ខេត្តបាត់ដំបង: ប្រជាពលរដ្ឋ ១.៥៩១ គ្រួសារ បានទទួលប័ណ្ណកម្មសិទ្ធិ ចំនួន ២.១៧៣ ប័ណ្ណ ដែលមានផ្ទៃដីសរុបចំនួន ១០.៣០៥ ហិកតា ពីសម្តេចនាយករដ្ឋមន្ត្រី ហ៊ុន សែន ក្នុងពិធីជួបជុំ នាព្រឹកថ្ងៃអាទិត្យ ទី៣០ ខែកញ្ញា ឆ្នាំ២០១២ នៅស្រុកគាស់ក្រឡ ខេត្តបាត់ដំបង។
ពិធីចែកប័ណ្ណកម្មសិទ្ធិដីធ្លីដល់ប្រជាពលរដ្ឋ បន្ទាប់ពីក្រុមយុវជនស្ម័គ្រចិត្តសម្តេចតេជោ ហ៊ុន សែន ចុះវាស់វែង ធ្វើប័ណ្ណកម្មសិទ្ធិស្របច្បាប់ នៅព្រឹកថ្ងៃអាទិត្យនេះ ជាលើកទី២ហើយ ដែលសម្តេចនាយករដ្ឋមន្ត្រី ហ៊ុន សែន បានអញ្ជើញផ្តល់ប័ណ្ណកម្មសិទ្ធិផ្ទាល់ដៃ ដល់ប្រជាពលរដ្ឋ បន្ទាប់ពីសម្តេច បានចុះទៅចែកប័ណ្ណកម្មសិទ្ធិ លើកដំបូង នៅស្រុកស្នួល ខេត្តក្រចេះ កាលពីថ្ងៃទី២១ ខែកញ្ញា ឆ្នាំ២០១២។
របាយការណ៍នៅខេត្តបាត់ដំបង ស្តីពីសកម្មភាពរបស់ក្រុមយុវជនស្ម័គ្រចិត្ត វាស់វែងដី ធ្វើប័ណ្ណកម្មសិទ្ធិដល់ប្រជាពលរដ្ឋ គិតត្រឹមថ្ងៃទី២២ ខែកញ្ញា ឆ្នាំ២០១២ ត្រូវបានសម្តេចនាយករដ្ឋមន្ត្រី ហ៊ុនសែន លើកឡើងថា ប្រកាសតំបន់វិនិច្ឆ័យ ១៦ ទីតាំង បំពេញសលាកប័ត្រ ១៨.៦៣០។ គ្រួសារបញ្ចូលក្នុងសំរង់បញ្ជីឈ្មោះ ១៨.៥០០ គ្រួសារ។ ចំនួនគ្រួសារមានក្បាលដី ចំនួន ១២.៧២៥ គ្រួសារ។ វាស់វែងបាន ២៣.០៤៣ ក្បាលដី។ គូសក្បាលដីបាន ១៩.៦៨៨ ក្បាលដី ស្មើនឹង ៣១.១៥២ ហិកតា និងបំពេញបែបបទទិន្នន័យក្បាលដី ១៨.៦១៥ ច្បាប់។ បិទផ្សាយសាធារណៈឯកសារនៃការវិនិច្ឆ័យបាន ១២ ភូមិ នៃ ៨ ឃុំ ស្មើនឹង ៧.៦៨៤ ក្បាលដី និងចែកប័ណ្ណកម្មសិទ្ធិជូនប្រជាពលរដ្ឋ ៤ ទីតាំង គិតទាំងទីតាំងនៅឆ្នាលមាន់ផង មាន ១.៥៩១ គ្រួសារ ស្មើនឹងប័ណ្ណកម្មសិទ្ធិ ២.១៧៣ ប័ណ្ណ ដែលមានផ្ទៃដី ១០.៣០៥ ហិកតា។
សម្តេចនាយករដ្ឋមន្ត្រី ហ៊ុនសែន ក៏បានប្រកាសថា ក្រុមយុវជនចុះវាស់វែង ធ្វើប័ណ្ណកម្មសិទ្ធិដីធ្លី គិតមកដល់ពេលនេះ នៅទូទាំងប្រទេស មានផ្ទៃដីទំហំ ១.៨៧០.០០០ ហិកតា និងប្រជាពលរដ្ឋ ៤៧៨.៩២០ គ្រួសារ។ រីទំហំក្បាលដី ប្រហែលជា ៧០០.០០០ ក្បាលដី។
មកដល់ពេលនេះ សម្តេចហ៊ុនសែន បានប្រកាសថា គិតត្រឹមថ្ងៃទី២៩ ខែកញ្ញា ឆ្នាំ២០១២ តាមតួលេខរបស់ក្រសួងរៀបចំដែនដី នគរូបនីយកម្ម និងសំណង់ គឺក្រុមយុវជនស្ម័គ្រចិត្ត និងមន្ត្រីជំនាញ បានធ្វើសកម្មភាពលើ ១៨៣ ឃុំ ហើយការបិទផ្សាយសាធារណៈ មាន ២៦.៨២៣ ក្បាលដីហើយ ដែលមានទំហំដីចំនួន ៤៣.៧២២ ហិកតា។ ក្នុងនោះ ប័ណ្ណកម្មសិទ្ធិ ដែលបានចែកដល់ប្រជាពលរដ្ឋ បានចំនួន ១.៦៤៨។ ការចែកប័ណ្ណកម្មសិទ្ធិដីធ្លី លើកដំបូង ក្រោយពីយុវជនស្ម័គ្រចិត្តចុះវាស់វែង កាលពីថ្ងៃទី២៨ ខែមិថុនា ឆ្នាំ២០១២ គឺសម្តេចនាយករដ្ឋមន្ត្រី ហ៊ុន សែន បានចែកប័ណ្ណផ្ទាល់ដៃដល់ប្រជាពលរដ្ឋ នៅខេត្តក្រចេះ កាលពីថ្ងៃទី២១ ខែកញ្ញា ឆ្នាំ២០១២៕
