ភ្នំពេញ: សម្តេចនាយករដ្ឋមន្ត្រី ហ៊ុន សែន បានរិះគន់លើមតិយោបល់របស់ក្រុមអង្គការសង្គមស៊ីវិល ដែលបានជួបប្រជុំគ្នា នៅសណ្ឋាគារ កាំបូឌីយ៉ាណា ក្នុងរាជធានីភ្នំពេញ កាលពីថ្ងៃទី២៥ ខែកញ្ញា ឆ្នាំ២០១២ ដើម្បីចងក្រងទៅកាន់រដ្ឋាភិបាល និងម្ចាស់ជំនួយ ក្នុងកិច្ចប្រជុំ នាថ្ងៃទី២៦កញ្ញា។ មតិយោបល់របស់សង្គមស៊ីវិលនោះ មានការជំរុញឲ្យរដ្ឋាភិបាល ផ្តល់កម្មសិទ្ធិដីធ្លីដល់ប្រជាជនកម្ពុជាផងដែរ។
ក្នុងពិធីចែកប័ណ្ណកម្មសិទ្ធិដល់ប្រជាពលរដ្ឋ នៅស្រុកគាស់ក្រឡ ខេត្តបាត់ដំបង ក្រោយពីក្រុមយុវជនស្ម័គ្រចិត្តចុះវាស់វែង កាលពីព្រឹកថ្ងៃអាទិត្យ ទី៣០ ខែកញ្ញា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា "គេថា ប្រជុំដើម្បីប្រមូលមតិ ជូនទៅដៃគូអភិវឌ្ឍន៍ដើម្បីឲ្យអនុសាសន៍ទៅរាជរដ្ឋាភិបាល ក្នុងនោះ មានចំណុចមួយថា សូមផ្តល់កម្មសិទ្ធិដីធ្លី ឲ្យប្រជាពលរដ្ឋឲ្យបានឆាប់។ ខ្ញុំសូមផ្តាំទៅវិញ បើទោះបីជាមាន់មិនរង៉ូវ ថ្ងៃក៏គង់តែរះដែរ។ សូមអស់លោក កុំព្យាយាមទម្លាយទ្វារ នៅពេលដែលទ្វារ វាបើកចំហ។ ម៉េចអត់ការងារធ្វើឬ ចាំបាច់ធ្វើអីចឹង?"។
សម្តេចហ៊ុនសែន បានបន្ថែមថា "គេកំពុងប្រឹងចង់ងាប់នេះ។ ក្មួយៗ វីរៈយុវនិស្សិតរបស់យើង បានខំប្រឹងទាំងយប់ទាំងថ្ងៃ ជាមួយមន្ត្រីជំនាញ ហើយតែមន្ត្រីជំនាញទៅ ក្មួយៗទៅ បូកទាំងកម្លាំងប្រដាប់អាវុធ ទៅទាំងភ្លៀង ទាំងផ្គរ ប្រឹងប្រែងធ្វើណាស់។ អស់លោក មានលុយ មានកាក់ ទៅប្រជុំនៅកាំបូឌីយ៉ាណា តែយើងកំពុងធ្វើកិច្ចការងារនេះ មិនសាមញ្ញ មិនធម្មតា។ ប៉ុន្តែរឿងនេះ ប្រហែលជា ទីចុងបំផុត អត់មានអីធ្វើ អស់អីលេង"។
ប្រសាសន៍របស់សម្តេចនាយករដ្ឋមន្ត្រី ហ៊ុន សែន ដូច្នេះ បានធ្វើឡើង ខណៈដែលក្រុមអង្គការសង្គមស៊ីវិលជាតិ និងអន្តរជាតិ បានជួបប្រជុំ កាលពីព្រឹកថ្ងៃអង្គារ ទី២៥ ខែកញ្ញា ឆ្នាំ២០១២ នៅសណ្ឋាគារ កាំបូឌីយ៉ាណា ក្នុងរាជធានីភ្នំពេញ ដើម្បីប្រមូលយោបល់ ជុំវិញបញ្ហាអភិវឌ្ឍន៍នៃប្រទេសកម្ពុជា ផ្តល់ទៅម្ចាស់ជំនួយ សម្រាប់លើកឡើងក្នុងកិច្ចប្រជុំនៃគណៈកម្មាធិការសម្របសម្រួល រវាងរាជរដ្ឋាភិបាល និងដៃគូអភិវឌ្ឍន៍ លើកទី១៩ កាលពីព្រឹកថ្ងៃទី២៦ ខែកញ្ញា ឆ្នាំ២០១២។
ក្នុងចំណោមមតិ និងអនុសាសន៍ ជាច្រើនចំណុចនោះ ក្រុមអង្គការសង្គមស៊ីវិល បានផ្តោតការយកចិត្តទុកដាក់ខ្លាំងទៅលើការអនុម័តសេចក្តីព្រាងច្បាប់ ស្តីពីសិទ្ធិក្នុងការទទួលព័ត៌មាន រួមទាំងការគ្រប់គ្រងចំណូលពីឧស្ម័ន និងប្រេងកាត កំណែទម្រង់ច្បាប់ និងតុលាការ កំណែទម្រង់ការគ្រប់គ្រងហិរញ្ញវត្ថុសាធារណៈ បញ្ហាដីធ្លី និងព្រៃឈើ ជាដើម៕
