឡើយ។ នេះយោងតាមប្រសាសន៍របស់លោកស្រី ឌិន សុផាណារ៉ា ប្រពន្ធរបស់លោក ម៉ម សូណង់ដូ នៅរសៀលថ្ងៃទី៣០ ខែកញ្ញា ឆ្នាំ២០១២។
លោកស្រី ឌិន សុផាណារ៉ា បានមានប្រសាសន៍ឲ្យដឹងបន្តថា មន្ត្រីអាជ្ញាធរ រួមមាន មេភូមិត្នោតជ្រុំ និងមន្ត្រីនគរបាលសង្កាត់បឹងទំពុន បានចូលមកក្នុងគេហដ្ឋានរបស់លោកស្រី (ស្ថានីយវិទ្យុសំបុកឃ្មុំ អេហ្វអឹម១០៥ ) នៅរសៀលថ្ងៃអាទិត្យនេះ ដោយចូលមកស្រង់ឈ្មោះប្រជាពលរដ្ឋ ដែលមកពីបណ្តាខេត្តមួយចំនួន មានគ្នាប្រមាណ ១០០ នាក់ មកស្នាក់នៅក្នុងផ្ទះរបស់អ្នកស្រី។ មន្ត្រីអាជ្ញាធរទាំងនោះ មិនអនុញ្ញាតឲ្យ ប្រជាពលរដ្ឋ ដែលសុទ្ធតែជាមនុស្សចាស់ ស្នាក់នៅក្នុងផ្ទះ ដែលជាស្ថានីយវិទ្យុសំបុកឃ្មុំច្រើននាក់ទេ។
លោកស្រី ឌិន សុផាណារ៉ា បានមានប្រសាសន៍បន្តថា ដោយសារតែមានការចូលមកហាមប្រាមពីសំណាក់អាជ្ញាធរមូលដ្ឋាន ដែលមិនអនុញ្ញាតឲ្យប្រជាពលរដ្ឋទាំងនោះ ស្នាក់នៅស្ថានីយវិទ្យុសំបុកឃ្មុំ ទើបមានប្រជាពលរដ្ឋខ្លះ បានសម្រេចចចិត្ត ឡើងឡានវិលត្រឡប់ទៅស្រុកកំណើតរបស់គាត់វិញ នៅល្ងាចថ្ងៃនេះ។
លោកស្រីភរិយាលោក ម៉ម សូណង់ដូ បានបន្តថា ពលរដ្ឋទាំងនោះ ខ្លះមកពីខេត្តកំពង់ស្ពឺ តាកែវ កំពង់ចាម ក្រចេះ កំពង់ធំ និងព្រៃវែង ជាដើម។
សូមបញ្ជាក់ថា នៅព្រឹកថ្ងៃទី១ ខែតុលា ឆ្នាំ២០១២ ចៅក្រមសាលាដំបូងរាជធានីភ្នំពេញ នឹងប្រកាសសាលក្រមផ្តន្ទាទោសលោកម៉ម សូណង់ដូ និងពលរដ្ឋជាច្រើននាក់ផ្សេងទៀត បន្ទាប់ពីសវនាការរយៈពេល ៣ថ្ងៃកន្លះ ចាប់តាំងពីថ្ងៃទី១១ ដល់ព្រឹកថ្ងៃទី១៤ ខែកញ្ញា ឆ្នាំ២០១២។
ក្នុងសវនាការនោះ មានអ្នកគាំទ្រលោកម៉មសូណង់ដូ ក្នុងនាមសមាគមអ្នកប្រជាធិបតេយ្យជាច្រើនរយនាក់ និងក្រុមសង្គមស៊ីវិល បានចូលរួមតាមដានសវនាការ។ ក៏ប៉ុន្តែប៉ូលិសបិទផ្លូវ មិនឲ្យក្រុមពលរដ្ឋ បានចូលទៅជិតរបងតុលាការ ដែលស្ថិតនៅខាងជើងស្តាតអូឡាំពិក ក្នុងរាជធានីភ្នំពេញឡើយ។
ចាប់តាំងពីសវនាការកាត់ទោសលោក ម៉ម សូណង់ដូ និងជនជាប់ចោទដទៃទៀត កាលពីថ្ងៃទី១១ ខែកញ្ញា ឆ្នាំ២០១២ មកដល់ថ្ងៃទី១៣ ខែកញ្ញា ឆ្នាំ២០១២ គឺមានជនជាប់ចោទ ១០នាក់ រាប់ទាំងលោក ម៉ម សូណង់ដូ ត្រូវបានតុលាការសួរដេញដោល។ ក្នុងនោះ មានសាក្សី ដែលមានចំនួនសរុប ២៣នាក់ ក៏ត្រូវបានសួរនាំ។
សំណុំរឿងក្តីជម្លោះដីធ្លី បង្កើតតំបន់អបគមន៍ ប្រឆាំងរដ្ឋាភិបាល នៅខេត្តក្រចេះ ត្រូវបានបើកសវនាការ ចាប់តាំងពីថ្ងៃអង្គារ ទី១១ ខែកញ្ញា ឆ្នាំ២០១២ ដោយមានជនជាប់ចោទសរុបចំនួន ១៤នាក់ រាប់ទាំងលោក ម៉ម សូណង់ដូ និងឈ្មោះ ប៊ុន រដ្ឋា ដែលកំពុងគេចខ្លួន។
មានអាយុ ៧២ឆ្នាំ លោក ម៉ម សូណង់ដូ ត្រូវបានចោទប្រកាន់ ថាជាមេខ្លោងបង្កើតតំបន់អបគមន៍ ពាក់ព័ន្ធនឹងជម្លោះដី នៅក្នុងស្រុកឆ្លូង ខេត្តក្រចេះ។ ប៉ូលិសបានចាប់ខ្លួនលោក ម៉ម សូណង់ដូ កាលពីថ្ងៃទី១៥ ខែកក្កដា ឆ្នាំ២០១២។
នៅក្នុងសវនាការ លោក ម៉ម សូណង់ដូ បានបដិសេធនូវរាល់ការចោទប្រកាន់លើរូបលោក ពាក់ព័ន្ធនឹងជម្លោះដី ដែលរដ្ឋាភិបាលចោទប្រកាន់ថា លោកជាមេខ្លោង ក្នុងការបង្កើតតំបន់អបគមន៍ នៅក្នុងស្រុកឆ្លូង ខេត្តក្រចេះ។
ក្នុងរឿងក្តីជម្លោះដីធ្លី នៅខេត្តក្រចេះ តុលាការបានចោទប្រកាន់លោក ម៉ម សូណង់ដូ ក្នុងបទល្មើស ៤ ករណី រួមមាន៖ ទី១-បទផ្តួចផ្តើមគំនិតប្រឆាំងអ្នករាជការសាធារណៈ ទី២-ធ្វើកុបកម្ម ជ្រៀតជ្រែកខុសច្បាប់ នៅក្នុងការបំពេញមុខងារសាធារណៈ ទី៣-ញុះញង់ឲ្យប្រជាពលរដ្ឋ កាន់កាប់អាវុធខុសច្បាប់ និងទី៤-ប្រឆាំងនឹងអាជ្ញាធរស្របច្បាប់ ដែលមានចែងក្នុងមាត្រាមួយចំនួន នៃក្រមព្រហ្មទណ្ឌ។
ការចោទប្រកាន់លោក ម៉ម សូណង់ដូ គឺតុលាការបានភ្ជាប់នឹងករណីជម្លោះដី ដែលបង្កឡើងដោយប្រជាពលរដ្ឋមួយក្រុម ដែលជាសាខាសមាគមអ្នកប្រជាធិបតេយ្យ នៅក្នុងភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។ ករណីជម្លោះដីនោះ ត្រូវបានអាជ្ញាធររដ្ឋាភិបាលចោទប្រកាន់ថា អ្នកទាំងនោះចាប់ដីរដ្ឋ បង្កើតតំបន់អបគមន៍ ហើយត្រូវបានរដ្ឋាភិបាលបង្ក្រាប និងបណ្តេញចេញ កាលពីថ្ងៃទី១៦ ខែឧសភា ឆ្នាំ២០១២ បណ្តាលឲ្យក្មេងស្រីម្នាក់ស្លាប់ និងមនុស្សជាច្រើនបានរត់គេចខ្លួន ពីការតាមចាប់របស់តុលាការខេត្តក្រចេះ។ ក្រោយមក សំណុំរឿងនោះ ត្រូវបានផ្ទេរមកសាលាដំបូងរាជធានីភ្នំពេញ៕