ភ្នំពេញ ៖ នៅឯទីក្រុងញូវយ៉ក មានកិច្ចប្រជុំរដ្ឋមន្ត្រីការបរទេសអាស៊ានមួយ ជាមួយអគ្គលេខាធិការអង្គការសហប្រជាជាតិ និងប្រធានសម័យប្រជុំលើកទី៦៧ នៃមហាសន្និបាតអង្គការសហប្រជាជាតិ ដែលកិច្ចប្រជុំនោះ បានធ្វើឡើងកាលពីថ្ងៃទី២៨ ខែកញ្ញា ឆ្នាំ២០១២ នៅទីស្នាក់ការអង្គការសហប្រជាជាតិនៅទីក្រុងញូវយ៉ក សហរដ្ឋអាមេរិក។
តាមសេចក្តីថ្លែងការណ៍ពីអង្គប្រជុំ ដែលផ្សព្វផ្សាយដោយក្រសួងការបរទេសកម្ពុជាបានឲ្យដឹងថា កិច្ចប្រជុំនេះបានប្រព្រឹត្តទៅក្រោមអធិបតីភាព ឯកឧត្ដមឧបនាយករដ្ឋមន្ដ្រីហោ ណាំហុង រដ្ឋមន្ដ្រីការបរទេស និងសហប្រតិបត្តិការអន្ដរជាតិកម្ពុជា លោក បាន គីមូន ( Ban Ki-Moon )អគ្គលេខាធិការអង្គការសហប្រជាជាតិ និងលោក វុក ជេរេម៉ិច ( Vuc Jeremic ) ប្រធានសម័យប្រជុំលើកទី៦៧ នៃមហាសន្និបាតអង្គការសហប្រជាជាតិ ដោយមានការចូលរួមពីលោក ស៊ូរិន ពិតស៊ូវណ្ណ ( Surin Pitsuwan ) អគ្គលេខាធិការអាស៊ានផងដែរ ហើយបើតាមសេចក្តីថ្លែងការណ៍បញ្ជាក់ថា ជាកិច្ចប្រជុំរដ្ឋមន្ត្រីការបរទេសអាស៊ាន និងអង្គការសហប្រជាជាតិនេះ គឺជាលើកទី១ ចាប់តាំងពីការអនុម័តសេចក្តីថ្លែងការណ៍រួមសី្ដពីភាពជាដៃគូគ្រប់ជ្រុងជ្រោយរវាងអាស៊ាន និងអង្គការសហប្រជាជាតិ នៅឯកិច្ចប្រជុំកំពូលអាស៊ាន-អង្គការសហប្រជាជាតិលើកទី៤ នៅបាលីកាលពី ខែវិច្ឆិកា ឆ្នាំ២០១១។
សេចក្តីថ្លែងការណ៍បានឲ្យដឹងថា កិច្ចប្រជុំរដ្ឋមន្ត្រីការបរទេសអាស៊ាន-អង្គការសហប្រជាជាតិបានពិនិត្យឡើងវិញនូវការអនុវត្តន៍ភាពជាដៃគូគ្រប់ជ្រុងជ្រោយរវាងអាស៊ាននឹងអង្គការសហ ប្រជាជាតិ ដោយផ្អែកលើរបាយការណ៍រួមរបស់លេខាធិការដ្ឋានអាស៊ាន និងអង្គការសហប្រជាជាតិ។ អង្គប្រជុំបានពិភាក្សាផងដែរអំពីការរៀបចំ ព្រមទាំងបញ្ហាសំខាន់ៗ ដែលត្រូវលើកឡើង នៅក្នុងកិច្ចប្រជុំកំពូលអាស៊ាន-អង្គការសហប្រជាជាតិលើកទី៥ ខាងមុខនេះ ដែលគ្រោងប្រព្រឹត្តទៅនៅរាជធានីភ្នំពេញ នៅថ្ងៃទី២០ ខែវិច្ឆិកា ឆ្នាំ២០១២។ ជាមួយគ្នានោះ កិច្ចប្រជុំ ក៏បានស្វាគមន៍ការបង្កើតដំណើរការ នៃការសន្ទនាជាទៀងទាត់រវាងលេខាធិការដ្ឋាននៃអង្គការទាំងពីរ ហើយបានអំពាវនាវដល់អង្គការទាំងពីរនេះ ឲ្យពង្រឹងកិច្ចសហប្រតិបត្តិការបន្ថែមទៀត ដូចដែលមានចែងក្នុងសេចក្ដីថ្លែងការណ៍រួម។
សេចក្តីថ្លែងការណ៍បានឲ្យដឹងទៀតថា ប្រធានអាស៊ានបានជូនព័ត៌មានត្រួសៗជូនកិច្ចប្រជុំរដ្ឋមន្ត្រីការបរទេសអាស៊ាន-អង្គការសហប្រជាជាតិសី្តអំពីកិច្ចខិតខំប្រឹងប្រែងរបស់អាស៊ាន ដើម្បីបង្កើតសហគមន៍អាស៊ាន នៅឆ្នាំ២០១៥។ អគ្គលេខាធិការអង្គការសហប្រជាជាតិបានជូនព័ត៌មានត្រួសៗផងដែរជូនកិច្ច ប្រជុំរដ្ឋមន្ត្រីការបរទេសអាស៊ាន-អង្គការសហប្រជាជាតិសី្តអំពីអាទិភាពថ្នាក់តំបន់ និងសកល របស់អង្គការសហប្រជាជាតិ។ ប្រធានមហាសនិ្នបាតអង្គការសហប្រជាជាតិបានថ្លែងអំពីអាទិ ភាពនៃអង្គការសហប្រជាជាតិនៅក្នុងសម័យប្រជុំបច្ចុប្បន្ននៃមហាសនិ្នបាតនេះដែលផ្តោតការ យកចិត្តទុកដាក់ជាសំខាន់លើមូលបទ «ការកែសំរួលឬដំណោះស្រាយនៃជំលោះ ឬសភាព ការណ៍អន្ដរជាតិដោយសនិ្ដវិធី»។
សេចក្តីថ្លែងការណ៍បញ្ជាក់ថា ក្នុងនាមជាផ្នែកមួយនៃសហគមន៍អន្ដរជាតិ រដ្ឋមន្ត្រីការបរទេសអាស៊ានបានជំរាបកិច្ចប្រជុំថា អាស៊ានបានប្ដេជ្ញារួមចំណែកជាផ្នែកនៃដំណោះស្រាយចំពោះភាពប្រឈមសកលដែលមាន នាពេលបច្ចុប្បន្នក្នុងនោះរួមមានការលើកកំពស់ជាមួយអង្គការសហប្រជាជាតិនូវតំលៃនៃការ និយមកណ្តាលដែលបានបង្កើតឡើងដោយចលនាសកលនិយមកណ្ដាល។ អគ្គលេខាធិការអង្គការសហប្រជាជាតិ និងប្រធាននៃមហាសនិ្នបាតអង្គការសហប្រជាជាតិបានបញ្ជាក់ជាថ្មីពីការ ត្រៀមលក្ខណៈរបស់អង្គការសហប្រជាជាតិដើម្បីធ្វើការយ៉ាងជិតស្និទ្ធជាមួយអាស៊ានក្នុងការពង្រឹងសមត្ថភាពរបស់អាស៊ានដើម្បីបំពេញគោលដៅទាំងនេះ ជាពិសេសតាមរយៈសកម្មភាព សហប្រតិបត្តិការជាក់ស្តែងដែលត្រូវអនុវត្តក្នុងក្របខណ្ឌ នៃភាពជាដៃគូគ្រប់ជ្រុងជ្រោយរវាងអាស៊ាន និងអង្គការសហប្រជាជាតិ។
កិច្ចប្រជុំបានពិភាក្សាផងដែរ លើបញ្ហាតំបន់និងអន្ដរជាតិជាច្រើន ជាពិសេសបញ្ហា ដែលត្រូវយកចិត្តទុកដាក់រួម និងផលប្រយោជន៍រួមចំពោះអាស៊ាននិងអង្គការសហប្រជាជាតិដែលសិ្ថត ក្នុងរបៀបវារៈនៃសម័យប្រជុំលើកទី៦៧ នៃមហាសនិ្នបាតអង្គការសហប្រជាជាតិក្នុងនោះរួមមាន ការអប់រំ សុខាភិបាលសកល ការផ្លាស់ប្ដូរអាកាសធាតុ ការគ្រប់គ្រងគ្រោះមហន្តរាយ ដំណោះស្រាយជំលោះ សិទិ្ធមនុស្ស វិបត្តិហិរញ្ញវត្ថុសកល ការអភិវឌ្ឍន៍ប្រកបដោយចីរភាព និងរបៀបវារៈក្រោយឆ្នាំ២០១៥ ប្រតិបតិ្ដការរក្សាសន្តិភាព និងការកសាងសន្ដិភាព៕
កោះកែវ