ភ្នំពេញ: សម្តេចនាយករដ្ឋមន្ត្រី ហ៊ុន សែន បានប្រកាសជាថ្មីថា រដ្ឋាភិបាល មិនយកពន្ធលើដីកសិកម្មរបស់ប្រជាកសិករទេ។ សេចក្តីប្រកាសដូច្នេះ បានធ្វើឡើង តបនឹងការឃោសនាអកុសលដែលថា នៅពេលក្រុមយុវជនស្ម័គ្រចិត្ត និងមន្ត្រីជំនាញ ចុះវាស់វែង ធ្វើប័ណ្ណកម្មសិទ្ធិដីធ្លីដល់ប្រជាពលរដ្ឋរួចរាល់ហើយនោះ រដ្ឋាភិបាល នឹងយកពន្ធលើដីទាំងនោះ។
ក៏ប៉ុន្តែក្នុងពិធីចែកប័ណ្ណកម្មសិទ្ធិដីធ្លីដល់ប្រជាពលរដ្ឋ នៅស្រុកគាស់ក្រឡ ខេត្តបាត់ដំបង នាព្រឹកថ្ងៃអាទិត្យ ទី៣០ ខែកញ្ញា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានប្រកាសថា "ជួនកាលកន្លែងខ្លះ គេលួចខ្សិបថា យុវជនមកវាស់ដីនឹង វាស់រួចហើយ រដ្ឋាភិបាល យកពន្ធហើយ។ វាស់នឹងដើម្បីកំណត់ការយកពន្ធ...។ ខ្ញុំសូមប្រាប់ទៅ ដរាបណាគណបក្សប្រជាជនកម្ពុជា នៅកាន់អំណាច មិនមែនត្រឹមតែហ៊ុនសែនទេ ព្រោះអស់ពីហ៊ុនសែនទៅ ក៏នៅមានមន្ត្រីគណបក្សប្រជាជនដទៃទៀត។ គោលការណ៍រួមរបស់គណបក្សប្រជាជន អត់យកពន្ធលើដីធ្លីកសិកម្មទេ។ មិនថា អារឿងដី នៅក្នុងក្រុងទេ។ តែបើដីកសិកម្ម គឺមិនមានការយកពន្ធទេ។ ដរាបណា គណបក្សប្រជាជន នៅកាន់អំណាច"។
ជាមួយនឹងការប្រកាសដូច្នេះ សម្តេចនាយរកដ្ឋមន្ត្រី ហ៊ុន សែន ក៏បានបន្ថែមថា "ចេះតែទៅបោកគេអីចឹង ទៅកើត! ប៉ុន្តែខ្លួនឯង អ្នកទទួលប័ណ្ណកម្មសិទ្ធិនឹងគេដែរ..."។
សម្តេចនាយករដ្ឋមន្ត្រី ហ៊ុនសែន ក៏បានប្រកាសថា ក្រុមយុវជនចុះវាស់វែង ធ្វើប័ណ្ណកម្មសិទ្ធិដីធ្លី នាពេលនេះ នៅទូទាំងប្រទេស មានផ្ទៃដីទំហំ ១.៨៧០.០០០ ហិកតា និងប្រជាពលរដ្ឋ ៤៧៨.៩២០ គ្រួសារ។ រីទំហំក្បាលដី ប្រហែលជា ៧០០.០០០ ក្បាលដី។
មកដល់ពេលនេះ សម្តេចហ៊ុនសែន បានប្រកាសថា គិតត្រឹមថ្ងៃទី២៩ ខែកញ្ញា ឆ្នាំ២០១២ តាមតួលេខរបស់ក្រសួងរៀបចំដែនដី នគរូបនីយកម្ម និងសំណង់ គឺក្រុមយុវជនស្ម័គ្រចិត្ត និងមន្ត្រីជំនាញ បានធ្វើសកម្មភាពលើ ១៨៣ ឃុំ ហើយការបិទផ្សាយសាធារណៈ មាន ២៦.៨២៣ ក្បាលដីហើយ ដែលមានទំហំដីចំនួន ៤៣.៧២២ ហិកតា។ ក្នុងនោះ ប័ណ្ណកម្មសិទ្ធិ ដែលបានចែកដល់ប្រជាពលរដ្ឋ បានចំនួន ១.៦៤៨។ ការចែកប័ណ្ណកម្មសិទ្ធិដីធ្លី លើកដំបូង ក្រោយពីយុវជនស្ម័គ្រចិត្តចុះវាស់វែង កាលពីថ្ងៃទី២៨ ខែមិថុនា ឆ្នាំ២០១២ គឺសម្តេចនាយករដ្ឋមន្ត្រី ហ៊ុន សែន បានចែកប័ណ្ណផ្ទាល់ដៃដល់ប្រជាពលរដ្ឋ នៅខេត្តក្រចេះ កាលពីថ្ងៃទី២១ ខែកញ្ញា ឆ្នាំ២០១២៕
